Quramynda tarıhshy, ólketanýshy, óner zertteýshileri, mýzeı qyzmetkerleri, dombyrashylar jáne ardager qalamgerler bar ekspedısııa músheleri 23 sáýir kúni tańǵy saǵat 4-te Oral qalasyndaǵy Qurmanǵazy men Dına eskertkishi aldynan attanyp, Qaratóbege ketti. Ekspedısııany Batys Qazaqstan oblysy ákiminiń orynbasary Ǵabıdolla Ospanqulov bastap barady. Toptyń alǵash at basyn tireıtin núktesi – Qaratóbe aýdany Aqqozy aýyldyq okrýgindegi Aqtulym mekeninde ornalasqan kúıshi Uzaq Myrzabaıulynyń kesenesi. Uzaq kúıshi – Qurmanǵazyny janyna ertip júrip baýlyǵan, batasyn bergen ustazy.
Qaratóbe aýylynda «Qos ishekti qudiret» taqyrybyndaǵy dóńgelek ústelge qatysqan ekspedısııa músheleri budan keıin Aqjaıyq aýdanynyń Taıpaq óńirin kesip ótip, Jańaqala topyraǵyna qonaǵa jetedi. Sapar barysynda Jańaqala topyraǵynda máńgi tynys tapqan Mámen, Qalı Jantileýov, Tuıaqberdi Shámilov syndy kúıshilerdiń kesenelerine soǵyp duǵa baǵyshtaǵan top Qurmanǵazynyń ósken aýyly Kókterek eldimekenine barady. Ol jerde jergilikti halyqpen taǵylymdy shara josparlanǵan.
– Biz Kókterek aýylynyń mańyndaǵy Narsoıǵan saıynda kóshet otyrǵyzamyz. Buryn osy jerde terek ósken, aýyl ataýy da sodan shyqqan. Biz ekken kóshetter bolashaqta «Qurmanǵazy toǵaıy» atalyp, ný ormanǵa aınalsa degen úmitimiz bar. Odan ári Qurmanǵazy babamyzdyń týǵan jeri Jıdeli qumyna taban tıgizemiz. Uly kúıshiniń týǵan jerinen alynǵan topyraq – Altynjarǵa, Reseı Federasııasy Astrahan oblysy Krasnoıar aýdanyndaǵy kúıshi kesenesine jetkiziledi. Bizben birge júretin teleoperator osy sapardan áserli beınefılm jasaıdy, – deıdi osy sapardy uıymdastyrýshy Batys Qazaqstan oblystyq tarıhı-ólketaný mýzeıiniń dırektory Merbolat Ersaev.
Top quramynda júrgizýshilerdi qosqanda 18 adam, 3 mashına bar. Sapar kezinde halyqpen júzdesý sharalarynda ólketanýshy, ardager-jýrnalıst Tıhon Álipqalı men aqyn Darıǵa Mushtanova sóz bastap, dombyrashy Edige Nábıev kúıshi shyǵarmalaryn oryndamaq. «Oral sazy» ansambliniń jetekshisi, Dına Nurpeıisova atyndaǵy saz mektebiniń muǵalimi, ónertanýshy Asqar Kenjeǵalıev Qurmanǵazy shyǵarmashylyǵynan syr shertedi. Mýzeı qyzmetkerleri Nurjan Tólepov pen Rysty Kajýshevanyń da ótken men búgindi baılanystyryp aıtar taǵylymdy áńgimesi mol. Ekspedısııa músheleri sapar barysynda Dáýletkereı Shyǵaıuly, Seıtek Orazalyuly sekildi kúıshilerdiń de zıratyna soǵyp, qazaq kúı óneriniń esimi umytylmas arystaryna taǵzym etpek.
Kúıshi kesenesi basyndaǵy negizgi shara sáýirdiń 28-i kúni ótpek. IýNESKO deńgeıinde atalyp ótetin uly kúıshiniń mereıtoıyna arnalǵan halyqaralyq shara Altynjar aýylyndaǵy Qurmanǵazy mýzeı-kesheni ekspozısııasymen tanysýmen qorytyndylanady. Ekspedısııa Oral qalasyna 29 sáýir kúni oralady dep kútilýde.
Qazbek QUTTYMURATULY,
«Egemen Qazaqstan»
Batys Qazaqstan oblysy
