Aýyl sharýashylyǵy mınıstrliginiń ókili ózderi paıdalanatyn sýretter sapasyn áli de bolsa jaqsarta túsý qajettigin aıtyp jatty. Al agenttik basshysy sýretter sapasyn jaqsartýǵa ýáde berdi.
Oılap qarasańyz, elimizdiń Aýyl sharýashylyǵy mınıstrligi men Ulttyq ǵarysh agenttiginiń jerdi qashyqtyqtan zondtaýǵa qyzmet etetin kompanııalary bir-birimen tyǵyz qarym-qatynasta jumys isteýi tıis. О́ıtkeni ǵarysh salasy bolsa, jyldan jylǵa damyp kele jatqan sala. Onyń aýyl sharýashylyǵyna beretin paıdasy óte kóp. Tipti bul máseleniń mánisin jaqsy biletin sarapshylar bolashaqta aýyl sharýashylyǵy ǵarysh qyzmetiniń kómeginsiz jumys isteı almaıtyndyǵyn kesip aıtyp otyr. О́kinishke oraı, bizdiń elimizde Aýyl sharýashylyǵy mınıstrligi men Ulttyq ǵarysh agenttiginiń tıisti qurylymdary arasyndaǵy baılanys áli tolyq bekip úlgermegen de sekildi. Áıtpese joǵarydaǵy áńgime Parlament deńgeıinde aıtylmasa kerek edi. Ol másele ekijaqty qarym-qatynastyń jumys tártibimen baıaǵyda sheshimin tapqan bolar edi.
KSRO ushqysh-ǵaryshkeri V. I. Sevastıanov ótken ǵasyrdyń sekseninshi jyldarynyń ortasynda bylaı dep jazady: «Alǵashqy ǵaryshkerler Iý.A.Gagarın men G.S.Tıtov ǵaryshtan Jerdiń óte aıqyn kórinetindigin kýálandyrǵan bolatyn. Búgingi kúni kosmostyq túsirilimder men spektrogrammalar munaı men gazdy, basqa da paıdaly qazbalardy izdestirýge jaqsy járdemin tıgizip júr. Bul quraldardy paıdalana otyryp bizdiń planetamyzdyń ósimdikter álemin zerttep, orman resýrstarynyń esebin júrgizýge, egistikter men jaıylymdyqtardyń jaǵdaıyn bilip otyrýǵa bolady. Ǵaryshtan túsirilgen kópaımaqtyq túsirilimder ıgerýge jaramdy jańa aýmaqtardy izdestirýde qundy derekter bere alady».
Mine, bul ótken ǵasyrdyń sekseninshi jyldarynyń ortasynda, osydan otyz jyldan astam ýaqyt buryn aıtylǵan sóz. Sodan beri álemdik ǵarysh salasynyń qarqyndy damı túskendigi anyq. Oǵan sala boıynsha ashylyp jatqan jańalyqtar jaqsy dálel bola alady. Ǵalymdar bolashaqta ǵarysh salasy ekonomıkanyń kóptegen salalaryn sońyna tirkep alyp, lokomotıv sekildi alǵa súırep otyratyndyǵyn aıtady. Tek onyń jetistikteri men ıgilikterin paıdalana bilý kerek.
Árıne, Qazaqstannyń ǵarysh salasy – áli jas sala. Biraq onyń ekonomıkamyzǵa beretin paıdasy men áleýetiniń zor ekendigin qazirdiń ózinde baıqaýǵa bolady. Soǵan mysal retinde ınternetten alynǵan myna habardy keltirgendi jón kórip otyrmyz.
«Qazaqstan Ǵarysh sapary» UK» AQ-tyń Geoaqparattyq tehnologııalar ortalyǵy 2015 jyly Aýyl sharýashylyǵy mınıstrliginiń Agroónerkásiptik keshendegi memlekettik ınspeksııa komıtetiniń tapsyrysy boıynsha soltústiktegi astyqty óńirlerge kosmostyq monıtorıng jumystaryn júrgizedi. Monıtorıng jumystaryn júrgizýge otandyq KazEOSat-2 spýtnıginiń túsirilimderi jáne qyzmeti jalpy paıdalanymdaǵy Landsat-8 spýtnıginiń derekteri paıdalanylady. Osylar arqyly jınaqtalǵan derekter nátıjesinde óńirde júrgizilgen agrotehnologııalyq operasııalardyń monıtorıngi jasalady. Ol egis jumystarynyń merzimdiligin baǵalaýǵa, aýyl sharýashylyǵy egistikteriniń jaǵdaılaryn aıqyndaýǵa, egistikterdiń shyǵymdylyǵyna boljam jasaýǵa jáne aýylsharýashylyq daqyldaryn jınaýdyń qarqyndylyǵyn baǵalaýǵa múmkindik beredi.
Mine, osy jumystardyń nátıjesi Qostanaı oblysynda aýyl sharýashylyǵy salasynda bolǵan bir qylmystyń betin ashyp, bultartpaı dáleldeý múmkindigin beredi. Sóıtip atqarylmaǵan jumysty atqardyq dep memlekettiń 34 490 500 teńge sýbsıdııasyn jymqyrmaq bolǵan kináli adamdar ony qaıta qaıtarýǵa májbúr bolady. Osy jaǵdaıǵa baılanysty Sybaılas jemqorlyqqa qarsy is-qımyl ulttyq bıýrosynyń Qostanaı oblysy boıynsha departamentiniń basshylyǵy «Qazaqstan Ǵarysh sapary» UK» AQ-tyń basshylyǵyna hat joldap alǵystaryn bildiredi.
Ulan-ǵaıyr jeri bar bizdiń Qazaqstannyń jaǵdaıynda otandyq spýtnıkterimizdi «sol ulan-baıtaq dalamyzǵa ǵaryshtan qarap turǵan kóz» dep atasaq, eshbir artyqshylyǵy bolmas. О́ıtkeni bizdiń az halqymyz osynshama alyp dalamyzǵa ǵaryshtyq spýtnıktersiz baqylaý ornata almaıtyny anyq. Endeshe elimizdiń jańadan damyp kele jatqan ǵarysh qyzmetin, onyń múmkindikterin tek Aýyl sharýashylyǵy mınıstrligi ǵana emes, basqa da ekonomıkalyq salalar óz múddeleri úshin oryndy paıdalana bilse, jón bolar edi.
Suńǵat ÁLIPBAI,
«Egemen Qazaqstan»
