Memlekettik syılyqtyń laýreaty, jazýshy Beksultan Nurjekeulynyń kitapqa jazǵan kirispe sózine kóz júgirtip shyqqannan keıin muqabasy ádemi kitap arqyly áıel álemi men belgili otbasylar ómirine saparlap shyǵatynymyzdy ishteı sezinip te úlgergen edik. Rasynda da, qoǵamdaǵy belgili áıelder nemese belgili tulǵalardyń súıikti jary jaıly jazylǵan tańdaýly esse, maqala, suhbattar bir kúnniń emes, birneshe jylǵy eńbektiń jemisi.
«Túrkistan» gazetine kóp jyldar basshylyq jasaǵan alashtyń abyzy, Qazaqstannyń halyq jazýshysy Qaltaı Muhametjanovtyń ıdeıasymen dúnıege kelgen «Áıel-álem» qyz-kelinshekter betinen bastaý alǵan T.Aldabergenqyzynyń shyǵarmashylyǵyndaǵy tyń toptamalar óz turaqty oqyrmanyn áldeqashan qalyptastyryp alǵan. Talaı jyldardan beri hanymdar taqyrybyna talmaı qalam terbep kele jatqan Tańsulý Aldabergenqyzy oı-paıymyn, syr-suhbatyn qazaqy tanymmen órip, tarqatady. Onsyz da bólip-jarýǵa kelmeıtin áıel men otbasyny bútin bir uǵymǵa aınaldyrady. Kóńil kúıdiń, ishte tynshyp aǵyp jatatyn ártúrli sezimderdiń, otbasylyq jarasymnyń generatory áıel ekenine kásibi de, taǵdyry da bir-birine uqsamaıtyn keıipkerleriniń áńgimesi tipti kóz jetkize túsedi. Mysaly, 100 jasaǵan aktrısa Habıba Elebekovanyń ápkesi Dalıla týraly áńgimesi, ǵasyrmen qurdas taǵy bir aktrısa Aısha Abdýllınanyń júrekjardy syry, Serke Qojamqulovtyń qyzy Renatamen, halyq jazýshysy, aqyn Ábý Sársenbaevtyń qyzy Raıhanmen órbigen suhbattary shynaıylyǵymen hám tereńdigimen tartymdy.
Kitaptaǵy asa qyzyqty taraýlardyń biri «Jary jaqsynyń – jany jaqsy» dep atalady. Munda ult jýrnalıstıkasynyń alǵy kóshinen kóringen ustaz-jýrnalıst Balǵabek Qydyrbekulynyń zaıyby Sapýra apaı, qazaq mýzykasynyń saıypqyrany Nurǵısa Tilendıevtiń jary Darıǵa Tilendıeva, ádebıet pen mádenıetke mol mura syılap ketken Qadyr Myrza Áliniń áıeli Saltanat, talantty akter ári rejısser Raıymbek Seıitmetovtiń jary Neıla Maldybaeva, jazýshy Baqqoja Muqaıdyń jary Nurjamal Ahmetova, belgili sahna maıtalmandary Esbolǵan Jaısańbaev pen Ánýar Moldabekovtiń jarlary Sálıha Qojaqova men Baıan Imasheva, bar ǵumyryn teatr tanýǵa arnaǵan biregeı óner zertteýshisi Áshirbek Syǵaıdyń shańyraǵy men murasyna ıe bolyp otyrǵan Kúlásh apaı sóz alyp, ult rýhanııatyna qyzmet etken aıtýly tulǵalardyń otbasyndaǵy el bile bermeıtin jar, áke, baýyr retindegi qarapaıym mindeti týraly qyzyqty syr shertedi.
Budan bólek avtor ónerde, ádebıette, jalpy rýhanııat salasyna eńbek sińirip júrgen tanymal áıelderdiń birtalaıynyń tutas galereıasyn jasap shyqqan. Áıel men otbasyna baılanysty túıitkildi máselelerdiń bárin de qamtýǵa tyrysqan «О́nerim – ómirim», «Tárbıe degen bir táńir», «О́mirdiń ózi» taraýlarynyń da kóterip turǵan júgi mol. Saıyp kelgende, óz ýaqytyndaǵy tańdaýly áıel bolýdyń syryn, otbasyn ishki-syrtqy qaterden qorǵap qalýdyń qupııasyn tanýǵa Tańsulý Aldabergenqyzynyń osy kitaby tamshydaı bolsa da óz úlesin qosary sózsiz.
Aıgúl AHANBAIQYZY,
«Egemen Qazaqstan»
ALMATY
