Baqytjan Saǵyntaev Qaraǵandy oblysyna jumys saparymen keldi

Sátbaevtaǵy sátti jobalar

Úkimet basshysy áýeli Sátbaev qalasynda bolyp, ol jerde «Nurly meken» ja­ńa shaǵyn aýdanynyń qury­ly­symen tanysty. Atalǵan shaǵyn aýdanǵa Jezqazǵan qalasyndaǵy apatty úılerdiń jáne mys ken oryndaryn qaıta óńdeý kezinde opyrylǵan aýdan aımaǵynyń mańyndaǵy eldi meken turǵyndary kóshiriledi.

Qazirgi tańda shaǵyn aýdanda baspanaǵa muqtaj azamattar úshin 118 700 sharshy metr aýmaqqa 1760 páter salynǵan. Magıstraldy jylý júıesi tar­tylyp, úıler qajetti ın­je­nerlik kommýnıkasııalarmen qamtamasyz etilgen.

Sátbaev qalasynyń ákimi Asqar Ydyrysov bıylǵy jyl­dyń maýsym aıynyń sońyna deıin aýdany 12 100 sharshy metr bolatyn 4 úı (195 páter) salynatynyn aıtty. Buǵan qosa, bıyl qos páterli 107 úı men eki jataqhana qurylysyn aıaqtaý kózdelgen.

B.Saǵyntaev sapary barysynda Memleket basshysynyń «Bes áleýmettik bastama» Ún­deýinde bergen tapsyrmalaryna sáıkes, Jezqazǵan óńiriniń tur­ǵyn úı qurylysy jáne «Nur­ly jer» baǵdarlamasyn júzege asyrý josparlarymen tanysty.

Sonymen qatar Sátbaev qala­synda Premer-Mınıstr «Haným» makaron ónimderin shyǵa­ratyn kásiporynda bolyp, óńirdegi shaǵyn jáne or­ta bıznesti damytý qarqy­nymen, sondaı-aq ónimdi jumys­pen qamtý jáne jappaı kásip­kerlikti damytý baǵdarlamasyn iske asyrý barysymen tanysty.

Atalǵan kásiporyn ótken jyldyń qyrkúıek aıynda paıdalanýǵa berilgen. Jo­ba­ny iske asyrý ımportty al­mastyrýǵa, sondaı-aq Jezqaz­ǵan óńiriniń ekonomıka­syn ártaraptandyrýǵa yqpal etedi. Qazirgi tańda ónimder Jez­qazǵan, Sátbaev jáne Uly­taý dúkenderi men sýpermar­ket­terine jetkiziledi. Kele­shekte maka­ronnyń jańa túrlerin shyǵa­rý, kásiporynnyń óndiris­tik qýatyn arttyrý, sondaı-aq Qazaqstanda jáne shetelde ót­kizý naryǵyn keńeıtý kóz­delgen.

Sondaı-aq Úkimet basshysy jumys sapary aıasynda «Ka­zakhmysSmelting» JShS Jezqazǵan mys qorytý zaýy­tynda bolyp, onda ekinshi ken qyzdyrý peshin rekonstrýk­sııalaý barysymen tanys­ty. Nysanda katodty mys ón­dirisiniń tehnologııalyq úde­risin, aınalmaly quıý mashınasy men anodty mys quıý ju­mysyn kórdi. Jezqazǵan mys qorytý zaýyty iske qosylǵan kezden beri jer qoınaýynan 1 mlrd tonnadan astam ken ón­dirildi. 2018 jyldyń qań­tar-naýryz aılarynda 30,7 myń tonna tazartylǵan mys óndi­rilgen.

Jezqazǵan tirligi jandanǵan

Premer-Mınıstr Ba­qyt­­jan Saǵyntaev Qara­ǵan­dy oblysyna jumys sapa­ry barysynda Jezqazǵan óńiri­niń aktıvimen jáne jurt­shy­ly­ǵymen áleýmettik-ekono­mı­kalyq damý máseleleri jóninde kezdesý ótkizdi.

Jıyn barysynda oblys­tyń monoqalalaryn damy­tý, ınfraqurylymdy jetil­dirý, naryq jaǵdaıatynyń ózgeris­terine jáne jańa tehnolo­gııalardyń paıda bolýyna baılanysty mamandardy daıar­laý men qaıta daıyndaý máseleleri talqylanyp, Elba­synyń «Rýhanı jańǵyrý» baǵ­dar­lamalyq maqalasyndaǵy tap­syrmalardy iske asyrý nátıjeleri men «Prezıdenttiń bes áleýmettik bastamasyn» oryn­daý tetikteri sóz boldy.

Atap aıtqanda, kezdesýge qa­tysýshylar Qyzylorda – Jez­qazǵan – Qaraǵandy – As­tana baǵyty boıynsha «Sa­ry­­arqa» magıstraldy gaz qu­­byry jobasyn iske asyrý aıa­­­synda óńirdi gazdandyrý já­­­ne ishki gaz taratý jelilerin salý josparlary týraly áńgi­meledi.

Úkimet basshysy Elba­sy­nyń «Prezıdenttiń bes áleý­mettik bastamasy» Úndeýin­degi mindetterdi oryndaý maq­­satynda tıisti tetikter ázir­­lenip, naqty is-sharalar men oryn­daý merzimderin qam­tı­tyn «Jol kartasy» júze­ge asyrylyp jatqanyn jet­kizdi. Qajetti zańnamalyq óz­gerister jasalyp, bıýdjetten tıisti qarajat bólingenin, jal­py Úkimet alǵa qoıylǵan min­detterdi oryndaý úshin barlyq qajetti sharalardy qabyldap jatqanyn atap ótti.

Budan ózge, bilim berýdiń qol­jetimdiligin arttyrý, bas­pana jaǵdaılaryn jaqsartý: jańa jataqhanalar men «7 – 20 –25» turǵyn úı baǵdarlamasy sekildi stýdent jastarǵa ar­nalǵan jańa múmkindikter talqylandy.

Qaraǵandy oblysynyń ákimi Erlan Qoshanov oblystyń áleýmettik-ekonomıkalyq damýy men jumys josparlary týraly baıandady. О́ńirde monoqalalar ekonomıkasyn ártaraptandyrý boıynsha jumystar júrgizilip jatyr. О́tken jyly qabyldanǵan úsh jyldyq jospar shaǵyn já­ne orta bıznesti, servıstik eko­no­mıkany, áleýmettik nysan­dardyń qurylysy men ınfra­qu­rylymyn damytýǵa, sondaı-aq jumyspen qamtýǵa baǵyt­talǵan. Jospardyń oryndalýy ónerkásip óndirisiniń kólemin 13,2%-ǵa arttyrýǵa múmkindik be­redi. Negizgi kapıtalǵa sa­lyn­ǵan ınvestısııalardyń kólemin 63,1%-ǵa ulǵaıtý josparda bar. Nátıjesinde 1500-ge jýyq jańa jumys orny ashylady.

«Prezıdenttiń bes áleý­mettik bastamasyn» oryndaý týraly esep berý barysynda E.Qoshanov gaz qubyryn salý jobasyn iske asyrý ob­lys turǵyndarynyń 70%-yn qamtıtynyn aıtty. Jez­qaz­ǵanda birinshi kezeńde or­ta­lyqtan jylýmen qamtamasyz etilmegen kósheler men shaǵyn aýdandardy qosymsha qamtý arqyly qalaishilik jelilerdi salý kózdelgen. Munda 2,5 myńǵa jýyq úıdi gazdandyrý josparlanyp otyr. Odan keıingi kezeń – Sátbaev qalasy men kórshi eldi mekenderdi gazdandyrý ekenin aıtty óńir basshysy.

Qala aktıvimen ótken jıynda Úkimet basshysyna «Qazaqmys» korporasııasy» JShS Basqarý keńesiniń bas dırektory Baqtııar Qy­ryq­pyshev, Investısııalar jáne damý mınıstri Jeńis Qasym­bek, Eńbek jáne halyqty áleý­mettik qorǵaý mınıstri Mádına Ábilqasymova, Mádenıet jáne sport mınıstri Arystanbek Muhamedıuly, Ulttyq eko­nomıka mınıstriniń birin­shi orynbasary Rýslan Dá­le­nov óńirdi damytý bo­ıyn­­sha atqarylyp jatqan jumys­tar­dy baıandady.

Talqylaý qorytyndysy boıynsha B.Saǵyntaev jalpy Jezqazǵan óńiriniń damýy oń qarqyn kórsetetinin aıtyp, mınıstrlikter men oblys basshylaryna alǵa qoıylǵan jos­parlardy oryndaý men atalyp ótken máselelerdi sheshý jóninde birqatar naqty tapsyrma berdi.

Jezqazǵanǵa sapary barysynda Úkimet basshysy «Baıan» kompanııasy men «Qa­zaq­­mys» korporasııasynyń medı­sınalyq ortalyǵynda da bolyp, jumys barysymen tanysty.

Jańa ekonomıkaǵa – jas kadrlar

Úkimet basshysy Baqytjan Sa­ǵyntaev Qaraǵandy qala­syn­da oblystyń joǵary oqý oryn­darynyń «Serpin» baǵdar­lamasy boıynsha oqyp jat­qan stýdentterimen, kolledj oqýshylarymen jáne stýdent­ter uıymynyń kóshbas­shy­larymen, JOO jáne kolledj basshylarymen kezdesti.

Júzdesý barysynda Elba­synyń joldaýlary men «Pre­zıdenttiń áleýmettik bes bastamasy» Úndeýinde kórsetilgen jańa ekonomıkaǵa qajetti kadr­lardy daıarlaý, bilim berýdiń sapasy men qoljetimdiligin arttyrý, stýdent jastardyń turmys jaǵdaıyn jaqsartý máseleleri sóz boldy.

Úkimettiń qazirgi ýaqyt­ta eńbek naryǵy ınfraqu­ry­lymyn jańǵyrtý boıynsha atqaryp jatqan jumystary týraly M.Ábilqasymova, Bilim jáne ǵylym vıse-mınıstri Bıbigúl Asylova jan-jaqty baıandap berdi.

Kezdesýdi qorytyndylaǵan Úkimet basshysy bazalyq sala­lardaǵy básekege qabilettilikti art­tyryp, ekonomıkalyq ósim­niń jańa modelin damytý qa­jettiligi týraly Memleket bas­­shysynyń nusqaýyn eske sal­dy. Baqytjan Saǵyntaev óńir­­de sheteldik ınvestorlar salyp jatqan jańa kásip­oryn­dar úshin qajetti kadr­lar­dy daıarlaý kerektigine kóńil aýdaryp, JOO jáne kol­ledj basshylaryna atalǵan óndiris aksıonerlerimen teh­nıkalyq mamandyqtarǵa degen suranysty zertteý úshin baılanys ornatýdy tapsyrdy.

Úkimet basshysy ju­mys sapary aıasynda «Sary­arqa» EEA-da bolyp, Indýs­trııalyq-ınnovasııalyq damý baǵ­darlamasy boıynsha ju­mys istep jatqan óndiristik kásip­­oryndardy aralady. Atap aıt­qanda, «Bıomer Arma­týra» JShS men «Re­cycling­Company» kompanııa­sy­nyń jumysymen tanysty.

«Bıomer Armatýra» fır­masynyń ónimderi «Sa­ryarqa» gaz magıstrali qurylysyna qa­jetti ónimder shyǵaratyn bolsa, «RecyclingCompany» JShS es­kirgen kólik quraldaryn joıý­men aınalysatyn Ortalyq Azııa aýmaǵyndaǵy birden-bir kásiporyn.

Qaırat ÁBILDA,

«Egemen Qazaqstan»

Qaraǵandy oblysy