Osy oraıda partııa Tóraǵasynyń birinshi orynbasary Máýlen Áshimbaevtyń qatysýymen jobanyń tusaýkeser kezdesýi ótti. Onda qatysýshylar «Qazaqstanda nesıe ústemesi nege joǵary?» taqyrybyn jan-jaqty saraptap, kóterilgen máselege qatysty óz pikirlerin bildirdi. Belgili ekonomıst Rahym Oshaqbaevtyń moderatorlyǵymen ótken is-shara Facebook áleýmettik jelisinde tikeleı efırde kórsetildi.
Búginde «Nur Otan» partııasy Elbasynyń tapsyrmasy boıynsha partııa qyzmetin jańǵyrtý aıasynda júıeli jumys júrgizýde. Osy baǵytta birqatar tyń bastamalar men partııalyq jobalar qolǵa alyndy. Nur Otan Trends jobasy da osy qarqyndy jumystyń nátıjesi ekeni sózsiz. Bul bastamanyń mańyzy men mánine toqtalǵan partııa Tóraǵasynyń birinshi orynbasary qoǵamdaǵy ózekti máselelerdi sheshýdiń basy-qasynda júrý partııanyń basty mindeti ekenin aıtty.
– Aldaǵy ýaqytta Nur Otan Trends jobasy qoǵamdaǵy áleýmettik, ekonomıkalyq, saıası jáne taǵy da basqa máselelerdi ashyq talqylaıtyn erkin pikirtalas alańy retinde turaqty jumys isteıdi dep senemin. Búgingi otyrysymyzda qazirgi kezdegi eń ózektilerdiń biri joǵary ústemeli nesıe máselesine toqtalyp otyrmyz. О́ıtkeni bul túıtkildiń halyqqa da, bıznes-qaýymdastyqqa da tikeleı qatysy bar. Sondyqtan osyndaı júıeli máseleni ózgertýdiń tıimdi tetikterin qarastyrý úshin bilikti sarapshylarmen birlesip talqylaýdyń bereri mol dep esepteımin, – dedi Máýlen Áshimbaev.
Sondaı-aq «Nur Otan» partııasy Tóraǵasynyń birinshi orynbasary bul jerde máseleler jaı talqylanyp qana qoıylmaı, sonyń nátıjesinde naqty usynystar daıarlanatynyn jetkizdi. Keıin olardy Úkimet pen Parlamentke joldaý baǵytynda jumystar júrgizilmek. Odan bólek, otyrystyń áleýmettik jelide tikeleı efırde kórsetilgenine nazar aýdarǵan Máýlen Áshimbaev: «Bul partııanyń elmen etene ári ashyq jumys isteıtinin aıqyn dáleldeıdi. Osylaısha biz qoǵam belsendileri jáne belgili sarapshylarmen tyǵyz baılanys ornatyp, el damýyna oń áserin tıgizetin tustardy aıqyndaıtyn bolamyz. Bul Elbasy júktegen strategııalyq mindetterdi júzege asyrýǵa da óz septigin tıgizedi», dedi.
Partııanyń bastamasymen qolǵa alynǵan jobanyń alǵashqy taqyryby shyn máninde óte ózekti. Sebebi áli kúnge deıin elimizdegi bank sektory 2007 jylǵy qarjy daǵdarysynyń saldaryn tartyp keledi. Tipti keıbir jekelegen bankter aıtarlyqtaı keleńsizdikterge tap bolyp, jumystaryn toqtatýǵa da májbúr bolǵanyn bilemiz. Osyǵan oraı memleket tarapynan bul salaǵa qarjylaı qoldaý kórsetý isi turaqty túrde júrgizilýde. Soǵan qaramastan elimizde nesıe kólemi ulǵaımaı, 2015 jylǵy deńgeıde qalyp otyr. Nesıe ústemesi de óte joǵary deńgeıde.
Osyndaı olqylyqtardyń aldyn alý maqsatynda túrli memlekettik baǵdarlamalardyń da qolǵa alynǵany belgili. «Bıznestiń jol kartasy-2020», «Agroónerkásiptik keshendi damytý», «Nátıjeli jumyspen qamtýdy jáne jappaı kásipkerlikti damytý» sııaqty tyń bastamalar men «Nurly jer»,
«7 – 20 – 25» sııaqty qoljetimdi turǵyn úı baǵdarlamalary jumys isteýde. Osylaısha otandyq bankterdiń olqy tustary memleket esebinen rettelýde.
Nur Otan Trends alańynda osy máselelerge basa nazar aýdarylyp, sarapshylar ózderiniń naqty usynystaryn jetkizdi. Atap aıtqanda, kópshilikke «Halyk Finance» aksıonerlik qoǵamy men «Talap» qoldanbaly zertteýler ortalyǵynyń atalǵan máseleni ońtaıly sheshýge baǵyttalǵan jobalary tanystyryldy. Bul jobalarda nesıe berýdiń toqyraý sebebi, ekonomıkadaǵy qurylymdyq máseleler, iri bıznesterdiń bank júıesinen tys qarjylandyrylýy, ekonomıkadaǵy memlekettik kompanııalar úlesiniń ósýi sııaqty baǵyttar tolyqqandy saraptalyp, olardy sheshýdiń naqty mehanızmderi qarastyrylǵan.
Is-sharany qorytyndylaǵan «Nur Otan» partııasy Tóraǵasynyń birinshi orynbasary bul bastamanyń der kezinde qolǵa alynǵanyna toqtaldy. Endi partııa eldiń damýy jolyndaǵy ózekti máselelerdi udaıy basty nazarda ustap, olardy ońtaıly sheshý úshin osylaı bilikti sarapshylarmen birlesip jumys istemek.
– Búgin kóptegen utymdy oılar aıtyldy. Sonyń nátıjesinde máselelerdiń sebebi men saldaryn anyqtadyq. Joǵary ústemeli nesıelerdiń keleńsiz tustaryna nazar aýdardyq. Bul makroekonomıkalyq turaqtylyq, jekeshelendirý, shaǵyn jáne orta bızneske júıeli qoldaý kórsetý jáne nesıe alýshylar men jalpy bank júıesine qatysty máselelerdi qamtıdy. Otyrysta solardy sheshý joldaryn talqylap, ekonomıkamyz ben otandyq bıznesti qarjylandyrýdyń qoljetimdiligin qamtamasyz etý jaıyn pysyqtadyq, – dedi Máýlen Áshimbaev.
Joldybaı BAZAR,
«Egemen Qazaqstan»
