Jańaarqa aýdanynyń ortalyǵy Atasý kentiniń mádenıet úıinde qoǵam qaıratkeri, «Rýhanı jańǵyrý» jobalyq keńsesiniń Qaraǵandy oblysy boıynsha bas menedjeri Baqytqalı Musabekovtiń ádebı-tanymdyq keshi ótti. Qaraǵandy oblysynyń ishki saıasat basqarmasynyń, Azamattyq alıanstyń oblystyq bólimshesiniń jáne Jańaarqa aýdany ákimdiginiń qoldaýymen, «Rýhanı jańǵyrý» baǵdarlamasynyń aıasynda uıymdastyrylǵan shara «Qazaqtyń bı-sheshenderiniń murasy» taqyrybyna arnaldy.
Qazaqtyń aýyz ádebıetin qalyptastyrýǵa sheshendik ónerdiń ólsheýsiz úles qosqany sózsiz. О́skeleń urpaq el tarıhyndaǵy áıgili sheshender týraly, olardan qalǵan asyl murany bilýi tıis.
– Bizdiń maqsatymyz – halqymyzdyń aýzy dýaly bı-sheshenderinen qalǵan rýhanı murany urpaqtan urpaqqa jetkizý. Elbasy N.Nazarbaev óziniń qoǵamdyq sanany jańǵyrtý týraly baǵdarlamalyq maqalasynda basty shart – óz mádenıetimizdi, ózindik ulttyq kodymyzdy saqtap qalý ekenin atap aıtqan bolatyn. Osy maqsatta biz jer-jerde jastarmen kezdesýler uıymdastyryp, rýhanı máselelerge arnalǵan taqyryptardy qozǵap júrmiz, – deıdi «Rýhanı jańǵyrý» jobalyq keńsesiniń bas menedjeri Baqytqalı Musabekov.
Kezdesý barysynda ol tyńdaýshylarǵa qazaq halqynyń Maıqy bı men Aıaz bıden (HII-HIII ǵ.ǵ.) bastap, Tóle, Qazybek, Áıteke bılerge deıingi sheshendik óner mektebiniń tarıhynan áńgime shertti. Dáristiń barysynda 20 bı-sheshen, olardyń baı murasy týraly salıqaly áńgimeler aıtyldy.
Jas býyn úshin tárbıelik máni zor keshter buǵan deıin oblystyń Osakarov, Nura jáne Buqar jyraý aýdandarynda uıymdastyrylǵan bolatyn.
– Mundaı kezdesýler tek jastar úshin ǵana emes, barsha halyq úshin paıdaly. Búgin biz kóp maǵlumat aldyq, kóp nárseni bildik, – deıdi Jańaarqa aýdany ardagerler uıymynyń múshesi, zeınetker Shahızada Ábildın. – «Rýhanı jańǵyrý» sekildi baǵdarlamalar jastarymyzdyń el men jerdiń tarıhyn umytpaýy úshin óte qajet.
Tárbıelik mazmunǵa qurylǵan tanymdyq keshter odan ári jalǵasa beredi.
Qaırat ÁBILDA,
«Egemen Qazaqstan»
Qaraǵandy oblysy
