Sýretter respýblıkalyq arnaıy monıtorıngtik toptyń múshesi Qoblanbek Qojınniń feısbýktegi paraqshasynan alyndy
Senesiz be, senbeısiz be, Semeıdegi estý qabileti buzylǵan balalarǵa arnalǵan mektep-ınternattyń tárbıelenýshileri áli kúnge deıin, elimizdiń Táýelsizdik alǵanyna 30 jylǵa jýyqtasa da osyndaı shýmaqtardy oqyp, jattaýǵa májbúr bolyp keledi. Muny jaqynda oblysymyzǵa jumys saparymen kelgen Memlekettik qyzmet isteri jáne sybaılas jemqorlyqqa qarsy is-qımyl agenttiginiń janynan qurylǵan respýblıkalyq arnaıy monıtorıngtik toptyń músheleri anyqtady. «Meniń sózime senbessizder bálkim. Biraq shyndyǵy osy, balalarymyz «Otanymyz - KSRO, eldiń basty qalasy – Máskeý» dep jazylǵan oqýlyqpen oqyp jatyr», - degen-di respýblıkalyq arnaıy monıtorıngtik toptyń tóraıymy Aıgúl Solovıova О́skemende ótken jıynda.
Respýblıkalyq arnaıy monıtorıngtik toptyń múshesi Qoblanbek Qojın óziniń feısbýktegi paraqshasynda osy jáıtke qatysty ınternat tárbıelenýshileriniń ata-analardyń birinen shaǵym túskenin jazypty.
«Nasha Rodına – Sovetskıı Soıýz», «Vezde ı vo vsem ımıa Lenına s namı» - Semeıdegi estý qabileti buzylǵan balalarǵa arnalǵan ınternattyń balalarynyń oqıtyny – osy. Olar Sovet zamanyndaǵy, 1983 jyly shyqqan oqýlyqtarmen oqýǵa májbúr. О́ıtkeni, jańa oqýlyqtar joq. О́kinishke qaraı biz ázirge múmkindigi shekteýli balalarǵa ne qazaq, ne orys tilinde zaman talabyna saı birde-bir oqýlyq shyǵara almadyq», - dep pikirin bildiripti respýblıkalyq arnaıy monıtorıngtik toptyń múshesi Raqym Oshaqbaev óziniń feısbýktegi paraqshasynda.
Shynymen, oqýlyq jetpeı jatyr ma? Bul tarapta qandaı túıtkilder bar? Máseleniń anyq-qanyǵyna kóz jetkizeıik dep oblystyq bilim basqarmasyna habarlasqanymyzda ondaǵylar Bilim mınıstrliginiń 2017 jylǵy 27 shildedegi №352 buıryǵymen mekemedegi sabaqtar jańartylǵan bilim mazmunyna sáıkes oqytylatynyn, al 1987 jyly shyqqan «Razvıtıe rechı» oqýlyǵyn pedagogtar orys tili men oqý sabaǵyna qosymsha jattyǵý retinde paıdalanylatynyn jetkizdi.
«Mektepke deıingi daıarlyq tobyndaǵy sabaq jalpy bilim beretin mektepterdiń 1-10 synyptarǵa arnalǵan oqýlyqtary (2000-2016 jyldary shyqqan) negizinde júrgiziledi. 2018 jyldyń 1 qańtarynan 5-7 synyptarda orys tili, hımııa, bıologııa, algebra, geometrııa pánderi 2017 jyly shyqqan jalpy bilim beretin oqýlyqtarmen oqytylyp jatyr», - delingen oblystyq bilim basqarmasy basshysynyń mindetin atqarýshy Saırangúl Jumádilovanyń Bilim jáne ǵylym mınıstrliginiń jalpy jáne orta bilim departamentine bergen jaýabynda.
Túıin
Oblystyq bilim basqarmasy Bilim mınıstrligine bergen jaýabynda ıdeologııalyq turǵydan ábden eskirgen, búgingi zaman talabyna múlde sáıkes kelmeıtin oqýlyqtardyń aldaǵy ýaqytta ınternattyń oqý baǵdarlamasynan alynatyny-alynbaıtyny jaıynda sóz qozǵamapty. Álde «qosymsha retinde» odan ári oqytyla bere me? Degenmen de Bilim mınıstrligi atalǵan jáıtke jiti nazar aýdaryp, tıisti sheshim qabyldaıdy dep úmit etemiz. 
Azamat QASYM,
«Egemen Qazaqstan»
Shyǵys Qazaqstan oblysy
