Qostanaıǵa kelgennen keıin Baqytjan Saǵyntaev memlekettik-jekeshelik áriptestik aıasynda salynǵan «Qostanaı» jańa sporttyq–oıyn-saýyq keshenine bardy.
Keshen voleıbol, basketbol, shaǵyn fýtbol, gandbol sekildi sporttyq oıyndar boıynsha oqý-jattyǵý sabaqtaryn jáne respýblıkalyq jarystardy ótkizýge, sondaı-aq mádenı–buqaralyq is-sharalardy uıymdastyrýǵa arnalǵan.
Aralaý barysynda Premer-Mınıstrge Qostanaı oblysyndaǵy MJÁ jobalarynyń aǵymdaǵy jaǵdaıy týraly aqparat berildi. Qazirgi tańda óńirde 65 MJÁ jobasy iske asyrylý jáne josparlaý satysynda tur, 20 joba boıynsha kelisimsharttar jasalǵan, 39-y — konkýrs satysynda jáne 6 joba boıynsha qujattama daıyndalyp jatyr.
Elimizde jalpy ınvestısııalar somasy 782,6 mlrd teńgege 221 obekt boıynsha 215 MJÁ kelisimsharty jasalǵan. Barlyǵy jalpy somasy 2,5 trln teńge bolatyn 994 joba oryndalýdyń túrli satylarynda tur.
Qostanaı oblysyna jumys sapary aıasynda birqatar ónerkásiptik jáne áleýmettik nysandardy aralaý josparlanǵan, munda QR Premer-Mınıstri óńirde Prezıdenttiń «Qazaqstannyń úshinshi jańǵyrýy: jahandyq básekege qabilettilik», «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» joldaýlarynyń, «Bes áleýmettik bastamasynyń», sondaı-aq «Nurly Jer», Agroónerkásip keshenin damytý, «Sıfrlyq Qazaqstan», «Serpin» memlekettik jáne salalyq baǵdarlamalarynyń iske asyrylý qarqynymen tanysady.
Oblystyń aýyl sharýashylyǵy taýarlaryn óndirýshilerimen, stýdent jastarymen, bıznes ókilderimen jáne jumys aktıvimen kezdesý barysynda óńirdegi ózekti taqyryptarǵa qatysty máseleler talqylanady.
Oblys ortalyǵynda salynyp jatqan jańa ındýstrııalyq aımaq aýmaǵynda josparlanǵan ınvestısııalyq jobalarmen tanysý kózdelgen. Munda «Sıfrlyq Qazaqstan» baǵdarlamasynyń óńirde iske asyrylý qarqyny qarastyrylady. «Nurly Jer» baǵdarlamasy boıynsha salynyp jatqan «Altyn Arman» jańa turǵyn úı kesheniniń qurylysy barysymen tanysý josparlanyp otyr. Kásipkerlerge qyzmet kórsetý ortalyǵyna barý da sapar baǵdarlamasynda qarastyrylǵan.
Sonymen qatar, Qostanaıda oblys aktıvimen jáne bıznes ókilderimen kezdesý barysynda Kásipkerlik qyzmetti retteýdi jetildirý týraly Zań jáne Elbasynyń «Tórtinshi ónerkásiptik revolıýsııa jaǵdaıyndaǵy damýdyń jańa múmkindikteri» Joldaýyn iske asyrý barysy talqylanady.
Rýdnyı qalasynda B. Saǵyntaev «Sıfrlyq Qazaqstan» memlekettik baǵdarlamasynyń Jol kartasyn iske asyrý aıasynda «Aqyldy qus fabrıkasy» pılottyq jobasymen tanysady. Premer-Mınıstr sút jáne sút ónimderin óndiretin agrokásiporyndy aralaý barysynda óńirdiń agrarshylarymen kezdesip, olarmen AО́K damytý máselelerin talqylaıdy.
«SSTBО́B» AQ Sokolov kenishine barǵan kezde Baqytjan Saǵyntaevqa «Aqyldy kenish» jobasy tanystyrylady, munda taý-ken kólik keshenin avtomattandyrylǵan basqarý júıesi engizilýde. Kásiporynnyń oqytý ortalyǵynda Premer-Mınıstr óńirdiń stýdent jastarymen kezdesedi, onda jańa ekonomıkaǵa kadrlar daıarlaý, bilim berýdiń qoljetimdiligi men sapasyn arttyrý, stýdentterdiń úı-jaı jaǵdaılaryn jaqsartý máseleleri talqylanady.
Eske sala keteıik, Baqytjan Saǵyntaev Memleket basshysynyń tapsyrmasy boıynsha Qazaqstan óńirlerin jumys saparymen aralap júr. Buǵan deıin Qyzylorda, Ońtústik Qazaqstan, Atyraý oblystarynda jumys saparymen bolyp qaıtqan edi.
