Quramynda Astana qalasy ákimdiginiń túrli basqarmalary men qurylymdyq bólimsheleriniń ókilderi bar astanadan kelgen úlken delegasııa Atyraý oblysynda jumys saparymen bolýda. Astanalyq qonaqtardyń kelýi Astananyń aldaǵy 20 jyldyq mereıtoıyna oraılastyrylǵan.
Sapar aıasynda Atyraý oblysynyń ákimi Nurlan Noǵaevtyń qatysýymen óńiraralyq yntymaqtastyq bıznes kezdesýi ótti. О́ziniń quttyqtaý sózinde óńir basshysy jańa ınnovasııalyq ıdeıalardy, bıznes jobalardy jáne úlken qalalar men tutas elimizdiń áleýmettik-ekonomıkalyq damýyna yqpal etetin tehnıkalyq jańalyqtardy engizý boıynsha eki qalanyń arasynda tájirıbe almasýdyń mańyzdylyǵyn atap ótti.
- Búgingi kúni Astana Qazaqstannyń barlyq qalalaryna úlgi, bul – otanymyzdyń kelbeti, munda álemdik strategııalyq mindetterdi sheshý úshin kóptegen elderdiń birinshi basshylary keledi, aýqymdy is-sharalar ótkiziledi. Astanada medısınanyń, mádenıettiń, bilim men ǵylymnyń barlyq mańyzdy obektileri shoǵyrlanǵan. Sizderdiń oblysymyzǵa saparlaryńyzdyń mańyzy zor, biz óńirdi damytý boıynsha Astanadan barynsha kóp tájirıbe alýdy nıet etemiz, -dedi Atyraý oblysynyń ákimi qonaqtarǵa arnap sóılegen sózinde.
Astana qalasynyń ákimi Ermek Amanshaev basqarǵan astanalyq delegasııa ókilderiniń aıtýynsha, Atyraý oblysy qonaqtardyń úlken qyzǵýshylyǵyn týdyrýda, buǵan qosa óńiraralyq yntymaqtastyq birden birneshe baǵyt boıynsha – ónerkásip, aýyl sharýashylyǵy, kásipkerlik, týrızm, sıfrlandyrý, «Aqyldy qala» tehnologııasyn engizý jáne basqalary boıynsha jasalýy múmkin.
- Astanada 20 jylda iske asyrylǵan tabysty jobalardy Atyraý oblysynda da engizýge bolady. Biz olar týraly aıtqymyz, olardy iske asyrýdaǵy tájirıbemizben bóliskimiz keledi. Eki kúngi saparda Atyraý oblysynyń ákimdigi eki jobaǵa qyzyǵýshylyq tanytty dep aıtýǵa bolady– bul IT-qaýipsizdik salasyndaǵy jobalar, ıaǵnı búkil qala boıynsha kóshe beınebaqylaý kameralaryn engizý, bul qylmysty tómendetýge jáne ashylýyn arttyrýǵa, sondaı-aq JKO azaıtýǵa múmkindik beredi. Ekinshi joba – biz Astanada oıdaǵydaı engizgen «1000 jańa saýda oryndary» jobasy MJÁ-ke negizdelgen, aıta ketetini jobaǵa memleket bir tıyn da salǵan joq – saýda alańdaryna arnalǵan jer ýchaskelerin ınvestorlar usyndy, jobany iske asyrý Astanaǵa jańa ınvestısııalar tartty jáne jańa jumys oryndaryn qurdy, - dep áńgimeledi Astana qalasy ákimdiginiń ınvestısııalar jáne kásipkerlikti damytý basqarmasy basshysynyń mindetin atqarýshy Erlan Bekmýrzaev.
Memleket basshysynyń tapsyrmasy boıynsha elimizdiń barlyq óńirlerinde Astananyń 20 jyldyq mereıtoıyna oraı Astananyń mádenıet kúnderi ótýde. Astanalyq qonaqtardyń sapary eki bólimnen turady – mádenı jáne iskerlik. Astanalyq shyǵarmashylyq ujymdardyń konsertteri iskerlik toptardyń bıznes kezdesýlerimen, ónerkásiptik jáne óndiristik kásiporyndardy aralaýmen qatar ótýde. Uıymdastyrýshylardyń aıtýynsha, mundaı forýmdar óńiraralyq yntymaqtastyqqa jańa serpin bermek.
