Oblys ákimi kezdesý barysynda oblystaǵy jastar saıasatynyń iske asyrylýy týraly aıtyp berdi. Berdibek Saparbaev memleket barlyq qazaqstandyq jastardyń básekege qabilettilikterin arttyrýǵa jáne qoldaý baǵytyna barlyq múmkindikterdi jasaıtynyn atap ótti.
- Elbasynyń jaqynda kótergen bes áleýmettik bastamalarynyń biri osyǵan dálel bola alady. Elbasynyń bastamasy aıasynda joǵary oqý oryndaryna qoljetimdilikti arttyrýǵa 20 myń qosymsha granttar bólingen bolatyn. Taǵy bir bastama baspanamen qamtamasyz etý úshin ıpotekalyq qaryzdyń paıyzdyq stavkasyn edáýir tómendetýge jáne tóleý merzimin uzartýǵa baǵyttalady. Basqa bastamalar boıynsha Aqtóbe oblysynda joǵary jáne arnaýly oqý oryndarynyń stýdentteri úshin 8 jataqhana turǵyzý josparlanyp otyr, - dedi aımaq basshysy.
Ol aqtóbelik stýdentterge óńirdiń qoǵamdyq ómiri men «Jasyl el» sekildi memlekettik baǵdarlamalarǵa belsendi túrde qatysqandary úshin alǵys aıtty. Aıta keteıik, byltyrdan beri oblysymyzdaǵy stýdenttik otrıadtar jyl boıy jumys jasap keledi. Osy jyly 6 myńǵa jýyq jas eńbek etedi dep josparlanyp otyr.
- Memleket berip turǵan múmkindikti paıdalanyńyzdar. Jastardyń qashan da ıdeıasy kóp, solardy batyl júzege asyryńyzdar. Jastar isi jónindegi keńes, Jas ǵalymdar keńesi sol úshin quryldy. Buǵan qosa jastar sengish keledi. Bireýdiń aıtqanymen júrmes buryn «bul men úshin, halqym úshin, elim úshin qajet pe nemese paıdaly ma?» degen jalǵyz suraqty qoıyńyz. Qashan «ıá» dep jaýap berseńiz, sonda ǵana isti qolǵa alyńyz. Memleket árqashan qoldap, sizderge úlken úmit artady, sizderdiń mindetterińiz – sony aqtaý,-dedi Berdibek Saparbaev jas aqtóbelikterge qarata aıtqan sózinde.
Shara kezinde az qamtylǵan otbasydan shyqqan oqýda, ǵylymda, mádenıet pen sportta jetistikterimen erekshelengen 158 stýdentke oblys ákiminiń ataýly stıpendııasy tabystaldy. Joǵary oqý oryndaryndaǵy 122 stýdenttiń shákirtaqysy 160 000 teńgeni, oblys kolledjderinde oqyp jatqan 36 balanyń shákirtaqysy 80 000 teńgeni qurady.
Temir Qusaıyn,
“Egemen Qazaqstan”
