Búginde atalmysh nysan týrısterdi qabyldaýǵa ashyq. Tokamak QTM jobasy Astanada ótken «EKSPO-2017» kórmesiniń basty eksponaty boldy. Qazaqstandyq materıaltaný Tokamagy (QTM) elde ǵylym men tehnologııany damytý jáne ǵylymı-ınjenerlik salalarda joǵary bilikti kadrlaryn daıyndaý maqsatynda QR Prezıdenti Nursultan Nazarbaevtyń sheshimimen qurylǵan. Aldaǵy ýaqytta Qazaqstannyń balalary Kýrchatovtaǵy Ulttyq ıadrolyq ortalyq pen polıgon ótken ólkege kele alady. «Rýhanı jańǵyrý» baǵdarlamasy aıasynda eldegi bolashaq ǵalymdar men daryndy balalar qazaqstandyq materıaltaný Tokamagymen (QTM) tanysa alady.
-Bul týraly búgin «Nur Otan» partııasy fılıalynyń Saıası bıýro otyrysynda aıtyldy,-dedi ShQO baspasóz qyzmetiniń mamandary,-kún tártibine sáıkes «Rýhanı jańǵyrý» baǵdarlamasynyń júzege asý barysy týraly Kýrchatov qalasy men Zaısan jáne Ulan aýdandarynyń ákimderi baıandama jasady. Atalǵan barlyq óńirlerde buqarany rýhanı jańǵyrtý baǵytynda qyrýar is atqarylyp, mejege alynǵan mindetter legi jeterlik. Máselen, Ulan aýdanynyń ákimi jazda 1719 bala Shymkent – Saıram - Túrkistan – Tarazda, sondaı-aq, Katon-Qaraǵaı Ulttyq parkinde bolyp, eldegi kıeli jerlerdi aralamaq. Budan bólek Elorda – Astanaǵa aparý jospary bar. Al Kýrchatov qalasy «Jas fızık-2018» jazǵy mektebin uıymdastyryp otyr. Alaıda fılıal tóraǵasy - oblys ákimi Danıal Ahmetov qolda «gaýhar tas» - Tokamak (QTM) pen Ulttyq Iаdrolyq Ortalyq turǵanda Kýrchatov jobalar sheńberin keńeıtý qajettigin nyqtady.
– Álemde bar-joǵy eki Tokamak bar. Onyń bireýi qaıda? Kýrchatovta. 4 ıadrolyq reaktor men polıgon tur,-dedi oblys ákimi Danıal Ahmetov,-olaı bolsa, Shyǵys Qazaqstan men búkil elimizdiń balalary Tokamaktyń ne ekenin bilýi úshin ne isteý qajettigin qarastyraıyq. Olar Keńes Odaǵynan qalǵan muranyń qatygezdik qarýy ekenin jáne ony beıbitshilik jolda qoldanýdyń durystyǵyn túsinsin. Semeı ıadrolyq synaq polıgonyn jabý týraly Elbasy Nursultan Nazarbaev qabyldaǵan tarıhı sheshimniń mańyzdylyǵyn uǵynsyn. Osy rette arnaıy baǵdarlama daıyndaýdy tapsyramyn. Búkil Qazaqstannyń balalary kelip, Tokamak tájirıbesimen tanysýy qajet. Iаdrolyq ortalyqqa, polıgon ótken aımaqqa ekskýrsııaǵa baryp, búgingi kelisimder týraly aqparatpen qamtylsyn.
Raýshan NUǴMANBEKOVA,
SEMEI
