Sýretterdi túsirgen Erlan OMAR
Akademııaǵa EUÝ Jýrnalıstıka jáne saıasattaný fakýltetiniń stýdentteri men mektep oqýshylary qatysty. Sondaı-aq, áleýmettik jeli qoldanýshylary sabaqty onlaın tyńdaýǵa múmkindik aldy. Qatysýshylardyń qabiletin shyńdaý úshin dáristerdiń sońynda baspasóz ómirine arnalǵan kıno týyndylardy kórý, kásibı kitaptardy oqý jáne bekitilgen taqyryptar boıynsha zertteý maqalalaryn jazý sekildi tapsyrmalar berilip otyrdy.
Alǵashqy dáristi «Baspasózge kirispe» degen taqyryppen «Egemen Qazaqstan» gazetiniń basqarma tóraǵasy Darhan Qydyráli júrgizdi. Gazettiń tarıhy men búgingi qoǵamdaǵy róline toqtalǵan gazet basshysy baspasózdiń erekshelikteri týraly aıtty. Dáriskerler arasynda «Egemen Qazaqstan»-nyń qyzmetkerleri, bas redaktordyń orynbasary Ǵabıt Músirep taqyryp tańdaýdyń jaıyn baıandasa, Mádenıet jáne rýhanııat bóliminiń meńgerýshisi Talǵat Batyrhan suhbat alýdyń syryna toqtaldy. Sport bóliminiń meńgerýshisi Ermuhamed Máýlen sport taqyrybyn jazý ereksheligin túsindirse, SEO mamany Erbol Serikbaı onlaın baspasózdiń ınternettegi tanymaldyǵyn arttyrý qupııalarymen bólisti.
Maýsymdy qorytyndylaǵan gazet basshysy, «Egemen akademııasy» jobasynyń avtory Darhan Qydyráli dáriske belsene qatysyp, qyraǵylyǵymen kózge túsken stýdentterdi Akademııanyń sertıfıkatymen marapattady. «Egemen akademııasynyń» alǵashqy maýsymy oıdaǵydaı ótti. Qatysýshylar men medıaqaýym tarapynan úlken qoldaý taptyq. Árbir dáris pen taqyryp tyńǵylyqty talqylaýdan keıin anyqtalyp, stýdentterdiń tájirıbelik bilimin arttyrýǵa meılinshe jaǵdaı jasaýǵa tyrystyq. Joba budan ári de jalǵasa bermek», dedi D.Qydyráli.
Akademııa qatysýshylaryna Aqparat jáne kommýnıkasııalar mınıstri Dáýren Abaev «Sıfrlyq dáýirge qadam» taqyrybynda dáris oqysa, «QazAqparat» HAA bas dırektory Asqar Omarov aqparat agenttiginiń jumys tártibi týraly aıtty. Al fılologııa ǵylymdarynyń doktory, professor Ádil Ahmetov jýrnalısterdiń bir salaǵa mamandanýyna toqtaldy. Joba aıasynda bolashaq jýrnalıster «Egemen Qazaqstan» gazeti basylyp shyǵatyn «Ernur» medıa holdınginiń tıpografııasyna baryp, sehtyń jumysymen tanysty.
Jobaǵa qatysýshy EUÝ-dyń 1-kýrs stýdenti Abzal Orynbasarov «Egemen Akademııadan» úırengeni kóp ekenin aıtty. «Eń bastysy bolashaq jýrnalıstiń qandaı talaptarǵa saı bolýy qajet ekenin, jańalyqtardyń rettiligi men birizdiligin, taqyryp qoıý máselesin jan-jaqty talqyladyq. Al dáris oqyǵan aǵalarymyzdyń arasynda Aqparat jáne kommýnıkasııalar mınıstri Dəýren Abaevtyń áńgimesi qatty unady. Sıfrly kezeńge qadam basqan Qazaqstannyń baǵyt-baǵdaryn jan-jaqty túsindirip berdi», – dedi Abzal. «Akademııanyń arqasynda óz salama qatysty tyń aqparattarǵa qanyq boldym. «Egemen Qazaqstan»-nyń mundaı bastamasy jastardyń talantyn shyńdaı túsýine septigin tıgizetinine senimdimin. Ýnıversıtettegi bilimimizdi bas basylym ǵımaratyna kelip shyńdaı tústik», – dedi Mırajan Mahan.
