Kelissózder barysynda taraptar eki jaqty qatynastardyń qazirgi máseleleri jáne ózara yntymaqtastyqty damytýdyń aldaǵy josparlary jóninde áńgimelesti.
Memleket basshysy eki el arasyndaǵy baılanystardy nyǵaıtýdyń perspektıvti baǵyttaryna toqtalyp, Tatarstannyń áleýmettik-ekonomıkalyq damýynyń qarqyny joǵary ekenin atap ótti.
Nursultan Nazarbaev Qazaqstan men Tatarstan arasynda baýyrlastyq ári senimdi qarym-qatynas ornaǵanyn aıtty.
Qazaqstan Prezıdenti saýda-ekonomıkalyq jáne ınvestısııalyq yntymaqtastyqty jandandyrýdyń mańyzdylyǵyna nazar aýdardy.
– Sizderde IT-tehnologııalar salasy jaqsy damyp keledi. Bizdiń jastarymyz bul tájirıbeni zertteýi kerek. О́ńiraralyq yntymaqtastyq ta ilgerilep keledi. Eki jaqty saýda kólemi 700 mıllıon dollarǵa deıin ósti. Endi 1 mıllıard dollar kórsetkishine qol jetkizý kerek, – dedi Memleket basshysy.
Qazaqstan Prezıdenti mashına jasaý, qorǵanys jáne ǵarysh ónerkásibi salalarynda birlesken kásiporyndar qurý múmkindigi jóninde aıtty.
Nursultan Nazarbaev Tatarstannyń munaı ónimderin qaıta óńdeý salasyndaǵy tájirıbesin atap ótti.
– Barlyq memleketter balamaly energııa kózderin paıdalanýǵa kóshetin bolady. Biraq, taıaý 50 jyl ishinde munaı men gazǵa degen suranys ta saqtala beredi. Osy ýaqyt kezeńin paıdalanyp, biz óńdeý ónerkásibin qurýymyz kerek, – dedi Memleket basshysy.
Sonymen qatar, Qazaqstan Prezıdenti aýyl sharýashylyǵy salasyndaǵy yntymaqtastyq máselelerine nazar aýdardy.
– Aýyl sharýashylyǵy ǵylymyn damytý qajet. Reseıge et ónimderin de jetkize alamyz. Biz joǵary sapaly sıyr etin óndirý úshin shet elden asyl tuqymdy iri qara maldy alyp keldik, – dedi Nursultan Nazarbaev.
Memleket basshysy Qazaqstannyń kólik-tranzıt áleýetin damytýdyń jáne ınfraqurylymdyq baǵdarlamalardy júzege asyrýdyń nátıjelerine toqtaldy.
Qazaqstan Prezıdenti mádenı-gýmanıtarlyq yntymaqtastyq, sonyń ishinde bilim berý men medısına salasyndaǵy baılanystardy nyǵaıtý máselelerine nazar aýdardy.
– Qazan qalasynyń tabysty damyp kele jatqanyna qýanyshtymyn. Reseımen ózara jalpy qarym-qatynasymyz turǵysynan alǵanda Tatarstan jetekshi oryndardyń birinde. Biz eki halyqtyń ıgiligi úshin yntymaqtastyǵymyzdy jalǵastyra beretin bolamyz, – dedi Memleket basshysy.
Nursultan Nazarbaev R.Mınnıhanovtyń elderimiz arasyndaǵy dostyq qatynastardy, ózara túsinistik pen senimdi nyǵaıtýǵa qosqan úlesin atap ótip, Tatarstan Respýblıkasynyń Prezıdentin birinshi dárejeli «Dostyq» ordenimen marapattady.
Rýstam Mınnıhanov ekonomıkanyń túrli sektorlaryndaǵy tıimdi eki jaqty yntymaqtastyqtyń mańyzdylyǵyn atap ótti.
– Búginde Qazaqstan – bizdiń basty seriktesimiz. Tabysty birlesken jobalardy júzege asyrý tájirıbesi mańyzdy bolyp sanalady, – dedi Tatarstan Respýblıkasynyń Prezıdenti.
R.Mınnıhanov Qazaqstandaǵy bilim berý júıesiniń damý qarqynyn atap ótip, stýdenttermen almasý úderisin jandandyrýǵa daıyn ekenin jetkizdi.
Tatarstan Prezıdenti Astanadaǵy halyqaralyq «EKSPO-2017» kórmesin aralap kórgen kezde alǵan áseri jóninde aıtty.
– «EKSPO-2017» kórmesi joǵary deńgeıde ótti. Siz qýatty ári zamanýı alań saldyńyz. Osy keshenniń bazasynda «Astana» halyqaralyq qarjy ortalyǵynyń ashylýy aıtýly oqıǵa bolady dep oılaımyn. Biz keleshekte Qazaqstandaǵy áriptesterimizben «Astana» halyqaralyq qarjy ortalyǵy aıasynda jumys istegimiz keledi, – dedi R.Mınnıhanov.
