Alla qalasa, Tashkent jaqqa ótip, álemge áıgili telemunaranyń janyndaǵy Palaý ortalyǵynan dám tatyp qaıtsaq pa dep, keden beketinde kezek kútip turmyz. Kenet orta jastar shamasyndaǵy bir ala topyly aǵaıyn bizge jymııa qarap:
– Iá, Táshkenge qandaı sharýamen bara jatyrsyzdar? – dep surady. Ejelden kórshi otyrǵan el bolǵan soń, qazaq kórse – ózbektiń, ózbek kórse – qazaqtyń tili qyshyp qoıa beredi emes pe? Qysyltaıań jerde tursaq ta qaljyńdap:
– Atamnyń kebisin izdep kele jatyrmyn, – dedim ezý tartyp.
– Túsinbedim, – dep ol basyn shaıqady.
– E-e, onda tyńdańyz!
Sóıttim de: «Baıaǵyda-a, elýinshi jyldardyń basynda bizdiń aýyldyń bir top aqsaqaly Táshkenge ótip, ózbek tamyrlarynyń qorasyna attaryn baılap, al endi, Alaı bazarǵa qalaı baramyz dep tursa, ala topyly aǵaıyndardyń biri olarǵa tramvaımen jetip alýǵa keńes beripti», dep bastadym ótken ǵasyrda bolǵan bir oqıǵany esime alyp.
Sodan álgi kisiler aıaldamaǵa kelip, ózderi buryn-sońdy kórmegen «shaıtan arbany» kútedi ǵoı. Áne-mine degenshe ol da bir burylystan zyr etip shyǵady. Ol kezde eldiń kózi endi-endi úırene bastaǵan tramvaı óte kurmetti kólik bolsa kerek. Sondyqtan da ishine qyp-qyzyl «dorojka», ıakı bizdiń aýyldyń tilimen aıtqanda, kilemshe tósep qoıady eken.
Tramvaı aıaldamaǵa kelip toqtap, sart etip esik ashylǵan kezde aqsaqaldar abdyrap qalypty. Ásirese eń aldynda turǵan atamyz qyp-qyzyl kilemdi kórgende asyp-sasyp: «Áýp, bismillá!» dep kebisin sheshken de, másisheń kúıi ishke enip ketken ǵoı.
Sol sol-aq eken, onyń artyndaǵylar da túgel kebisterin aıaldamaǵa sheship qaldyryp, tap bir qonaqqa kelgendeı bir-bir oryndyqqa jaıǵasyp otyra qalady. Sóıtip... tramvaı áı-shaıǵa qaramaı júredi de ketedi. Al bizdiń atalarymyzdyń kebisi kóshedegi jurtty ań-tań qaldyryp, aıaldamada úıilip qala beredi...
Muny estigende ala topyly aǵaıynnyń eki ıyǵy selkildep, kózinen jas aqqansha kúlgeni bar emes pe.
– E-e, shú-ú gálóshterdi endi izdep keledi ekensiz dá,.. – dep rıza bolǵandaı meniń ıyǵymnan qaǵyp-qaǵyp qoıady. Osy sátte bizdiń kezegimiz de kelip jetken eken. Keden rásimine baılanysty bir-eki qujatty toltyryp, О́zbekstan jerine ótkenimizde álgi ala topyly aǵaıyn:
– Qosh keldińizder! – dedi oń qolyn keýdesine qoıyp. – Qane endi, júrińizder, balamnyń mashınasymen sizderdi palaýhanaǵa deıin jetkizip salaıyn!
Nurǵalı ORAZ,
«Egemen Qazaqstan»
