«2017 jyly konstıtýsııalyq reforma aıasynda mańyzdy jumystar atqaryldy. Reforma sheńberinde Úkimettiń Parlament aldynda esep berý jáne baqylaý tetikteri nyǵaıtyldy. Budan basqa, ótken jyly quqyq qorǵaý júıesine, jergilikti memlekettik basqarý jáne ózin-ózi basqarý salasyna jańǵyrtý júrgizildi. Quqyq qorǵaý júıesin jańǵyrtý qylmystyq prosesti gýmanızasııalaýǵa baǵyttalǵan. Mysaly, tergeýshiniń sheshimine qaramastan advokattyń tergeý sýdıasyna shaǵymdaný quqyǵy keńeıtildi. Sonymen qatar ákimshilik quqyq buzýshylyq salasyn gýmanızasııalaýǵa baǵyttalǵan zań qabyldandy. Mysaly, 157-den astam quqyq buzýshylyq boıynsha ákimshilik aıyppuldar somasy qysqartyldy, jazanyń 30 túri jumsartyldy, qysqartylǵan óndiris ınstıtýty keńeıtildi. Bul jeti kún ishinde aıyppuldyń jartysyn tóleý múmkindigin quqyq buzýshylyqtyń kóp quramyna qoldanýǵa múmkindik berdi. Sondaı-aq zańdy tulǵalarǵa qysqartylǵan óndiristi qoldanýǵa múmkindik ashty.
Ádilet mınıstrligi ótken jyly múliktik quqyqtardy qorǵaýdy kúsheıtý maqsatynda barlyq zańnamaǵa revızııa júrgizdi. Nətıjesinde birqatar usynystar ázirlendi. Mysaly, banktik qaryz sharttary boıynsha qaryz alýshylarǵa quqyqtyq qorǵaýdy qamtamasyz etý, memleket muqtajy úshin jerdi májbúrlep alyp qoıý barysynda teń syıaqy belgileý sharttaryn anyqtaý, múlikti tárkileý jaǵdaıynda menshik ıeleriniń quqyqtaryn qamtamasyz etý», dedi Ádilet mınıstri.
Sondaı-aq ol qazirgi ýaqytta sot-saraptamalyq qyzmetiniń tıimdiligin arttyrý men damytýǵa erekshe nazar aýdarylyp otyrǵanyn tilge tıek etti.
«О́tken jyly «Sot saraptama qyzmeti týraly» zań qabyldandy. Sot sarapshylarynyń palatasy qurylyp, onyń qyzmeti reglamentteldi. Búgingi kúni Respýblıkalyq palatada 105 jeke sot sarapshysy jumys isteıdi. Jeti aımaqtyq fılıal quryldy. Olar Astana jáne Almaty qalalarynda, Shyǵys Qazaqstan, Batys Qazaqstan, Qaraǵandy, Soltústik Qazaqstan, Túrkistan oblystarynda. О́tken jyldan bastap Qazaqstannyń sot-saraptama júıesin «Sot saraptamasy ortalyǵy» memlekettik kásiporny basqarady. Saraptamalyq fýnksııalardy bir vedomstvoǵa berý nátıjesinde qarjylyq resýrstar jınaqtaldy, biryńǵaı materıaldyq-tehnıkalyq baza quryldy. Barlyq saraptama túrlerine tarıfterdi anyqtaý josparlanýda. Bul bıýdjet qarajatyn barynsha uqypty qoldanýǵa jáne qajetsiz sot-saraptamalardyń sanyn qysqartýǵa ákeledi. Tutastaı alǵanda, Ádilet mınıstrligi qyzmettiń barlyq baǵyttary boıynsha belsendi jumys atqarýda dedi Marat Beketaev.
Raýan QAIDAR,
«Egemen Qazaqstan»
