Ulttyq kásipkerler palatasy qurylǵan kúnnen bastap iri jáne orta bıznestiń 22 myń ókili jarna tóleýshi bolyp sanalady. Qalǵan 980 myń múshe mindetti jarna tóleýden 5 jylǵa bosatylǵan bolatyn. Jarnadan negizinen shaǵyn kásipkerler, sharýa jáne fermerlik qojalyqtar bosatylyp otyr.
2015 jyly mindetti múshelik jarnalar boıynsha erejeler qaıta qaralyp, onyń kólemi birshama azaıtylǵanyn atap ótý kerek. Sol jyly qabyldanǵan ózgeristerge sáıkes, múmkindigi shekteýli jandarǵa jumys berip otyrǵan kásiporyndar da jarnadan tolyq bosatylǵan-dy. Nátıjesinde jalpy mindettemeler 2 ese tómendetildi.
«Atameken» QR UKP Basqarma tóraǵasynyń orynbasary Eldos Ramazanovtyń aıtýynsha, qazirgi tańda shaǵyn bızneske qosymsha qarjylyq aýyrtpalyq salýdyń qajettiligi joq. Bul jeńildik olardyń jumysyn birshama jeńildetýge tıis. Ulttyq palatanyń qyzmet barysynda osy tektes erekshelikterdiń bolǵany, baqylaýdyń ashyq ári túsinikti júrgizilýi bıýdjet qarjysyn únemdi ári tolymdy paıdalanýǵa múmkindik beredi.
Arnur ASQAR,
«Egemen Qazaqstan»
