Sharaǵa Qazaqstannyń eńbek sińirgen ártisi, Qazaq ulttyq óner ýnıversıtetiniń prorektory Turar Álipbaev, Qazaqstannyń eńbek sińirgen qaıratkeri, Qurmanǵazy atyndaǵy Qazaq memlekettik akademııalyq halyq aspaptary orkestriniń dırektory Nurqısa Dáýishev, kúıshi, Qazaqstannyń eńbek sińirgen ártisi, Qurmanǵazy atyndaǵy Qazaq ulttyq konservatorııasynyń professory Aıgúl Úlkenbaeva qatysyp, keshtiń baǵdarlamasy týrasynda baıandady.
«Dombyra ata babamyzdan qalǵan asyl qazyna. Ulttyq dombyra kúni merekesiniń óskeleń urpaqqa berer taǵylymy zor. Elbasy Nursultan Nazarbaevtyń Jarlyǵymen bekitilgen jańa meıram – Ulttyq dombyra kúni ulttyq ónerdi nasıhattap júrgender úshin úlken qoldaý. Qazaqtyń tól aspabyn jalpyulttyq deńgeıde nasıhattaý maqsatynda jasalǵan dúnıe úshin Elbasyna aıtar alǵysymyz sheksiz. Dombyranyń adam janyn tebirente alatyn qasıeti bar. Qazaqtyń kúıleri de, qońyr dombyrasy da babalarymyzdan qalǵan mura. Kúı óneri – qazaq halqynyń rýhanı baılyǵynyń, jan dúnıe baılyǵynyń eń bir kıeli, qasıetti túri», dedi A.Úlkenbaeva.
Memleket basshysy «Ulttyq dombyra kúnin bekitý týraly» 2018 jylǵy 12 maýsymdaǵy №699 Jarlyǵyna qol qoıdy. Elbasynyń osy Jarlyǵyn qoldaý maqsatynda Almatydan arnaıy Ahmet Jubanov jáne Kúlásh Baıseıitova atyndaǵy mamandandyrylǵan mektepterinen 500 daryndy dombyrashy kele jatqanyn atap ótken abzal. Sonymen qatar Qurmanǵazy atyndaǵy Qazaq memlekettik akademııalyq halyq aspaptary orkestriniń halyqaralyq, respýblıkalyq baıqaýlarynyń 90 laýreat dombyrashysy jáne N.Tilendıev atyndaǵy akademııalyq folklorly-etnografııalyq «Otyrar sazy» orkestrinen 70 adam arnaıy kelip qatyspaqshy. Jáne de Qurmanǵazy atyndaǵy Qazaq ulttyq konservatorııasynan 200 ustazdar men stýdetter, Qazaq ulttyq óner ýnıversıtetinen 500 jas ónerpaz dombyrashy qatysady. Shara 1 shilde kúni «Qazaq eli» monýmentiniń alańynda ótedi.
Raýan QAIDAR,
«Egemen Qazaqstan»
