Mádenıet jáne sport mınıstrliginiń qoldaýymen «Qazaqkonsert» memlekettik konserttik uıymy jáne Qazaqstan teatrlary assosıasııasy uıymdastyrǵan festıvalda elimizdiń úzdik teatr ujymdary: M.Áýezov atyndaǵy Qazaq memlekettik akademııalyq drama teatry, Ǵ.Músirepov atyndaǵy Qazaq memlekettik akademııalyq balalar men jasóspirimder teatry, Q.Qýanyshbaev atyndaǵy Memlekettik akademııalyq qazaq mýzykalyq drama teatry jáne respýblıkamyzdaǵy eń jas óner ordasy Astana Musical teatrlarynan bólek, Italııa, Germanııa, Polsha, Lıtva, Japonııa, Grýzııa, Qytaı, Reseı, Ulybrıtanııa, О́zbekstan jáne Qyrǵyzstan teatrlarynyń sahnanyń san túrli sıqyryn ıgergen shyǵarmashylyq izdenisi ónersúıer kópshiliktiń kóńiline berik bekip, ár kórermen úshin esten ketpes áserin uzaq ýaqyt aıtyp júrer aıtýly óner oqıǵasyna aınalǵany sózsiz.
KSRO jáne Qazaqstannyń halyq ártisi, Qazaqstannyń Eńbek Eri, belgili akter Asanáli Áshimov, Parıj qalasyndaǵy ulttyq ǵylymı-zertteý ortalyǵynyń dırektory, teatrtanýshy, professor Beatrıs Pıkon-Vallen, Lıtva orys drama teatrynyń bas rejısseri, Lıtva jáne KSRO memlekettik syılyǵynyń ıegeri, professor Ionas Vaıtkýs, rejısser, teatr synshysy, IVT, theatre-contemporain, mode&custumes buqaralyq aqparat quraldarynyń táýelsiz jýrnalısi, perfomer jáne mım óneri akteri Davıd Shavlıs – Asatıanı jáne Gabrıel Garsıa Markes atyndaǵy amerıkalyq teatr qorynyń kórkemdik jetekshisi, rejısser Davıd Papava Gýrdjı bastaǵan synshylar alqasynyń sarapshylyǵymen kásibı turǵyda baǵa berilgen festıvalda kórermen qaýym Djordjo Streler (Italııa), Robert Stýrýa (Grýzııa), Eımýntas Nıakroshıýs (Lıtva), Iýrıı Býtýsov (Reseı) syndy álemniń úzdik rejısserleriniń qoıylymdaryn tamashalaýǵa múmkindik aldy. Sondaı-aq Fransııa memleketinen shaqyrylǵan arnaıy qonaq Berlın, Venesııa jáne Kann kınofestıvaliniń «Oskar» jáne «Altyn palma butaǵy» syılyǵynyń ıegeri, belgili aktrısa Jıýlet Bınoshtyń óner ýnıversıteti stýdentteri men teatr jáne kıno akterlerine arnalǵan sheberlik synyby da festıval qatysýshylary men qonaqtaryna shyǵarmashylyq sony serpilis syılaǵany sózsiz. Áıgili aktrısanyń II Dúnıejúzilik «Astana» teatr festıvaliniń saltanatty jabylý rásimine tartý etken «Júrekten shyqqan syrly sóz» atty shyǵarmashylyq keshiniń de astanalyq ónersúıer qaýym kóńilinde jaǵymdy áserimen jattalǵany anyq.
Al bas qalanyń basty oqıǵasyna aınalǵan II Dúnıejúzilik «Astana» teatr festıvaline qatysýshy qonaqtar men teatr mamandarynyń Qazaqstan, onyń ishinde elordamyz – Astana jaıly pikiri de, áseri de san alýan. Festıvaldan, Qazaq elinen alǵan áserlerimen bólisken mamandar pikiri tómendegishe órbidi.
Jıýlet BINOSh,
Berlın, Venesııa jáne Kann kınofestıvaliniń «Oskar» jáne «Altyn palma butaǵy» syılyǵynyń ıegeri, belgili aktrısa:
– Tańsáride ushaqtan túse salǵannan meniń nazarymdy aýdarǵany – qalanyń sándi de sáýletti arhıtektýrasy boldy. Adamdary da sondaı aqjarqyn, kúle qarap jaýap beretin izetti, jaıdary jandar eken. Qazaq halqynyń qonaqjaılylyǵy da meni aıryqsha tánti etti.
Sahna tyńǵylyqty da jiti izdenisti, eńbekti talap etedi. Kúni keshe Kann festıvalinde top jarǵan jerlesterińiz, aktrısa Samal Eslıamovanyń jeńisi de úzdiksiz izdenistiń jemisi ekeni sózsiz. Bile bilseńizder, álemniń eń bedeldi kınofestıvalinde top jarǵan qazaq qyzynyń jeńisi – muqym qazaqtyń abyroıy, maqtanyshy. Bul Qazaqstandaǵy ónerdiń deńgeıin kórsetedi dep esepteımin.
Davıd ShAVLIS-ASATIANI,
rejısser, teatr synshysy, IVT, theatre-contemporain, mode&custumes buqaralyq aqparat quraldarynyń táýelsiz jýrnalısi, mım óneri akteri:
– Festıval maǵan óziniń baǵdarlamalyq mazmunynyń san alýandyǵymen, janrlyq, formalyq turǵydan bir-birine uqsamaıtyn santaraptylyǵymen aıryqsha unady. Teatr mamany retinde eń áýeli osy jaǵyn atap ótkim keledi. Ásirese Lıtva teatry ákelgen F.Kafkanyń «Ashtyq sheberi» jáne reseılik teatr qoıǵan A.Chehovtyń «Vanıa aǵaı» spektaklderi kóńilimde erekshe saqtaldy. Sol sekildi qazaqstandyq jas rejısser Farhat Moldaǵalıevtiń «Qaragóz» qoıylymyndaǵy izdenisin aıryqsha atap ótkim keledi. Astana Musical teatry usynǵan «Qyz Jibek» qoıylymy da ózindik ulttyq bederimen qyzyqtyrdy.
Nazerke JUMABAI,
«Egemen Qazaqstan»
