«Aýanyń temperatýrasy kóterilýine baılanysty halyq arasynda jiti ishek ınfeksııalarynyń, vırýstyń taralý qaýpi de artady. Osy mezgilde adamdardyń tamaqtanatyn obektilerinde, tamaq ónimderinde jáne sýda qozdyrǵyshtardyń saqtalýy men kóbeıýi úshin qolaıly jaǵdaı týady. Aýrý ınfeksııa juqtyrylǵan tamaq ónimderin, lastanǵan aýyz sýdy ishkende, naýqastarmen jáne bakterııa tasymaldaýshylarmen qarym-qatynasta bolǵan kezde las qol jáne turmystyq zattar arqyly juǵady. Úı jaǵdaılarynda tamaqtan ýlanýlardyń aldyn alý maqsatynda ónimderdiń sapasyn muqııat baqylaý kerek. Turmystyq jaǵdaıda adam kóbinese ýytty ınfeksııamen aýyrady. Eger ónim azdap buzyla bastasa, ýlanýdy týdyratyn bakterııalar paıda bolady. Infeksııa kóbinese qus ónimi (et, jumyrtqa), sút ónimderi, salattar, kremdi-kondıterlik ónimder jáne taǵy basqalar arqyly juǵady», deıdi J.Bekshın.
Onyń sózinshe, ónim buzyldy dep kúdiktengen jaǵdaıda ony paıdalanbaý kerek. Juqtyrý qaýpi osyǵan uqsas mıkroorganızmderdiń kóbeıýi úshin qolaıly orta ystyq – jaz mezgilinde aıtarlyqtaı artady. Ishek ınfeksııalarynyń aldyn alý jeke bas gıgıenasynyń erejelerin saqtaýǵa baılanysty. Ishek taıaqshalarynyń aldyn alý úshin; jeke bas gıgıenasyn saqtaý kerek. Tamaq ishý aldynda, dárethanadan keıin, daladan úıge oralǵannan keıin qoldy jaqsylap jýý, qaınaǵan nemese bótelkege quıylǵan sapasyna kepildik berilgen sýdy paıdalaný, tamaq ónimderin tasymaldaý jáne saqtaý úshin taza qaptamany (tamaq ónimderi úshin polıetılen, qaǵaz, konteıner) paıdalaný, tez buzylatyn ónimderdi (sút, qaımaq, jartylaı et ónimderi, daıyn et jáne balyq ónimi, salattar, kremi bar aspazdyq ónimder) satyp alǵan kúni nemese daıyndalǵan kúni paıdalaný, olardy salqyn jaǵdaıda da uzaq saqtamaý (6-12 saǵattan asyrmaý), 12 saǵattan astam ýaqyt saqtalǵan tamaqty paıdalaný aldynda jaqsylap jylytý, ruqsat etilmegen saýda oryndarynda – kezdeısoq adamdardan ónimderdi satyp almaý, tamaqty daıyndaýdyń temperatýralyq rejimin saqtaý (ásirese et, qus eti jáne teńiz ónimderi men jumyrtqany paıdalaný kezinde), daıyndalǵan tamaqty bólme temperatýrasynda 1 saǵattan asyrmaı ustaý nemese daıyndalǵan tamaqty dastarqanǵa qoıǵanǵa deıin ystyq kúıinde ( 60°S joǵary) ustaý, resmı ruqsat etilgen oryndarda shomylý, shomylý kezinde sýdy jutpaýǵa tyrysý kerek.
Sonymen qatar ol toı jáne taǵy basqa da jıyn ótkizerde aldymen toıhananyń ásemdigine emes, onyń ishki tazalyǵyna basa nazar aýdarý kerektigin alǵa tartty. «Biz toıǵa barsaq, eń birinshi zaldyń ádemiligine qaraımyz. Ashanaǵa barmaımyz. Ol jerde tamaqtardy qaıda saqtaıdy. Tońazytqyshy bar ma? Keıbir meıramhanalar ystyq sý bolmasa da toı jasaǵan. Mundaı jaǵdaılar da kezdesti. Árıne osyndaı máselelerdi birinshi qaraý kerek. Sonymen qatar qyzmetshiler túgel me, daıashylary tolyq pa, aspazshynyń arnaýly kıimi bar ma. Osy sııaqty mańyzdy máselelerge mán bergen abzal», dedi ol.
Raýan QAIDAR,
«Egemen Qazaqstan»
