Forýmnyń negizgi maqsaty – Qazaqstan agroónerkásibi salasynda halyqaralyq yntymaqtastyqty keńeıtý. Forýmdy ótkizýge bastamashylyq jasaǵan «Qazaq eli» halyqtyq palatasy basqarmasynyń tóraǵasy Baqytbek Nuǵyman óziniń quttyqtaý sózinde elimizdiń agrarlyq sektory – ekonomıkamyzdyń qozǵaýshy kúshi bolyp tabylatyndyǵyn atap kórsetti. Osyǵan baılanysty, Elbasymyz qazirgi zamanaýı jetistikterdi qoldana otyryp, aldaǵy bes jylda agroónerkásip kesheniniń ónimdiligin eki jarym ese arttyrý maqsatyn alǵa qoıyp otyr. Nátıjesinde aýyl sharýashylyǵy salasyndaǵy kásipkerliktiń damýy arqyly elimizdiń damyǵan otyz el qataryna qosylýyna úlken jol ashylmaq.
«Bizdiń «Qazaq eli» halyqtyq palatasynyń basty maqsatynyń biri agroónerkásip kesheniniń damýyna járdem jasaý. Halqymyzdyń basty baılyǵynyń biri, ol – bizdiń jerimiz. Bizdiń jerimizdeı tabıǵı baılyǵy mol jerge ıe elimizdiń álemniń damyǵan memleketterindegideı ómir súrý deńgeıine jeterine senimimiz mol. Sol sebepti óz jerimizde ónip shyqqan taza azyq-túlikti tutynyp, úlken óndiris keshenderin turǵyzsaq, ál-aýqaty joǵary, deni saý urpaq tárbıeleıtinimizge senim zor. Osyǵan oraı biz densaýlyq salasyn damytýǵa da qolǵabys tıgizýdi ózimizge maqsat etip aldyq. Taza ónim – densaýlyq kepili. Al deni saý, bilimdi, básekege qabiletti urpaq tárbıelesek, bul bizdiń jarqyn bolashaǵymyzǵa aınalary anyq», dedi B.Nuǵyman. Ol densaýlyq saqtaý salasyndaǵy sheteldik ozyq tájirıbelerge mán berýmen qatar halyq medısınasynyń tıimdi tustaryn da jetildire berýdiń qajet ekendigin atap ótti.
«Qazaq eli» halyqtyq palatasy, «Jibek joly» saýda palatasy sekildi qoǵamdyq uıymdardyń qoldaýymen ótkizilip otyrǵan halyqaralyq agroforým qazaq dalasynyń tóri – arý Astananyń 20 jyldyǵymen tuspa-tus keldi. Sondyqtan munda osy ýaqyt aralyǵynda Astananyń tórtkúl dúnıe kóz tikken kóptegen álemdik jáne halyqaralyq forýmdardyń mekenine aınalǵany da aıtyldy. Jer-jahanǵa Astanadan aqjoltaı aqparat taratylyp, bas qalamyzdyń mártebesi men mereıi talaı asqaqtaǵany ras. Qalaı bolǵanda da, osy ýaqyt ólsheminiń ishinde Qazaqstan halqynyń eren eńbeginiń nátıjesinde Azııanyń osynaý bóliginde saltanatty jańa qalanyń boı kótergendigin shetelderden kelgen qonaqtar tańdaı qaǵa tamsana aıtyp jatty.
Forýmda L.N.Gýmılov atyndaǵy EUÝ-diń professory J.Taıbazarov pen Ulttyq banktiń tuńǵysh tóraǵasy Ǵalym Baınazarov baıandama jasap, kelýshilerge Qazaqstan agroónerkásip kesheniniń damý dınamıkasy jáne oǵan qarajat salǵan sheteldik ınvestorlardy qoldaýdyń zańdy tetikterimen tanystyrdy.
Basqosý barysynda Ekonomıkalyq yntymaqtastyqtyń eýrazııalyq uıymy Bas hatshysynyń orynbasary Dje Jan (QHR), «Invictus Trading» dırektorlar keńesiniń tóraǵasy Krıs Iohansen, «Nýro Vorarlber» kompanııasynyń qyzmetkeri Olga Henıkshnabl jáne basqalary sóz sóılep, óz oılarymen bólisti.
Basqosý barysynda birlesken óndiristi ınvestısııalaýdaǵy, qazirgi saýda júıesindegi, Qazaqstannyń barlyq aýmaǵyndaǵy agrarlyq sektor damýyna baǵyttalǵan kapıtaldyń erkin aınalymyndaǵy yntymaqtastyqtyń perspektıvalary qaraldy.
Forým jumysyna Eýropa men Azııa qurlyqtarynyń (Norvegııa, AQSh, Italııa, Nıderland, Aýstrııa, Qytaı jáne basqalary) ózderin Qazaqstannyń agrarlyq sektoryna qarjylyq qoldaýshy retinde kórsetip júrgen jıyrmadan astam iri kompanııalardyń, elimizdiń barlyq oblystarynyń agroónerkásip kesheniniń orta jáne shaǵyn bıznes ókilderi qatysty. Sondaı-aq elimizdiń memleket jáne ǵylym qaıratkerleri, halyqaralyq uıymdardyń, qarjy ınstıtýttarynyń, BAQ pen memlekettik emes uıymdardyń ókilderi de shaqyrylyp, pikirlerin ortaǵa saldy.
Sharanyń sońynda forýmnyń usynysy qabyldanyp, agroforýmǵa qatysýshy kásipkerlermen birlesken memorandýmǵa qol qoıyldy.
Suńǵat ÁLIPBAI,
«Egemen Qazaqstan»
