Iá, biz aıtyp otyrǵan Maqtaral aýdany Jetisaı qalasyndaǵy Baýyrjan Momyshuly atyndaǵy №6 mektep-gımnazııa túlekteriniń bıyl 50-i «Altyn belgi», 17-si «Úzdik attestat» ıegeri atanyp otyr. 2017-2018 oqý jylynda 70 oqýshy mektep bitirdi, endi qansha paıyzy «Altyn belgi» alyp, «úzdik» atanǵanyn esepteı berińiz. Atalmysh bilim oshaǵy ár jyly básekege qabiletti urpaq daıarlap, bilim básekesinde respýblıkalyq deńgeıde de joǵary orynnan kórinip keledi.
Mektep-gımnazııanyń dırektory, «Qurmet» ordeniniń ıegeri О́mirhan Qozybaqtyń aıtýynsha, ótken jyly da mektep 40 «Altyn belgi», 25 «Úzdik attestat» ıegerlerin shyǵaryp, joǵary jetistikke jetken. «Oqýshylarymyzdyń bilimge degen ynta-talaby joǵary. Qorytyndy attestattaý emtıhandaryna úlken jaýapkershilikte daıarlyqpen kelip, óte jaqsy tapsyrdy. UBT kezinde ár bala taǵdyryna alańdaımyz. Degenmen synnan súrinbeı jaqsy ball jınaıtyndaryna senimdi bolamyz. О́ıtkeni 11-synyp oqýshylaryn jyl boıynda UBT-ǵa daıarlaý maqsatynda 94 test alynyp, orta kórsetkishimiz 120 baldy quraǵan bolatyn. Túlekterimiz osy deńgeıdi dáleldep te keledi», – deıdi О́.Qozybaq.
Rasynda da aýdandaǵy úzdik bilim uıasy sanalatyn B. Momyshuly mektep-gımnazııasynyń túlekteri ortasha 119,8 bal kórsetkishimen oblysta da úzdikter qatarynan kórindi. Jalpy, Maqtaral aýdanynda Ulttyq biryńǵaı testileý qorytyndysy boıynsha ortasha kórsetkish 75,8 ball boldy. Bul byltyrǵy jylmen salystyrǵanda 5,3 balǵa joǵary. 518 túlek 100 jáne odan joǵary ball jınasa, «Daryn» mektep-ınternatynyń oqýshysy Meıirbek Qazybek 138 balmen kósh bastady. Aıta keteıik, bıyl Maqtaral aýdanynda 4524 túlek mektep bitirse, sonyń 2807-i ulttyq biryńǵaı test tapsyrýǵa ótinish bergen bolatyn. О́tken jyly aýdanda 189 «Altyn belgi» ıegeri shyqsa, bıyl 211 oqýshy «Altyn belgi» ıegeri atanyp otyr. Sondaı-aq 2017 jyly 84 oqýshy 120 jáne odan joǵary ball jınasa, bıyl 187 oqýshy 120 baldan joǵary kórsetkishke ıe bolǵan.
Ǵalymjan ELShIBAI,
«Egemen Qazaqstan»
Túrkistan oblysy
