Úsh kúndik festıvaldyń aıta qalarlyqtaı oqıǵalarynyń biri – áıgili shved saıahatshysy, Halyqaralyq tabıǵatty qorǵaý odaǵy jáne Snow Leopard Foundation qorynyń elshisi Iohan Nılsonnyń Almatyǵa kelýi edi.
Jahan kezgendi, adam aıaǵy baspaǵan mekenderdi kórýdi armandaıtyndar úshin Iohan Nılsonnyń esimi tanys. Búkil ómirinde álemniń 169 elin aralap, 70 birdeı bıiktikti baǵyndyrǵan saıahatshy osy kúnge deıin 52 ekspedısııaǵa qatysyp úlgergen.
Qaıyqqa minip alyp, aspanda qalyqtaýdy armandaǵan Iohannyń bul qııaly da júzege asqan. Segiz jyldan astam ýaqytyn álemniń ár shalǵaıynda, shatyr astynda ótkizgen jıhankez bylaıǵy jurtty qorshaǵan ortany qorǵaýǵa, taý-tastyń arasyn qoqysqa toltyrmaýǵa shaqyryp júrgen adam.
Tipti adam jegishterdiń arasynan da din-aman shyqqan saıahatshy óz ómiri týraly tynbaı áńgimeleýge daıar. Ol Shymbulaqtyń keleshegi bar dep esepteıdi. О́ıtkeni Shymbulaq qalanyń týra túbinde tur. Jáne Almatyǵa kóptegen memleketterden tikeleı ushyp kelýge bolady. Belgili shved saıahatshysy ýaqyt óte kele Qazaqstan shynynda da tabysty týrıstik el bola alady dep boljaıdy.
Talaı ań-qusty qutqaryp, shıpasyn izdep, saýap jınap júrgen saıahatshy qazaqstandyq BAQ ókilderimen ótken basqosýda, ókinishke qaraı ár elde ushyrasatyn qorshaǵan tabıǵatqa qatysty máselelerdi qozǵady. Úsh jyl boıy Nılson men onyń áriptesteri jalpy sany 250 adamnyń qatysýymen arnaıy ekspedısııalar uıymdastyrǵan. Ekspedısııa músheleri álemniń eń bıik núktesi Everestiń ózinen 15 tonna qoqysty tómenge túsirgen. Iohan Nılsonyń aıtýynsha, osynshama qaldyqty laqtyratyn sheteldik týrıster emes, jergilikti turǵyndar. «Menińshe, adamdar ózderi turatyn aımaqtyń sulýlyǵyn sezbeıdi, qadirin bilmeıdi. Sondyqtan ınfraqurylymdy damytýdy ǵana qolǵa almaı, jergilikti halyqqa aqparttyq jumystardy júrgizý abzal jáne tastalǵan qoqys úshin aıyppul salý júıesin engizýdi júzege asyrý oryndy, tıisinshe, turǵyndar qoqysty tastaý aldynda oılanady, biregeı taý júıesi men qorshaǵan ortany tazalyqta ustaýǵa nıettenedi», – dedi Iohan Nılson.
Aınash ESALI,
«Egemen Qazaqstan»
ALMATY
