«Báıterek» UBH» AQ-nyń enshiles uıymy «Qazaqstan Ipotekalyq Kompanııasy» IU» AQ saladaǵy negizgi operator retinde iske asqan jumystar barysynan habar etip, 35 myń qazaqstandyqtyń baspanamen qamtamasyz etilgendigin atap ótti. «Qazaqstan Ipotekalyq Kompanııasy» IU» AQ Basqarma tóraǵasynyń orynbasary A.Akchýrınniń, «Qazaqstan Ipotekalyq Kompanııasy» IU» AQ Basqarýshy dırektory E.Syzdyqovtyń málimdeýinshe, «Nurly jer» baǵdarlamasy aıasynda («Qoljetimdi baspana - 2020», О́ńirlerdi damytýdyń 2020 jylǵa deıingi baǵdarlamasy jáne «Nurly jol» memlekettik ınfraqurylymdyq damytý baǵdarlamasy – «Nurly jer» baǵdarlamasyna biriktirildi) tańda satyp alý múmkindigimen jalǵa beriletin turǵyn úıdiń 1 mıllıonnan astam sharshy metrin paıdalanýǵa berilgen (jospar boıynsha 2018 jyldyń sońyna deıin 972 myń sh.m.). QIK búginde respýblıkanyń qurylys salasyn damytýdyń draıverine aınalǵan. Qurylys, ınjenerlik jáne árleý jumystary kezinde otandyq óndirýshiler ónimderi paıdalanylyp, 30 myńnan astam jańa jumys oryndary qurylǵan.
«Satyp alý quqyǵymen jalǵa beriletin turǵyn úı» baǵdarlamasy kóp balaly jáne tolyq emes otbasylarǵa, múgedek balalary bar otbasylarǵa jáne jetim balalardy, ata-anasynyń qamqorlyǵynsyz qalǵan balalardy tárbıelep otyrǵan otbasylarǵa, oralmandarǵa, 1-shi jáne 2-shi toptardaǵy múgedekterge, sondaı-aq memlekettik qyzmetkerlerge, áskerı qyzmetkerlerge, arnaıy memlekettik organdardyń qyzmetkerlerine, bıýdjettik uıymdardyń jumyskerlerine arnalady.
Baǵdarlamany iske asyrý jyldarynda jergilikti atqarýshy organdarmen tyǵyz yntymaqtastyqta Qazaqstan boıynsha 17 myńnan astam kezekte turǵan adamdar turǵyn úımen qamtamasyz etilgen. Bul kórsetkish otbasy múshelerin qosa alǵanda 50 myńnan astam adam baspanaly bolǵan. Kompanııanyń óndiristik josparlaryna sáıkes jyl sońyna deıin Qostanaı, Qaraǵandy, О́skemen jáne Oral qalalarynda 41 myń sharshy metrden astam turǵyn úı (703 páter) paıdalanýǵa beriledi.
Baǵdarlama bastapqy jarnany talap etpeıdi, satyp alý quqyǵymen jaldaý merzimi 20 jylǵa deıin. Jaldaý merzimi ótkennen keıin turǵyn úı jalǵa alýshynyń menshigine ótedi. Merziminen buryn satyp alý múmkindigi de qarastyrylǵan. 1 sharshy metrdi jaldaý quny Astana jáne Almaty qalalarynda 1120 teńge bolsa, óńirlerde 924 teńgeni qurady.
«Nurly jer» memlekettik turǵyn úı qurylysy baǵdarlamasy aıasynda «satyp alý quqyǵy men jalǵa beriletin turǵyn úı» baǵyty 2018 jyly iske asyrý aıaqtalady.
Elvıra Serikqyzy,
«Egemen Qazaqstan»
ALMATY
