– Astyqtyń ýaqtyly jınalýyn qamtamasyz etý qajet. Bizge aýa-raıy qolaıly bolyp tur. Egin orý ýaqytynyń sozylýy edáýir shyǵyn keltiretindikten, bul jumystardy jedeldetý kerek, – dedi Elbasy.
Nursultan Nazarbaevqa Aqmola oblysynyń áleýmettik-ekonomıkalyq damýynyń negizgi nátıjeleri men aýyl sharýashylyǵy salasynyń perspektıvalary jóninde málimdeldi.
Qazaqstan Prezıdenti agroónerkásip keshenine ozyq ǵylymı jetistikterdi jáne sıfrlandyrý úderisin engizýdiń mańyzdylyǵyn atap ótti.
– Shortandy aýdanynda tájirıbe retinde alqaptardyń elektrondy kartasyn engizý, egistik jaǵdaıyna spýtnıktik monıtorıng jasaý, tuqymdy retimen egip, tyńaıtqyshtardy dıfferensıaldy túrde sebý jumystary júzege asyrylýda. Bul eńbek ónimdiligin 2 ese arttyrýǵa, sondaı-aq shyǵyndy 20 paıyzǵa tómendete otyryp, astyq ónimdiligin 5 sentnerden asyrýǵa múmkindik beredi, – dedi Memleket basshysy.
Sonymen qatar, Elbasy Qazaqstanda jáne shetelde qurastyrylatyn tehnıkalardyń úlgileri qoıylǵan aýyl sharýashylyǵy mashınalarynyń kórmesin aralap kórdi.
