Segiz aıǵa sozylǵan sergeldeń

Bul daýdyń bastalǵanyna bir jylǵa jýyq ýaqyt bolyp qalypty. Biraq núktesi áli qoıylmaǵan. Ál-ázir sol núkte qoıylmaıtyn da sııaqty. О́ıtkeni aryz ıesi «ne bel ketedi, ne belbeýi úziledi» degen prısıpten aınymaq emes. Ol, M.Jańabaev ózin jalańnyń qurbany sezinedi. Onyń aıtýynsha, quqyq qorǵaý salasynda 10 jyl minsiz qyzmet atqarǵan aǵa leıtenant bir kúnde jumyssyz qalǵan. Sodan beri aryz aıtyp, shaǵym jazbaǵan jeri joq. Biraq onyń janaıqaıyn tyńdap jatqan jan adam tabylmapty. Eń sońǵy úmiti retinde «Egemenge» jazǵan aryzy tómendegideı. «Qymyz iship, qyzmetten qýyldym» «Men Ońtústik Qazaqstan oblysy mamandandyrylǵan kúzet basqarmasy memlekettik mekemesinde 2001 jyldan 2010 jyldyń naýryzyna deıin minsiz qyzmet atqardym. Sol 2010 jyldyń 8-nen 9-shy juldyzyna qaraǵan túni jazyqsyz jalaǵa ushyradym. Sol túni men Ońtústik Qazaqstan oblystyq ákimshiliginiń ǵımaratyndaǵy bekette kezekshilikte turǵan edim. Tań aldynda tekserýdi syltaý etip, mamandandyrylǵan kúzet basqarmasy kadrlarmen jumys bóliminiń bastyǵy J.Pirtaev keldi. Ol jaı kelgen joq, qyzmet babynda turǵan bizge tıisip, qoqan loqy jasaı keldi. Onyń aıtqany «araq iship alypsyńdar» degen jala sózi boldy. Nátıjesinde meni norkologııalyq dıspanserge kúshtep alyp baryp, saraptamadan ótkizdi. Bul saraptama boıynsha «jeńil dárejedegi masańdyǵy» anyqtalǵan degen qorytyndy shyǵarypty. Nátıjesinde osy qorytyndyǵa súıenip, basshylyq meni qyzmetten bosatty. «Jeńil dárejedegi masańdyqtyń» anyqtalýy meniń sol kezde qymyz ishkendigimniń sebebinen dep oılaımyn. Sondyqtan norkologııalyq saraptamanyń qorytyndysyna narazylyq keltirip, Shymken qalasy Eńbekshi aýdandyq sotyna shaǵym túsirdim. 2010 jylǵy sheshimimen Eńbekshi aýdandyq soty norkologııalyq saraptama qorytyndysyn jaramsyz dep tapty. Osy sottyń sheshimi negizinde meni jumysqa qaıta ornalastyrý týraly Ál-Farabı aýdandyq sotyna shaǵymdandym. Meniń talap-aryzym qaralyp jatqan kezde kúzet basqarmasy kadrlarmen jumys bóliminiń bastyǵy J.Pirtaevtyń atynan jeke aıyptaý shaǵymy túskenine baılanysty sýdıa O.Qadirsizovtiń hatshysynan sotqa shaqyrý qaǵazyn aldym. Alaıda, sot tergeý barysynda J.Pirtaevtyń maǵanqoıǵan talaby qanaǵattandyrylǵan joq. Men kerisinshe jala japqany úshin J.Pirtaevty qylmystyq jaýapkershilikke tartý týraly Ishki ister departamentine aryz berdim. Biraq atalǵan quzyrly organ onyń ústinen qylmystyq is qozǵaýdan bas tartty. Mine, kúni búginge deıin aryz jazbaǵan jerim, shaǵym aıtyp barmaǵan esigim qalmady. Biraq eshqandaı nátıje joq. Endigi úmitim «Egemen Qazaqstanda» ǵana. M.Jańabaev». On jylǵa jaqyn Ishki ister qyzmetinde eńbek etken, búgingi kúni úsh balasyn asyrý úshin kez kelgen jumysty istep júrgen M.Jańabaev óziniń qyzmetten qýýylýyna mamandandyrylǵan kúzet basqarmasy memlekettik mekemesiniń kadrmen jumys bóliminiń bastyǵy J.Pirtaevty kinalaıdy. «Jańabaevtiki jala» «Jańabaev Maqsat Qazaqstan Respýblıkasy Úkimetiniń 1996 jylǵy 27 jeltoqsandaǵy №1644 qaýlysymen bekitilgen Qazaqstan Respýblıkasy Ishki ister organdarynyń qatardaǵy jáne basshy quramdaǵy adamdarynyń qyzmet ótkerýi týraly erejege sáıkes 91-bap «K» tarmaqshasymen (áskerı qyzmettik tártibin óreskel buzǵany úshin) Ońtústik Qazaqstan oblysy mamandandyrylǵan kúzet basqarmasy memlekettik mekemesi bastyǵynyń 2010 jylǵy 15 naýryzdaǵy №34 buıryǵymen qyzmetten bosatyldy. Sebebi, polısııa aǵa leıtenanty Jańabaev óziniń qyzmettik mindetterine salaq qarap, ózi tártip saqshysy bola tura kúsheıtilgen qyzmet ýaqytynda qyzmet atqarý kezinde spırttik ishimdik ishken. 2010 jyldyń 8 naýryzynda men basqarma boıynsha tekserýshi bolyp kezekshilikke tústim. Kezekshilik barysynda kezekshi bóliminiń kezekshisi polısııa aǵa leıtenanty B.Kólbaev rasııa arqyly Oblystyq ákimshilik beketin muqııat tekserýdi surady. О́ıtkeni, kezekshilikke túsken qyzmetkerler eki saǵat kóleminde baılanysqa shyqpaǵan. Sondyqtan men beketti tańǵy saǵat altylardyń kezinde tekserip barǵanymda kezekshilikte turǵan polısııa aǵa leıtenanty M.Jańabaev, aımaqtyq muraǵat beketinde turǵan polısııa aǵa serjanty Sh.Shekerbekovtiń spırttik ishimdik ishkenderin baıqadym. Sol jerden polısııa aǵa leıtenanty T.Ospanqulovty da izdep taýyp aldyq. Onyń da aýzynan araq ıisi shyǵyp turdy. Men tez arada dabyl belgisin berip, sol kúngi polısııa batalonynyń tekserýshisi polısııa leıtenanty H.Nuralıevti, vzvod komandıri polısııa maıory O.Syraılovty, batalon komandıriniń mindetin atqarýshy polısııa maıory B.Maqulbekovti jáne jedel den qoıý tobyn shaqyrttym. Solardyń kómegimen úsh kezekshi polısııa qyzmetkerin norkologııalyq dıspanserge jiberdik. Sol jyldyń 9 naýryzy kúni oblystyq narkologııalyq dıspanserdiń bergen medısınalyq kýálandyrýynda M.Jańabaevqa «jeńil» dárejeli, Sh.Shekerbekovke «orta» dárejeli, T.Ospanqulovqa «orta» dárejeli alkogoldik masańdyq kórsetilgen. Bolǵan jaǵdaı boıynsha qyzmettik tekserý júrgizilip, polısııa batalonynyń jeke quramynyń shuǵyl jınalysynda qaralyp, M.Jańabaev, T.Ospanqulov, Sh.Shekerbekov qyzmetten bosatyldy. M.Jańabaev qyzmetke qaıt ornalasý maqsatynda Shymkent qalasy Ál-Farabı aýdandyq sotyna aryzdandy. 2010 jyldyń 15 qazanynda shyǵarylǵan sot sheshimi onyń aryzyn qanaǵattandyrýsyz qaldyrdy. Odan ári M.Jańabaev Ońtústik Qazaqstan oblystyq sotynyń apellıasııalyq jáne kassasııalyq sot alqalaryna shaǵymdandy. Onyń bul shaǵymdary da qanaǵattandyrýsyz qaldyryldy. Degenmen, aryz ıesi kúni búginge deıin ártúrli oryndarǵa shaǵymdanýyn toqtatpaı keledi. Máseleni sot sheshedi deıtin bolsaq, bul organdar ádiletti sheshimderin áldeqashan shyǵaryp qoıǵan. Sonda aryz ıesi endi qandaı ádildik izdep júrgenin óz basym túsine almadym. Jamalbek Pirtaev». Núktesi qoıylmaǵan daý «Biriktirip aıtsa, bıdiki jón, qurastyryp aıtsa, quldiki jón» deıdi halyq máteli. Jańabaevty tyńdasań, «jalanyń qurbanymyn» dese, Pirtaevty tyńdasań, «Jańabaevtiki jala» deıdi. Osy jyldyń naýryz aıynda bastalǵan daýdyń aıaǵy kóriner emes. Dál osy máselege baılanysty talaı ret jınalys ótken, birneshe márte sot bolǵan. Biraq bul sharalardyń qaı-qaısysy da daýdy odan ári órshitpese, toqtatýǵa shamasy kelmepti. Sonda bul daý qashanǵa deıin sozylmaq, bul daýǵa qashan núkte qoıylady. Bálkim bul suraqtarǵa oblystyq Ishki ister departamentiniń basshylyǵy jaýap berer... Sharafaddın ÁMIROV