– Mundaı kórmelerge qatysý – árbir ónerli jas úshin ózindik emtıhan ispetti. Arnaıy komıssııa jumystardy iriktegenimen, sýretshilerge qatań talaptar qoıylǵan joq. Kórmede sýretshiler úshin ózge de áriptesteriniń týyndylary qatar qoıyldy. Osyndaı salystyrýlar qylqalam ıelerine óz jumystaryna basqa kózben qarap, sheberlikterin shyńdaýǵa kómektesedi. Qazirgi tańda sýretshiler realızmdi óte sırek salatyn boldy. Olar kóbine óziniń ishki jan dúnıesine kóz salady: sýretterde stılızasııa kóp, qııal-ǵajaıyp sıýjetter jıi kezdesedi. Týyndylaryn kópshilik nazaryna usynbas buryn, olardyń árqaısysy ózin-ózi syrttaı baǵalaýlary tıis, – deıdi ónertanýshy Natalıa Ivanına.
Kórmedegi el nazaryn aýdarǵan týyndynyń biri – Buqar jyraýǵa arnalǵan gıpsten jasalǵan músinshe boldy. Ol arab jazbasymen jáne áshekeılermen bezendirilgen hannyń bas kıimi beınesinde jasalǵan.
– Bul ıdeıany júzege asyrý úshin úsh jyl boıy aqparat jınap, tarıhshylarmen, ımamdarmen keńestim. Músinniń negizgi ortańǵy tik bóligi jeti hannyń mórimen árlengen, ol Buqar jyraý jeti hannyń keńesshisi bolǵanyn bildiredi. Barlyq mórler tamshy ispettes – ol qan tamshysyn bildiredi. Osyndaı pishindi mór tek handa ǵana bolatyn, sebebi han ǵana soǵysty bastaýǵa buıryq bere alǵan. Músinniń qyrlarynda arab tilinde segiz jazba bar – ol musylmannyń basty segiz qasıeti. Eń joǵary jaǵynda dala búrkiti beınelengen, bir qyrynan qarasa barlyq musylmandardyń belgisi – jarty aıshyq sekildi kórinedi, – deıdi músin avtory Amantaı Ákishev.
Qaırat ÁBILDA,
«Egemen Qazaqstan»
QARAǴANDY
