Keshe Ortalyq kommýnıkasııalar qyzmetiniń alańynda «Baspana» ıpotekalyq kompanııasynyń basshysy Qaırat Altynbekov «7 – 20 – 25» ıpotekalyq baǵdarlamasynyń iske asyrylý barysyna toqtaldy.
− Búginde Soltústik Qazaqstan men Túrkistan oblystarynda «7 – 20 – 25» baǵdarlamasy boıynsha berilgen ıpotekanyń kólemi tym az. Sebebi atalǵan óńirlerde jańa turǵyn úıler sany jetkiliksiz. Osyǵan baılanysty Ulttyq bank «Baspana» ıpotekalyq kompanııasymen birlese otyryp, «7 – 20 – 25» baǵdarlamasyna ózgeris engizdi. Oǵan sáıkes, biz baǵdarlama aıasynda salynatyn jańa úılerdi arttyrý úshin shamamen 150 mlrd teńge bólýge ázirmiz, – dedi Q.Altynbekov.
Onyń sózine qaraǵanda, jańa baǵdarlamaǵa suranys joǵary bolǵanymen, bankter barlyq ótinishti qabyldaýǵa asyqpaı otyr. Máselen, osy ýaqytqa deıin ekinshi deńgeıli bankterge 26 mlrd teńgege ótinimder túsip, sonyń ishinde 18 mlrd teńgeniń ıpotekasy maquldanǵan. Bul – shamamen 1 500 páter.
Aıta keterligi, búginnen bastap «7 – 20 – 25»-ke qosymsha «Baspana-Hıt» atty jańa ıpotekalyq baǵdarlama iske qosyldy. Onda alǵashqy jarnanyń kólemi ózgermeıdi. Alaıda prosenttik mólsherleme Ulttyq banktiń stavkasyna baılanysty bolmaq.
− Máselen, Ulttyq banktiń bazalyq stavkasy 9 prosentti quraıdy. Oǵan taǵy 1,7 prosent qosylady. Osylaısha, «Baspana-Hıt» baǵdarlamasy boıynsha prosenttik mólsherleme 10,7 bolady. Ipotekanyń merzimi – 15 jyl. Al bastapqy jarnanyń mólsheri 20 prosent bolyp qala beredi, – deıdi Q.Altynbekov.
«7 – 20 – 25» ıpotekalyq baǵdarlamasyna qatysýshylar sany boıynsha Almaty, Astana qalalary, sonymen qatar Mańǵystaý oblysy kósh bastap keledi. Aqtóbe, Shyǵys Qazaqstan jáne Aqmola oblystarynda da nesıe berý qarqyny ósýde.
Osy jıynda aıtylǵandaı, atalǵan baǵdarlama sheńberinde jas otbasylar men bıýdjettik sala qyzmetkerleri úshin «Jas arman» jáne «Qamqor baspana» jobalary ázirlenipti. Jergilikti atqarýshy organdar joǵaryda atalǵan sanattaǵy azamattarǵa bastapqy jarnany qysqartý úshin sýbsıdııa qarastyrýda. Bul rette úı kezeginiń tizimin jasaý, ónimge qatysý úshin azamattardy irikteý ákimdikterdiń erkine berilgen. Taıaýda «Baspana» uıymy Shymkent qalasy ákimdigimen birge alǵashqy jobany iske qosty. Joba boıynsha Shymkent ákimdigi 2 myńǵa jýyq turǵynǵa qoldaý kórsetý úshin 2 mlrd teńge sýbsıdııa bólgen.
Buǵan deıin atalǵan baǵdarlama negizinde Sentrkredıt banki, ATF Bank, Sesnabank, BankRBK, Evrazııalyq bank arqyly nesıe rásimdeletin bolsa, 11 qyrkúıekten bastap, Qazaqstan Halyq Banki jáne ForteBank te osy tizimge qosylyp otyr.
Erkejan AITQAZY,
«Egemen Qazaqsan»
