– Elbasy Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamasynda qoıylǵan mindetter údesinen shyǵýymyz úshin sharýany sátimen sabaqtap jatyrmyz,–dedi oblys ákimi Málik Myrzalın,–munyń aldynda akademık-jazýshy Málik Ǵabdýllınniń 11 tomdyǵyn osy qazaq halyqaralyq qazaq PEN-klýby arqyly shyǵarǵan bolatynbyz. Sol qýanyshqa búgingi sát ulasyp otyr.
Sáken seri Júnisovtiń sátti týyndylarynyń biriniń sanatyndaǵy «Zamanaı men Amanaı» povesiniń qazaq prozasyndaǵy orny erekshe ekendigin kózi qaraqty oqyrmannyń bári biledi. Bul poveste jıyrmasynshy ǵasyrdyń otyzynshy jyldaryndaǵy el ishindegi ahýal sıpattalǵan. Sol bir tar jol, taıǵaq keshý zamanynda týǵan topyraǵynan údere kóshken qalyń qazaqtyń zar-muńy. Bastaryna túsken taǵdyr tálkeginen tórtkúl dúnıege tarydaı shashylǵan beıkúná adamdardyń týǵan jerge degen sarytap saǵynyshy. Otandy súıý, týǵan jer men elge degen mahabbat jınaqtyń ár jolynda jan dúnıeńdi ýyljytyp, kókiregińdi ýdaı ashytyp, kilkildep tur.
Sáken serini aǵylshyn tilinde sóıletýge zor úles qosqan halyqaralyq qazaq PEN-klýbynyń prezıdenti Bıgeldi Ǵabdýllın óz sózinde aýdarma máselesine toqtaldy. Sodan soń Shekspır tiline aýdarylǵan Sáken seri arqyly qazaq ádebıetiniń kesek týyndysynyń kemel beınesin jarty álemniń jurtshylyǵy tanyp biletindigin basa aıtty. Sol bir zamandaǵy el basyna týǵan adam aıtqysyz aýyrtpalyqty da.
Al, Saımon Geıgan, Saımon Hollıngsvorta tárizdi aýdarmashylar Sáken seriniń shuraıly shyǵarmasyna óz tańdanystaryn bildire kele, álemdik ádebıetke sara jol ashylǵandyǵyn aıtyp ótti. Aǵylshyn tildi jurtshylyq qalamgerleri arqyly qazaqty tanıtyn bolady. Isi qazaqtyń sóz ónerin, sóz ónerine qosa tarıhy men taǵdyryn. Munyń aldynda Muhtar Áýezov, Ábish Kekilbaev, Oralhan Bókeev tárizdi qazaqtyń qabyrǵaly qalamgerleri aǵylshyn tiline aýdarylsa, endi mine Sáken seri Júnisovtiń qalamynan týǵan tamasha shyǵarma tórtkúl dúnıege jol tartyp otyr. Tusaýkeser rásiminiń sońynda jazýshynyń qaryndasy Roza Júnis, jerlesi Meıram Ǵıbadılovtar sóz sóılep, esten ketpes estelikterimen bólisti.
Baıqal BAIÁDIL,
«Egemen Qazaqstan»
Kókshetaý
