Jalpy Túrkistan óńirindegi taýlardyń kóptegen erekshelikteriniń biri - jazǵy maýsymda alpınızm sharalaryn, jarystar ótkizýge yńǵaıly. Ulttyq park derekterine júginsek, bıylǵy 8 aıda Reseı, Belorýssııa, О́zbekstan, Qyrǵyzstan jáne Ýkraına elderinen 600 - ge jýyq alpınıst pen týrıster kelgen. Al kúni keshe shyńǵa shyqqandardyń jóni bólekteý boldy. «Kazakh Tourism» ulttyq kompanııasy Astananyń 20-jyldyǵyna arnalǵan is-sharalar aıasynda, Qazaqstannyń 20 shyńyna ekspedısııa uıymdastyryp otyr. Mádenıet jáne sport mınıstrligi týrızm ındýstrııasy komıteti tapsyrmasy boıynsha. Mine sol shyńdardyń biri, ıaǵnı alpınıster baǵyndyrǵan Túrkistan oblysynyń Saıram-О́gem Ulttyq parkinde ornalasqan 20-shy shyń (3446m) jańa ataýǵa ıe boldy.
«Kazakh Tourism» UK» AQ baspasóz qyzmeti habarlaǵandaı, ekspedısııa Tan-Shan taýlarynyń soltústiginen, bıiktigi - 4330,9 metr, Nursultan shyńynan bastalǵan. Ekspedısııa barysynda qamtylǵan shyńnyń eń bıigi - Altaı taýlarynda ornalasqan Muztaý shyńy (4506 m) eken. Batys Tıan-Shandaǵy jańa «Astananyń 20-jyldyǵy» ataýyn alǵan shyń ekspedısııa qamtyǵan sońǵy taý shyńy bolyp otyr. Ekspedısııany uıymdastyrý barysynda týrıstik, ekstremaldyq sport túrlerin damytýǵa, ekotýrızm jáne trekıng baǵdarlaryn uıymdastyrý úshin áleýeti joǵary 3 óńir - Almaty, Túrkistan, Shyǵys Qazaqstan oblystary tańdalyp alynǵan. Atalmysh sharaǵa 100-den astam adam, onyń ishinde kásibı alpınıster jáne tájirıbeli saıahatshylar, tanymal ınternet - blogerler qatysty. Endi osy marshrýttarda ınfraqurylymdy damytý boıynsha usynystar ázirlenbek. Bul sharanyń maqsaty - Tıan-Shan taýlarynyń Qazaqstan jaǵyn álemge tanytý, elimizdiń taý týrızmin damytýdaǵy áleýetin kórsetý. Ekspedısııa barysynda jınalǵan materıaldar týrıstik baǵdarlamalar men tıisti halyqaralyq gaıbýkterge engizilmek.
Aıta ketelik, taý týrızmin damytýǵa Túrkistan oblysynda erekshe mán berilýde. Búginge Saıram-О́gem Ulttyq parki aýmaǵynda 6 demalys úıi, ańshylar úıi, etnoaýyl, kıiz úı kesheni, 11 týrıstik baǵyt, demalys alańqaılary, sholý alańdary týrıster men demalýshylarǵa qyzmet kórsetýde. Týrısterge qajetti zattar men minis attar jáne jol kórsetýshi bólinedi. Týrıstik baǵyttar park aýmaǵyndaǵy Maqpal, Sýsińgen, Saıramsý kórinisi erekshe kólderi men Boztorǵaı, Saıramsý, Saryaıǵyr, О́gem jáne Mashat ózenderiniń boıyndaǵy tabıǵaty tunǵan, keremet sulý ýchaskelerdi qamtıdy. Park tarapynan demalýshylarǵa qyzmet kórsetýdiń sapasy men túrleri de jyldan - jylǵa jaqsaryp keledi. Bul óz kezeginde park aýmaǵyna kelgen demalýshylardyń jyldan – jylǵa kóbeıýine oń áser etýde. Mysaly, 2016 jyly - 19,7 myń, 2017 jyly - 23,4 myń, al 2018 jyldyń 8 aıynda 27 myń adam kelip, tynyǵyp qaıtqan. Olarǵa qyzmet kórsetýden bıylǵy 8 aıda 8,7 mln. teńge qarjy túsken.
Ǵalymjan ELShIBAI,
«Egemen Qazaqstan»
Túrkistan oblysy
