Qazaqstanda balalar jalpy halyq sanynyń 31% quraıdy. Kórsetkishti óńirler boıynsha qarastyratyn bolsaq, balalar úlesi eń tómengi aımaqtar Qostanaı - 23%, Pavlodar oblystary - 25%. Atyraý - 36%, Jambyl - 37 %, Qyzylorda - 37%, Mańǵystaý - 38%, eń joǵary kórsetkish Ońtústik Qazaqstan oblysynda baıqalady - 41% .
«Eger de balalardyń úlesi, mysaly 35%-dan joǵary bolatyn bolsa, onda áleýmettik ınfraqurylymǵa salmaq túsedi, al 25%-dan tómen bolsa, jetispeýshilik baıqalady, sondyqtan aımaqtardy damytýda osy máselege nazar aýdarý qajet»,-deıdi Zýlfııa Muhamedbekqyzy.
Statıstıka komıtetiniń málimeti boıynsha, náresteler men 17 jas aralyǵyndaǵy balalardyń sany 5 623 387 quraıdy - 51/49 (ul/qyz). 2017 jyldyń bastapqy kezeńinde aýyldyq jerlerde turatyn balalar - 47%, al qala óńirlerinde 53% quraǵan. Aýyl-aımaqtarda turatyn balalar kórsetkishi joǵary oblystar: Ońtústik Qazaqstanda - 655 myń, Almatyda - 510 myń jáne Jambyl oblysynda - 255 myń.
Búginde Qazaqstanda balalar men jasóspirimderdiń quqyqtaryn retteıtin 45-ten asa normatıvtik aktiler qabyldanǵan, ıaǵnı «Qazaqstan Respýblıkasyndaǵy balanyń quqyqtary týraly» Zańy men ózge de normatıvtik quqyqtyq aktilerdiń erejelerine negizdeledi.
Sońǵy jyldarda balalarǵa qatysty qylmys kórsetkishi tómendegen. 100 myń balaǵa shaqqanda zardap shekkender sany sońǵy bes jylda 3,7 esege azaıyp otyr.
Qazaqstanda balalardyń quqyqtaryn qorǵaýǵa ýákiletti organ – QR Bilim jáne ǵylym mınıstrliginiń Balalar quqyqtaryn qorǵaý komıteti. Balalar mekemeleri QR Densaýlyq saqtaý jáne Ishki ister mınıstrliginiń qaraýynda. Balalar ómirine qol suqpaý máselesine barlyq mınıstrlikter men vedomstvolar jaýapty ári qoǵamdyq uıymdar da bul sharadan tys qalmaýy tıis.
Zorlyq-zombylyqpen kúreste «Balalardy birge qorǵaımyz!» Jol kartasy QR Memlekettik úılestirýimen iske qosylǵan. Joba sheńberinde balalar úıiniń tárbıelenýshilerine arnalǵan «úı-mektep» (patrýlder, jaryqtandyrý jáne t.b.), qaýipsizdik kartasy ázirlenip, semınarlar, dárister, áńgimeler ótkizýmen qatar kitapshalar, eskertpe habarlamalar úlestirilgen. Mundaı sharalar balalardyń qaýipsizdigin kúsheıtýde birden-bir aqparattyq kómekshi qural men tıimdi ádister bolyp tabylady.
Elvıra Serikqyzy,
«Egemen Qazaqstan»
ALMATY
