Burynǵy aǵashtan qıyp salǵan meshittiń ǵımaratyn órt shalǵaly eldi mekenniń turǵyndary biraz qıyndyqty basynan keshirgen bolatyn. Endi mine, Qazaqstan Respýblıkasy Prezıdenti Is Basqarmasynyń «Kásipkerlik bastamalardy damytý qorynyń» uıytqy bolýymen jańa meshit salynyp, el ıgiligine jaratylatyn boldy. Meshit qurylysyn Qazaqstan Musylmandary Dinı basqarmasy qadaǵalaǵan. Jalpy alańy 1659 sharshy metrdi quraıdy. Meshit mańyndaǵy jer teliminiń ózi qazaqtyń jalpaq tilimen aıtqanda, at shaptyrym. Tóńiregi tegis abattandyrylǵan, dál janynda avtomobıl turaǵy, gúlzarlar jáne jaıaý júrginshilerge arnalǵan jol salynǵan. Nysannyń ishinde bul óńirde kezdese bermeıtin Promenad, Kongress-holl bolǵandyqtan, aıryqsha sáýletti keshen dep te aıtýǵa bolady.
Meshit tez salyndy. Qurylys jumystary ótken jyldyń qańtar aıynda bastalǵan bolatyn. Tez bolsa da, sapaly ekendigi baıqalyp tur. Munaralary alystan menmundalaǵan Allanyń jerdegi úıi kelimdi-ketimdi kisisi kóp Býrabaı aýylynyń burynǵy sáýletine jańa reńdegi ádemi keıipti eseleı túsedi eken.
Ashylý saltanatynda Aqmola oblysynyń ákimi Málik Myrzalın el birligin nyǵaıtý tarapynda atqarylyp jatqan sanalýan jaqsy ister jaıyn jınalǵan jamaǵatqa jetkize kele, el Prezıdenti Nursultan Nazarbaevtyń «Bolashaqqa baǵdar: rýhanı jańǵyrý» baǵdarlamalyq maqalasynan týyndaıtyn asqaraly mindetterdiń oń sheshimin taýyp jatqandyǵyna toqtala kele, búgingi meshit úıi jas urpaqtyń tárbıesine qaltqysyz qyzmet etetin oryn ekendigine toqtaldy.
Munan soń sóz alǵan Qazaqstan Musylmandary Dinı basqarmasynyń tóraǵasy, bas múftı Serikbaı qajy Oraz óz sózinde:
– Búgingi tańda birligimizdiń myzǵymas berik ekendiginiń bultartpas aıǵaǵy tárizdi ımandylyq úıleri kóptep salynyp jatyr,–dedi ol,–bul meshitter san urpaqqa qyzmet etetin bolady. Osy meshitti salýǵa qarjylaı kómek kórsetken adamdardyń da ózderiniń ımandy sharýasyn jarnamalap aıtpaýynyń ózi kóp jaıdy uqtyrsa kerek. Bul jaıly Quranda da aıtylǵan. Máselen, kimde-kim meshit salsa, Allanyń qurmetine ıe bolyp, jumaqtan oryn tıedi. Dál osyndaı meshitke ıe bolýymyzdyń ózi qasıetti táýelsizdigimizdiń arqasynda. Meshit – uly mádenıetterge, adamgershilik pen izgilikke, rýhanı qundylyqtardy qasıetteı bilýge tárbıeleıtin oryn.
Sóz sońynda bas múftı meshittiń kiltin tabys etti. Býrabaı baýraıyn jaılaǵan dúıim el atynan aýdannyń qurmetti azamaty Nurseıit aqsaqal Qasenov jamaǵattyń sheksiz rızashylyǵyn jetkizdi.
– Burynǵy eski meshitke otyz-aq adam sııatyn edi. Juma namazyna jınalǵan jurt dalada turatyn. Endi mine, 150 oryndyq, úsh qabatty meshit paıdalanýǵa berilip otyr. Ishinde erler men áıelderge arnalǵan eki ǵıbadat bólmesi, kitaphanasy, 140 oryndyq as beretin zaly bar. Osyndaı el ıgiligi úshin ımandy sharýa istegen barsha azamattarǵa aq alǵysymyzdy bildiremiz,–dedi ol.
Munan soń jınalǵan jamaǵat sáýleli meshittiń ishin aralap kórdi. Qazaqstan Musylmandary Dinı basqarmasynyń Aqmola oblysyndaǵy ókil ımamy Qýanysh Sábıt quran baǵyshtap, Serikbaı qajy Oraz aq batasyn berdi. Jańa meshittegi juma namazyna jınalǵan jamaǵat birin-biri osy bir qýanyshtarymen quttyqtap, jaqsylyq tilesti.
Baıqal BAIÁDIL,
«Egemen Qazaqstan»
Aqmola oblysy,
Býrabaı aýdany.
