Úndistan naryǵynyń 90 paıyzǵa jýyǵyn qus etimen qamtamasyz etip otyrǵan alpaýyt kompanııa Túrkistan oblysyna ınvestısııa salýǵa nıetti. Oblys ákimi Janseıit Túımebaev kompanııa ókilderimen kezdesý barysynda óńirde birneshe qus fabrıkasy baryn, qus sharýashylyǵyn damytyp, klaster qurýǵa ákimdik árdaıym qoldaý kórsetýge daıyn ekenin atap ótti. Investorlar keletin bolsa, jer jáne ınfraqurylym máselesine de kómek kórsetiletin bolady. Al, «Venkateshwara Hatcheries Private Limited» (VH group) kompanııasynyń operasııalar jónindegi bas dırektory Mýrtýza Alı Ismaıl Magdým kompanııa qus ósirýmen, jumyrtqa óndirýmen qatar jumyrtqa untaǵyn da kádege asyratynyn, arnaıy zertteý ortalyqtarynda qus sharýashylyǵyna qajetti vaksına shyǵarýmen de aınalysatynyn aıtyp ótti.
1971 jyly qurylǵan kompanııanyń Úndistanda ǵana emes, AQSh jáne Eýropa elderinde birlesken kásiporyndary men jobalary bar. Kompanııa basshysy kelissózder sátti aıaqtalsa, Túrkistan oblysynda jumys bastaýǵa daıyn ekenin málimdedi. Oblys ákimi Janseıit Túımebaev osy salaǵa jaýapty orynbasarlaryna úndistandyq ınvestormen iskerlik baılanysty naqtylaýdy tapsyrdy.
Ǵalymjan ELShIBAI,
«Egemen Qazaqstan»
Túrkistan oblysy
