Sondaı-aq partııa qyzmetin jańǵyrtý aıasynda qolǵa alynǵan jańa jobalardyń aımaqta júzege asyrylý barysymen tanysyp, partııanyń oblystyq aktıvimen jıyn ótkizdi. Odan bólek, «Rýhanı jańǵyrý» baǵdarlamasy boıynsha óńirlik jobalaý keńsesinde boldy jáne oblys ákimi, partııa oblystyq fılıalynyń tóraǵasy Arhımed Muhambetovpen birge «7 – 20 – 25» baǵdarlamasy boıynsha baspanaly bolǵan jergilikti turǵyndarǵa páter kiltin tapsyrdy.
Elbasynyń Saıası partııa keńesiniń keńeıtilgen otyrysynda bergen tapsyrmasy boıynsha sońǵy aılarda partııa qyzmetin jańǵyrtý jumystary qarqyn alyp, birqatar tyń jobalar, jańa bastamalar qolǵa alynǵany belgili. Sonyń ishinde bastaýysh partııa uıymdarynyń rólin kúsheıtý isi de bar. Búginde elimiz boıynsha «Nur Otannyń»
6 myńǵa jýyq bastaýysh partııa uıymy bar. 1 mıllıonnan astam nurotandyq osy uıymdarǵa toptastyrylǵan. Bıyl atalǵan uıymdardyń jumysyn jandandyrý maqsatynda partııa tarıhynda alǵash ret elimizdiń tórt aımaǵynda arnaıy forýmdar ótkizildi. Onda qatysýshylar BPU qyzmetterin odan ári jandandyrýǵa baǵyttalǵan tujyrymdamaǵa engizý úshin óz usynystary men pikirlerin bildirdi. Eń iri jáne belsendi bastaýysh partııa uıymdarynyń músheleri qarasha aıynda Astanada ótetin respýblıkalyq forýmǵa qatyspaq.
M.Áshimbaev partııanyń «Sokolov-Sarybaı taý-ken baıytý óndiristik birlestigi» AQ aýdandyq fılıalyna qarasty bastaýysh partııa uıymdarynyń basshylyǵymen kezdesýinde osy máselelerge erekshe nazar aýdardy. Atalǵan fılıal 2007 jyldyń sáýir aıynda qurylǵan. Búginde ol músheleriniń sany jaǵynan Qostanaı oblysynda eń iri fılıal bolyp sanalady. Munda qazirgi kezde 20 myńnan astam partııa múshesi jáne 31 bastaýysh partııa uıymy bar. M.Áshimbaev kezdesýde bastaýysh partııa uıymdary jergilikti jerlerdegi barlyq partııalyq jumystyń negizgi ortalyǵy bolýy kerektigin aıtty.
– Partııalyq jańǵyrý aıasyndaǵy basym baǵyttarymyzdyń biri – bastaýysh partııa uıymdaryn jandandyryp, olardyń jumys tıimdiligin arttyrý. Soǵan oraı Pavlodar, Shymkent, Qaraǵandy jáne Aqtóbe qalalarynda atalǵan uıymdardyń aımaqtyq forýmdaryn ótkizdik. Onda uıym ókilderi partııalyq jańǵyrýǵa qatysty óz oılaryn aıtyp, túrli usynystaryn joldady. Onyń barlyǵy aldaǵy qarasha aıynda Astanada ótetin respýblıkalyq forýmda keńinen talqylanyp, pysyqtalady, – dedi M.Áshimbaev.
Sonymen qatar partııa Tóraǵasynyń birinshi orynbasary atalǵan fılıaldyń jumysyna rızashylyǵyn bildirip, aldaǵy mindetterge de nazar aýdardy.
– Elbasynyń tapsyrmasy boıynsha biz partııa qyzmetin jańǵyrtý arqyly elimizdiń zamanaýı, tıimdi, joǵary tehnologııaly saıası uıymy retinde qalyptasýymyz kerek. Búkil álem ózgeristerge ushyraǵan kezeńde biz de qazirgi zamannyń úrdisterine beıimdelýge tıispiz. Jaqtastarymyzǵa óz ıdeıalarymyzdy túsindirýde jańa tásilderdi qoldanyp, ozyq halyqaralyq tájirıbelerdi eskerýimiz qajet. Sol arqyly Elbasynyń senimdi saıası tiregi jáne elimizdiń jetekshi saıası kúshi bolyp qalýymyz kerek, – dedi M.Áshimbaev.
Elbasy Saıası keńes otyrysynda «Rýhanı jańǵyrý» baǵdarlamasy «Nur Otannyń» ıdeologııalyq platformasy bolýy kerektigin aıtqan bolatyn. Sondyqtan atalǵan baǵdarlamanyń partııa úshin mańyzy joǵary. Osyǵan oraı M.Áshimbaev Qostanaı oblysyndaǵy «Rýhanı jańǵyrý» baǵdarlamasyn júzege asyrý jónindegi óńirlik jobalyq keńsesiniń jumysymen arnaıy tanysty.
Jalpy oblysta atalǵan baǵdarlama aıasynda aýqymdy jumystar atqarylǵanyn ańǵarý qıyn emes. Sonyń ishinde «Týǵan jer» jobasy boıynsha ornatylyp, Qostanaı qalasynyń rýhyn asqaqtatyp turǵan Shaqshaq Jánibek batyrdyń eskertkishin erekshe atap ótýge bolady.
Budan soń M.Áshimbaev Elbasynyń bes bastamasy aıasynda óńirde atqarylyp jatqan jumystarmen tanysý úshin Qostanaı memlekettik pedagogıkalyq ýnıversıtetine bardy. Oqý ordasynyń rektory Erkin Ábildiń sózine qaraǵanda, búginde joǵary oqý ornynda 2 804 stýdent bilim alady. Ýnıversıtettiń 465 oryndyq 5 qabatty bir ǵana jataqhanasy bar. Degenmen, taǵy 344 oryn qajet. Osy máseleni sheshý úshin Elbasynyń bes áleýmettik bastamasy aıasynda úsh qabatty, árqaısysy 86 oryndyq 4 ǵımarattan turatyn kampýs salý josparlanyp otyr.
Bes áleýmettik bastama aıasyndaǵy «7 – 20 – 25» baǵdarlamasy da Qostanaı oblysynda tabysty júzege asyrylýda. Qazirdiń ózinde birqatar qostanaılyqtar osy bastamanyń nátıjesinde turǵyn úıge qol jetkizip, baspanaly bolýda. Atap aıtqanda, jańadan boı kótergen «Altyn arman» shaǵyn aýdanyndaǵy birneshe kóp qabatty úı «7 – 20 – 25» baǵdarlamasy boıynsha berilýde. M.Áshimbaev osyndaı qýanyshqa kenelgen páter ıelerin quttyqtap, saltanatty kilt tapsyrý rásimine qatysty.
«Nur Otan» partııasy Tóraǵasynyń birinshi orynbasary oblysqa sapary barysynda partııalyq jobalardyń júzege asyrylý jaıymen de tanysty. Atap aıtqanda, ol partııanyń IT-mamandar daıarlaý úshin «20 IT-ortalyq» jáne balalarǵa arnalǵan tegin «1000 IT-synyp» ashý jobalaryn júzege asyrýda kópke úlgi bolyp otyrǵan mamandandyrylǵan «Ozat» lıseıinde, sondaı-aq Rýdnyı qalasyndaǵy №2 gımnazııada boldy.
Sonymen qatar partııanyń oblystyq aktıvimen kezdesti.
Názıra JÁRIMBET,
«Egemen Qazaqstan»
Qostanaı oblysy
