Senatorlardy Batys Qazaqstan oblysynyń ákimi Altaı Kólginov qabyldap, Memleket basshysynyń bıylǵy Joldaýynda qoıylǵan jańa mindetterdi óńirde qalaı júzege asyrý jáıi talqylandy.
- Elbasynyń Joldaýy óńirimizdiń damýyna tyń serpin beredi. Oblysta negizgi problemalar – taza aýyz sý, jol, gazben qamtý boıynsha jumystar júrgizilýde. Osy jumystardy Joldaýǵa sáıkes aldaǵy jyldary da qarqyndy atqaratyn bolamyz, – dedi Altaı Kólginov.
Sol kúni senatorlar Oral qalasyndaǵy birqatar nysandy aralap, apatty úılerdiń ornyna memlekettik-jekeshelik áriptestik aıasynda salynyp jatqan jańa úılerdiń qurylysymen tanysty. Apatty úıdiń biri – Gagarın kóshesindegi 12 páterlik eki qabatty kóne ǵımarat edi. Búginde ol jerde toǵyz qabatty 126 páterlik úı salynyp jatyr. Eski úıdiń turǵyndary jańa úıge kóshirilip, qalǵan páterler «7-20-25» baǵdarlamasy boıynsha beriletin bolady.
Qurylystyń jaı-japsarymen tanysqan Birǵanym Áıtimova turǵyn úıdegi kommýnaldyq sharýashylyq jumystaryn júrgizýdegi máseleler qalaı sheshiletinin surady. Saýalǵa jaýap bergen qala ákimi Murat Muqaev bul úıge turǵyndar men páter ıeleri kooperatıviniń ózara baılanysyn jaqsartyp, PIK-ter jumysynyń ashyqtyǵyn qamtamasyz eýge baǵyttalǵan «e-PIK» júıesi engiziletinin aıtty.
Senatorlar Qurmanǵazy kóshesindegi №198 kóp qabatty turǵyn úı qurylysymen de tanysty. Bul da apatty úı ornyna salynyp jatqan ǵımarat. Memlekettik-jekeshelik áriptestik arqyly salynyp jatqan bul úıdiń páterleri buryn osy jerdegi súrilgen qos úıdiń 16 páter turǵyndary men «7-20-25» baǵdarlamasyna qatysýshylarǵa berilmek.
– El aralap shyqqan biz Elbasy Joldaýyn túsindirip qana qoımaı, ár aımaqtaǵy túrli máselelerdi tyńdap, zań talaptarynyń oryndalýyn qaraımyz. Elbasy bıylǵy Joldaýynda halyqty sapaly ári qoljetimdi turǵyn úımen qamtý jóninde basa aıtqan bolatyn. Taıaý jyldary eki mıllıonǵa jýyq qazaqstandyq baspanaly bolady. Árıne, eki mıllıon úlken kórsetkish. Biraq bizde demografııalyq kórsetkish jaqsy. Turǵyndardy baspanamen qamtý máselesi el Úkimeti men ákimdikterdiń kún tártibinen uzaq jyl boıy túspeıdi dep oılaımyn. Memlekettik-jekeshelik áriptestik aıasynda «7-20-25» baǵdarlamasy ońtaıly paıdalanylyp otyrǵanyn kórdik. Ár aımaqta bolyp júrsek te, Oraldaǵydaı durys sheshimdi birinshi ret kórip turmyn. Eski úıdiń ornyna qalanyń ortasynda ári jańa baspanada turý óte yńǵaıly. Bul apatty jáne eski úılerdiń máselelerin sheshý úshin elimiz boıynsha bólisýge turatyn jaqsy tájirıbe dep bilemin. Senat depýtattary Batys Qazaqstanda osyndaı jumystar bar ekenin aıtyp júretin bolamyz, – dedi Senat depýtaty Birǵanym Áıtimova.
Budan keıin senatorlar Oral gaz, munaı jáne salalyq tehnologııalar kolledjiniń pedagogıkalyq ujymymen kezdesti. Búgin Qaztalov aýdanyna sapar shegip, Aqpáter aýyly aýmaǵyndaǵy Kırov-Shejin sý arnasy, Jalpaqtal aýylyndaǵy turǵyn úı qurylysymen tanysady. Sondaı-aq mektep, aýrýhana, balabaqsha ujymdarymen kezdesý josparlanǵan.
Qazbek QUTTYMURATULY
«Egemen Qazaqstan»
Sýretti túsirgen A.Kýprıenko
Batys Qazaqstan
