Jıynda 2018-2019 oqý jylyna oqýǵa stýdentter qabyldaý qorytyndysy týraly ýnıversıtet rektory Qylyshbaı Bısenov málimdedi. 18-26 shilde aralyǵynda Ulttyq biryńǵaı jáne keshendi testileý kezinde 50-den joǵary ball jınaǵan talapkerler memlekettik bilim berý grantyn aıqyndaıtyn konkýrsqa qatysýǵa ynta bildirdi. Atalǵan bilim ordasynyń qabyldaý komıssııasyna qujat tapsyrǵan 3651 talapkerdiń 2485-i memlekettik bilim berý tapsyrysyn ıelendi. Sonyń 247-si nemese 17%-y ǵana ýnıversıtet mamandyqtary boıynsha oqýǵa qabyldanǵan.
– Bul talapkerlerdiń bizdi tańdamaıtynynan emes, memlekettik tapsyrysty ornalastyrý erejesine baılanysty. Sebebi jyl saıyn bilim granttary pedagogıkalyq baǵyt boıynsha jáne maqsatty túrde beıindi joǵary oqý oryndaryna bólinip, ol oqý oryndaryna talapkerler tómen balmen bilim granty boıynsha tústi, – dedi rektor.
Jıynda baıqaý keńesi Bilim jáne ǵylym mınıstrligine «Aral óńirindegi ekologııalyq qasiret saldarynan zardap shekken azamattardy áleýmettik qorǵaý» týraly zańǵa sáıkes ýnıversıtetke 2019-2020 oqý jylynda maqsatty túrde 500 memlekettik bilim grantyn bólýdi surap, hat joldaýǵa ýaǵdalasty.
Odan keıin aldaǵy ýnıversıtettiń úsh jylǵa arnalǵan damý baǵdarlamasy tanystyrylyp, oqý ornynyń «sharýashylyq júrgizý quqyǵyndaǵy respýblıkalyq memlekettik kásiporyn» mártebesin «kommersııalyq emes aksıonerlik qoǵam» mártebesine kóshirý jónindegi usynys talqylandy.
Oblys ákimi adamı kapıtaldyń mańyzy artyp, bilim tórge ozǵan zamanda sannan góri sapaǵa basa mán beriletinin, memlekettik bilim granttary eńbek naryǵyndaǵy jaǵdaı eskerile otyryp bólinýi tıis ekenin aıtty.
– Ýnıversıtet ujymynyń nazaryn birneshe máselege aýdarǵym keledi. Birinshiden, oqytýshylyq quramnyń ǵylymı áleýetin arttyrýǵa erekshe kóńil bólinýi kerek. Ekinshisi – úshtildilik. Stýdentter orys jáne aǵylshyn tilderin ıgermesten oqý ornyn bitirip shyǵady. Bul olardyń tanym kókjıegin taryltyp, suranysqa saı kelmeıtin mamandar qataryn kóbeıtedi. Úshinshiden, jastardy jańa mamandyqtarǵa baýlý óte mańyzdy. Oblysta, mysaly, týrızm salasynyń mamanyn tappaısyń. Sonymen qatar, ýnıversıtet korpýstaryn Wi-Fi ınternet jelisimen qamtý qajet. Qazirgi kúni stýdentter túgili, oqytýshylar osy múmkindikti paıdalana almaı otyr, – dedi oblys ákimi.
Baqtııar TAIJAN,
«Egemen Qazaqstan»
QYZYLORDA
