Hab mamandary aýyl sharýashylyǵy kásiporyndaryna, aýyldarǵa baryp, sıfrlandyrý tehnologııalary jóninde áńgimeler ótkizedi, tehnologııalarmen tanystyrady.
«Bizde qazir sıfrlandyrýdyń bes tehnologııasy bar. Solardy sharýashylyqtarǵa kórsetip, olardyń paıdasy jóninde aqparattar berdik, qazir olardy alyp jatyr» deıdi «Parasat» sıfrlyq habynyń jetekshisi Almabek Batyrjanuly. Senatorlar oǵan úlken baǵa berdi. Bilim ordasynyń elimizdegi eń ózekti «Sıfrlyq Qazaqstan» baǵdarlamasyna osylaı úles qosýy óte quptarlyq ekenin aıtty.
Munan keıin senatorlar Elbasy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýyndaǵy, ásirese jastarǵa qatysty máseleler, týraly aıtty.
«Jastar týraly Elbasynyń burynǵy Joldaýlarynda da aıtylyp júr. Memlekettik «Bolashaq», «Nurly jer», «Nurly jol», «7-20-25» baǵdarlamalarynyń barlyǵy da jastardan syrt aınalyp ketpeıtin. Endi Elbasy osy jolǵy Joldaýynda 2019 jyldy Jastar jyly dep ataýdy usyndy. Mundaı shara buryn elimizde bolǵan emes. Jastar osy baǵdarlamalardy tıimdi paıdalanyp, onyń júzege asýyna úlesin de qosýy tıis» dedi senator Jeńis Nurǵalıev.
Senatorlar Elbasynyń osy jolǵy Joldaýy negizinen eldiń áleýmettik turmysyn kóterýge arnalǵandyǵyna toqtaldy.
«Ekonomıka mınıstrliginiń eseptegeni boıynsha, elimizde 1 mıllıon 300 myń adamnyń jalaqysy eń tómengi jalaqydan da tómen deńgeıde bolǵan. Joldaýda eń tómengi jalaqyny 1,5 ese ósirý týraly aıtyldy. Al ony alǵan adamdar jalaqysynan, ıaǵnı sol qosylǵan 42 myń teńgeden tabys salyǵy ustalmaıdy. Mundaı kómek 9 mıllıondaı adamǵa qatysty. Bul memleket úshin máseleler, qanshama qarjyǵa túsedi, adamdarǵa úlken qamqorlyq» dedi senator Serik Bekturǵanov.
Senatorlar habta stýdentterdiń suraqtaryna jaýap berdi.
Názıra JÁRIMBET,
«Egemen Qazaqstan»
Qostanaı
