Sarbazdardyń áskerı bólimmen qoshtasý is-sharasy saltanatty túrde Aqtaý, Aqtóbe jáne Atyraý áskerı bólimderiniń jaýyngerlik týymen qoshtasý ǵurypymen aıaqtaldy. Bir jyl boıy sarbazdar jaýyngerlik mamandyqty meńgerip, jaýyngerlik daıarlyqta aıtarlyqtaı jetistikterge jetti. Olar ózderiniń mashyqtylyǵyn kóptegen oqý-jattyǵýlary men «Batys-2018» strategııalyq komandalyq-shtabtyq oqý-jattyǵýy kezinde kórsete aldy.
Osy is-sharaǵa oraı, qyzmettik mindetterin úlgili atqarǵan sarbazdar gramotarlarmen, alǵys hattarmen, baǵaly syılyqtarmen marapattaldy, olardyń eń úzdikteri áskerı ataqqa ıe boldy, olardyń biri - efreıtor Sartaı Darhan.
-Áskerdegi bir jyl, men jáne meniń qyzmettesterim úshin naǵyz erlik pen dostyqtyń, ór minezdilik pen qaırattylyqtyń emtıhany boldy. Búgin bizder kindik qanymyz tamǵan ólkemizge naǵyz er azamat bolyp oralýdamyz. Bunyń barlyǵy derlik bizdiń komandırlerimizdiń arqasynda, sol úshin olarǵa myń alǵys, dedi efreıtor Sartaı Darhan.
Áskerı bólimderdegi qalyptasyp qalǵan salttarǵa sáıkes sarbazdar saptyq alańmen sońǵy ret sherýmen ótti. Bir qyzyǵy, merzimdi áskerı qyzmetshilerdiń birazy kelisimshart boıynsha áskerı qyzmetke qalýǵa bel býyp, Qarýly Kúshterdiń qatarynda turaqty túrde qaldy, al ketip bara jatqandardyń ornyn elimizdiń barlyq aımaqtarynan kúzgi shaqyrylymnyń jas sarbazdary tolyqtyrady.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
