Semeı qalasyndaǵy Mádenıet saraıynda 10 qazan kúni múmkindigi shekteýli jandardyń shyǵarmashylyq qabiletterin damytý, ónerge degen qushtarlyqtaryn arttyrý, qoǵamǵa kiriktendirý tájirıbesin taratý maqsatynda uıymdastyrylǵan 5-shi «Eki juldyz» shyǵarmashylyq baıqaýy ótkizildi. Bul baıqaý 2014 jyldan bastap ortalyq dırektory Rymjan Tynysovanyń bastamasymen qolǵa alynǵan bolatyn. Alǵashqy jyldary qalalyq, aımaqtyq deńgeıde qalaǵa jaqyn ornalasqan aımaqtardyń jáne qaladaǵy qoǵamdyq birlestikterdiń, kómekshi-mektep ınternattarynyń tárbıelenýshileri men ortalyǵymyzdyń qyzmet alýshylary arasynda, ótken jyldan beri oblystyq deńgeıde ótkizilip keledi.
Jyldan jylǵa baıqaýǵa qatysýshylar sany ósip, bes jyl ishinde qamtylǵan múmkindigi shekteýli jandar sany 74-ke jetti. Arnaýly áleýmettik qyzmetter kórsetý ortalyǵynyń bastamasymen Semeı qalasynyń ákimdik tarapynan qoldaý taýyp, Mádenıet saraıynyń qyzmetkerlerimen birlese oblystyq deńgeıde ótkizilgen baıqaýǵa bıyl oblystyń 7 aýdanynan (Zaısan, Aıagóz, Abaı, Kókpekti, Jarma, Úrjar, Tarbaǵataı), qalanyń qoǵamdyq birlestikteri, sonymen qosa Semeı qalasynyń «Arnaýly áleýmettik qyzmetter kórsetý ortalyǵy» KMM-nen barlyǵy 22 talapkerler qatysýǵa ótinish bildirdi.
Baıqaýdyń alǵashqy kezeńi ár mekemeniń óz qabyrǵasynda ótkizilip, ekinshi irikteý kezeńiniń qorytyndysy boıynsha 9 jup arnaıy dıplomdarmen jáne syılyqtarmen marapattalyp, 13-jup Gala-konsertke joldama alǵan-dy.
Merekege kelgen ónerpazdar men qonaqtardy kóńildi keıipkerler qarsy aldy. «Qolóner» úıirmesine qatysýshy múmkindigi shekteýli jetkinshekterdiń qoldan jasaǵan buıymdarynan kórme uıymdastyrylyp, shyǵarmashylyq jumystary kópshilik nazaryna usynyldy.
О́mirdi ózinshe tanyp, ishki jan dúnıesimen sezine bilgen múmkindigi shekteýli jandar óner álemine degen qulshynystaryn tamasha ánmen jetkizip, kórermenderdiń ystyq yqylasyna bólendi. Jigerli de batyl jandardyń qaısarlyqtarynyń aldynda bas ıip, erekshe jan ekenderin kúmánsiz moıyndady.
Is-shara sońynda jas erekshelikterine qaraı ár sanat boıynsha jeńimpaz juptar anyqtaldy. Semeılik Aıajan Dáýletqyzy men Daryn Aıtqazın, zaısandyq Darhan Qaseıinov bas júldeni ıelendi. Shar, Kókpekti, Zaısannan kelgen qatysýshylar 1 oryndy jeńip alsa, 2 oryndy Aıagóz, Jarma aýdandary ózara bólisti. Semeı, Úrjar, Kókpektiden qatysqan ónerpazdar 3 orynǵa ıe boldy. Shara sońynda jeńimpazdarǵa baǵaly syılyqtar men dıplom tabystalyp, merekelik dastarhan uıymdastyryldy.
Azamat QASYM,
«Egemen Qazaqstan»
SEMEI
