Senatorlar Oral qalasyndaǵy birqatar nysandy aralap, apatty úılerdiń ornyna memleket-jekemenshik áriptestigi aıasynda salynyp jatqan jańa úılerdiń qurylysymen tanysty. Apatty úıdiń biri – Gagarın kóshesindegi 12 páterlik eki qabatty kóne ǵımarat edi. Búginde ol jerde toǵyz qabatty 126 páterlik úı salynyp jatyr. Eski úıdiń turǵyndary jańa úıge kóshirilip, qalǵan páterler «7-20-25» baǵdarlamasy boıynsha beriletin bolady.
Qurylystyń jaı-japsarymen tanysqan Birǵanym Áıtimova turǵyn úıdegi kommýnaldyq sharýashylyq jumystaryn júrgizýdegi máseleler qalaı sheshiletinin surady. Saýalǵa jaýap bergen qala ákimi Murat Muqaev bul úıge turǵyndar men páter ıeleri kooperatıviniń ózara baılanysyn jaqsartyp, PIK-ter jumysynyń ashyqtyǵyn qamtamasyz eýge baǵyttalǵan «e-PIK» júıesi engiziletinin aıtty.
Budan soń depýtattar Qurmanǵazy kóshesindegi №198 kóp qabatty turǵyn úı qurylysymen de tanysty. Apatty úı ornyna salynyp jatqan bul úıdiń páterleri «7-20-25» baǵdarlamasyna qatysýshylarǵa berilmek.
Qazbek QUTTYMURATULY,
«Egemen Qazaqstan»
Batys Qazaqstan oblysy
