Kópshilik aldyndaǵy dástúrli esep berý jıynynda ótken jyly ınstıtýtta júzege asyrylǵan ǵylymı-uıymdastyrý, zertteý, sharýashylyq jumystardyń negizgi baǵyttary, uıymdastyrǵan is-sharalary, ǵylymı áleýeti, kadrlyq quramy jaıynda keńirek baıandaldy. Ýálıhan Qalıjannyń aıtýynsha, ınstıtýttyń halyqaralyq baılanysy nyǵaıǵan. Qalamgerler men ǵalymdardyń jekelegen ónimderi orys tilin aıtpaǵanda, aǵylshyn, túrik, nemis, basqa da shet tilderine aýdarylyp, sheteldik baspalardan jaryq kórip jatyr. Bul basqosýda sondaı-aq, ınstıtýt qyzmetkerleriniń 2017 jyly jaryq kórgen jeke jáne ujymdyq eńbekteri kópshilikke tanystyrylyp, tusaýkeser rásimi ótkizildi. Sonymen qatar, M.O.Áýezov atyndaǵy Ádebıet jáne óner ınstıtýtynyń 2015-2017 jyldary granttyq qarjylandyrý aıasynda júzege asyrǵan 26 joba boıynsha qol jetkizgen tabystary, nátıjeleri, ǵylymı issaparlar, bilim jáne ǵylym ıntegrasııasy, jalpy, ınstıtýttyń ekonomıkalyq-qarjylyq aqparaty berildi.
Instıtýt qurylymyndaǵy «Folklortaný», «Ejelgi dáýir jáne ortaǵasyrlar ádebıeti», «Abaıtaný jáne jańa dáýir ádebıeti», «Táýelsizdik dáýirindegi ádebıet jáne pýblısıstıka», «Syrtqy ádebı baılanystar jáne taldaý», «Áýezovtaný», «Mýzykataný», «Teatr jáne kıno», «Beıneleý óneri», «Qoljazba jáne mátintaný» ǵylymı-ınnovasııalyq bólimderiniń ótken jylǵy ǵylymı jáne qoǵamdyq is-sharalary, zertteý jumystary QR Prezıdenti N.Á.Nazarbaevtyń «Máńgilik el», «100 naqty qadam – Ult jospary», Indýstrııalandyrý, «Bolashaqqa baǵdar: rýhanı jańǵyrý» baǵdarlamalarynyń aıasynda ótkenin aıtyp ótken jón. Osynyń bárin jıynǵa kelgender qyzyǵa tyńdady jáne ınstıtýt jumysymen jete tanys ekendigin bildirip, sóz surady. Sóz alǵandardyń arasynda mádenıettanýshy Murat Áýezov, shyǵystanýshy Ábsattar Derbisáli, Belorýs etnomádenı ortalyǵynyń jetekshisi L.Pıtalenko, shyǵystanýshy-professor, «Barbang» Qazaqstan kúrdteri Qaýymdastyǵynyń» prezıdenti Knıaz Mırzoev, A.Baıtursynuly atyndaǵy Til bilimi ınstıtýtynyń dırektory Erden Qajybek, sýretshi Erkin Nurazhan jaryqqa shyqqan eńbektermen tanysa otyryp, jasalǵan eńbektiń tabysty bolǵanyn, keıbir ǵylymı eńbekterdi qaıta qaraýdyń qajet ekenin atap ótti.
Instıtýt dırektory QR Bilim jáne ǵylym mınıstrligi Ǵylym komıtetiniń ǵalymdarǵa jasaǵan jekelegen qamqorlyǵyn da ataýsyz qaldyrmady. Byltyrǵy jyly ınstıtýttyń on shaqty jas ǵalymy maqsatkerlik baǵdarlamasy aıasynda baspanamen qamtasyz etilgen. Instıtýt ótken jyly ǵylymı kadrlar daıyndaý salasynda da aıtarlyqtaı jetistikterge jetip, magıstratýra men ǵylymı izdenisterge baılanysty keń aýqymdy josparly jumystar júrgizýdi qolǵa alǵan. Sonyń nátıjesinde ál-Farabı atyndaǵy QazUÝ-men birlestikte «Ǵylym ordasy» bazasyndaǵy Ǵylymı kadrlar daıarlaý ortalyǵynyń baǵdarlamalary negizinde úmitkerler oqýǵa qabyldanyp, birneshe magıstrant, doktoranttar bilim alýda. Munyń ózi ǵylymnyń formaldy túrde emes, bilim men tájirıbeniń ushtasa otyryp, damýyna yqpal jasaıtyny basa aıtyldy. Bul jumystyń bolashaqta turaqty ári tııanaqty túrde jalǵasyn taba beretinin qatysýshylar qýanyshpen qabyldady.
2018 jyly ınstıtýt júzege asyratyn granttyq jobalar men nysanaly baǵdarlama, respýblıkalyq jáne halyqaralyq is-sharalardyń mazmuny, ıdeıalyq baǵdary respýblıkamyzdyń damý strategııasyndaǵy eki baǵdarlamany – «Rýhanı jańǵyrý» jáne «Sıfrly Qazaqstan» baǵdarlamalaryn iske asyrýdy jalǵastyrýǵa baǵyttalǵan.
2017 jyly ınstıtýttyń is-sharalar joparyna jáne QR Bilim jáne ǵylym mınıstrliginiń «Rýhanı jańǵyrý» baǵdarlamasyn iske asyrý josparyna sáıkes birneshe halyqaralyq, respýblıkalyq konferensııalar, dóńgelek ústelder, ǵylymı semınarlar, ashyq dárister uıymdastyrylyp, joǵary deńgeıde ótkizilgen.
M.Áýezov atyndaǵy Ádebıet jáne óner ınstıtýtynyń ádebıettaný, folklortaný men ónertaný salasynda atqarǵan qyzmeti, jetistigi, jumys nátıjeleri jaıynda kópshilikke tolymdy aqparat usyný maqsatynda ótkizilgen jarııa esep berý jıyny qatysýshylar tarapynan qanaǵattanarlyq dep qabyldandy. Jıynǵa joǵary oqý oryndarynyń oqytýshy-professorlar quramy, ádebıettanýshy, ónertanýshy ǵalymdar, magıstrant, doktoranttar, túrli memlekettik, qoǵamdyq uıym, sala qyzmetkerleri qatysty.
Aıgúl AHANBAIQYZY,
«Egemen Qazaqstan»
ALMATY
