Nátıjeli jumyspen qamtý jáne jappaı kásipkerlikti damytý baǵdarlamasy boıynsha jumys kúshi kóp aımaqtardan óńirge bıyl 348 otbasy kóship keldi. Jyl aıaǵyna deıin taǵy 60 otbasy qonys aýdarady. Qyzyljar aýdanynda turǵyndarmen ótken kezdesýde Eńbek jáne halyqty áleýmettik qorǵaý mınıstri Mádına Ábilqasymova qonystanýshylardy jumysqa ornalastyrý, jaıly baspanamen qamtý, basqa da áleýmettik jaǵdaılardy jasaý baǵytynda jergilikti jerde atqarylyp jatqan sharalarǵa oń baǵa berdi.
«Kelesi jyly Soltústik Qazaqstan oblysynda qoljetimdi turǵyn úı qanatqaqty jobasy iske qosylady. Ol boıynsha ár baspanany salýǵa 6 mıllıon teńge mólsherinde qarajat bólý, keıin jekemenshikke satý joldary qarastyrylǵan. Kúngeıden kóship kelýshiler arasynda bilikti mamandar az emes. Teriskeıde dáriger, muǵalim kadrlar jetispeıdi. Keleshekte osyndaı olqylyqtardyń orny toltyrylady», dedi mınıstr.
Sapar barysynda ol «Ahmýddınov» sharýa qojalyǵynyń jumysymen tanysty. Sharýashylyq dırektory Sermuhamed Oraluly aǵashty qaldyqsyz óńdeýmen aınalysatyndaryn, ońtústikten kelgen 9 azamat jumys isteıtinin, 70 adamnyń jumyspen qamtamasyz etilgenin, ortasha jalaqy 150 myń teńgeni quraıtynyn, aldaǵy ýaqytta 40 adamdyq jańa jumys orny qurylatynyn jetkizdi. Sońǵy bes jylda qojalyq esebinen 12 baspana turǵyzylypty.
Petropavl áleýmettik qyzmet kórsetý ortalyǵynda 300 naýqasqa qyzmet kórsetiledi. Olardyń 23-i I toptaǵy múgedekter. Mekemede psıhologtar bar, arnaıy sensorly kabınet jumys isteıdi. Ujymmen kezdesken mınıstr qoıylǵan suraqtarǵa jaýap berip, Joldaýdan týyndaıtyn aýqymdy mindetterge baılanysty keleshekte atqarylatyn is-josparlarmen bólisti. Qala ákiminiń orynbasary Evgenıı Glotov zamanaýı úsh mekteptiń qurylysy bastalǵanyn, bul maqsat úshin 50 mıllıard teńge qarajat bólingenin, 6 myńnan astam qyzmetkerdiń jalaqysy kóbeıip, 13 myń adam salyqtan bosatylatynyn jetkizdi. «Bıznestiń jol kartasy-2020» baǵdarlamasy sheńberinde 41 joba qoldaý tapty. Kelesi jyly kásipkerlerdi sýbsıdııalaý mólsheri 3 ese arttyrylady», dedi ol.
Aqparattyq-nasıhattyq toptyń músheleri eńbek ujymdarynda ótken kezdesý-júzdesýlerde muǵalim bedelin kóterý, alǵashqy medısınalyq-sanıtarlyq qyzmet kórsetetin qyzmetkerlerdi yntalandyrý, sapaly ári qoljetimdi turǵyn úıler salý, sybaılas jemqorlyqqa qarsy belsendi jumysty kúsheıtý, taǵy basqa baǵyttar jaıly keńinen áńgimelenip, halyqty Elbasy tapsyrmalaryn birlesip atqarýǵa shaqyrdy. Jarqyn bastamalardyń odan ári jalǵasatynyna sendirdi
О́mir ESQALI,
«Egemen Qazaqstan»
Soltústik Qazaqstan oblysy
