Is-sharaǵa prokýratýra ardagerleri, Parlament depýtattary, Prezıdent Ákimshiliginiń, Premer-Mınıstr Keńsesi, ortalyq memlekettik organdar men memlekettik emes uıymdardyń ókilderi, ǵalymdar men praktıkter qatysty.
Konferensııaǵa qatysýshylar 1966-1984 jyldar aralyǵynda Qazaq KSR-niń prokýrory bolǵan, 1-synypty memlekettik ádilet keńesshisi, memleket jáne qoǵam qaıratkeri О́tegen Seıitov týraly estelikter aıtty.
Prokýratýra salasynyń shyńyna shyqqan zańger 1923 jyly Aqtóbe oblysynyń Shalqar aýdanynda dúnıege kelgen. Ol 16 jasynan bastap Shymkent oblysy prokýratýrasyna qyzmetke alynǵan. 18 jasqa tolar jyly Uly Otan soǵysy bastalyp, jasy kelmese de maıdanǵa ózi suranyp attanady. Surapyl soǵysta úsh ret jaralansa da, asqan ójettilikpen maıdan shebine qaıta oralyp otyrǵan. Sóıtip, T.Seıitov soǵysqa bastan-aıaq qatysqan. Soǵystan keıin de, 1945-1949 jyldary Ońtústik Qazaqstan oblysynyń Keles, Saryaǵash aýdandary prokýratýrasynyń tergeýshisi, keıin 1949-1951 jyldary osy oblys prokýratýrasynyń aǵa tergeýshisi, al 1951-1959 jyldary respýblıka prokýratýrasynyń bólim prokýrory qyzmetin atqarady. 1960 jyly Almaty qalasyndaǵy Sovet aýdanynyń prokýrory, sosyn Almaty oblysynyń prokýrory bolyp jumys isteıdi. Al 1962 jyly respýblıka prokýrorynyń birinshi orynbasary, 1966 jyly respýblıka prokýrory bolyp taǵaıyndalyp, zeınet demalysyna shyqqansha, ıaǵnı 1984 jylǵa deıin, osy qyzmette boldy.
Kezdesýde zańǵar zańgerdiń eńbek joly, prokýratýranyń bedelin nyǵaıtý jáne azamattardyń senimin arttyrý turǵysynan prokýrordyń adamgershilik-psıhologııalyq qasıetteriniń ózekti máseleleri, kásiptik jaýapkershilik jáne minez-qulyqtyń moraldyq-etıkalyq normalarynyń saqtalýy jaıynda aıtyldy.
Belgili tulǵaǵa arnalǵan forýmnyń ekinshi sessııasy qylmystyq proseske medıasııa ınstıtýtyn engizý problemalary men perspektıvalaryna arnaldy. Jıynda aıtylǵandaı, sońǵy bes jylda medıatorlardyń qatysýymen qaralǵan isterdiń sany sotta qaralǵan isterdiń jalpy sanyna sáıkes túrde ósken.
Sonymen qatar qylmystyq medıasııanyń zańnamalyq negizin jetildirý boıynsha usynystar aıtyldy, taraptardy tatýlastyrý prosedýralaryn belsendi paıdalanýǵa kedergi keltirip otyrǵan sebepter qarastyryldy.
Serik ÁBDIBEK,
«Egemen Qazaqstan»
