Aqúlpekterdi tálimbaq mamandary jabaıy tabıǵatqa barynsha beıimdep, azyq taýyp jeýdi úıretip, ushyryp saldy.
Jumyrtqadan jaryp shyqqanda qaýyrsyn qanattary úlpildegen aq bolatyn jyrtqysh qustyń 6 aılyq balapany kúnine keminde bir ret qoıan alady eken. Tálimbaqtaǵylar olardy ańǵa túsýge ábden baýlyǵan. Tabıǵatynan azattyqty súıetin qustar shymyr bolyp shyǵýy úshin tóbesi bıik, ishi keń torlarda ósirilgen.
Oraıy kelip turǵanda 30 jyldyq tarıhy bar «Suńqar» ortalyǵy – Qazaqstandaǵy jyrtqysh qustardy ósiretin jalǵyz tálimbaq ekendigin aıta ketken jón. Sońǵy 5 jylda munda 21 búrkit erkindikke jiberilgen. Alaıda mamandarǵa qustardyń keıingi ómirin baqylaý qıyndyq týǵyzyp otyr. Oǵan qosa, elimizde ornıtologtar sany jetispeıdi, deıdi ortalyq dırektory Ashot Anzorov.
– Biz kóptegen eldermen tájirıbe almasyp, qustardy da aıyrbastap turamyz. Olardy tıimdi kóbeıtý joldaryn da qarastyryp júrmiz. Osyǵan deıin Zoologııa ınstıtýtynda arnaıy kafedra bolatyn. Qazir ol jabylyp qalǵan. Tálimbaqta jumys isteıtinderdiń bári is júzinde myqty dep aıta alamyn. Qustardyń sanyn kóbeıtýde biliktiliktiń mańyzy zor, – deıdi «Suńqar» ortalyǵynyń dırektory Ashot Anzorov.
Qazirgi tańda tálimbaqta 500-den astam suńqar men búrkit bar. Mamandar Qazaqstannyń ár túkpirin meken etetin qustardyń 15-ten astam túrin baǵady. Olardyń sany osynda kóbeıtilip, satylady, joq túrleri almastyrylady.
Biraz qarajat pen qoldaýdy qajet etetin jobalarǵa demeýshiler asa qajet. Sondyqtan «Efes Qazaqstan» ShS AQ 2012 jyly búrkitterdi jabaıy tabıǵat aıasyna jiberýga baǵyttalǵan biregeı ǵylymı synaqtardy qarjylandyrýǵa kirisken-di. Nátıjesinde, joǵaryda atap ótkendeı, sońǵy 5 jylda «О́z úlesińdi qos. Tabıǵatty saqtap qal» atty áleýmettik baǵdarlamasy aıasynda 21 búrkittiń aqúlpegi jetilip, jabaıy tabıǵatqa beıimdelip, ushyryldy.
Aınash ESALI,
«Egemen Qazaqstan»
ALMATY
