Bastamalar túsindirildi
Parlamentshilerdiń Elbasy Joldaýyn túsindirý boıynsha eldi mekenderge saparlary áli de jalǵasýda. Máselen, Senat depýtattary Ǵumar Dúısembaev pen Sársenbaı Eńsegenov jumys saparymen Atyraý oblysyna keldi. Memleket basshysynyń bıylǵy halyqqa Joldaýynda aıtylǵan mindetter týraly senatorlardyń jergilikti atqarýshy organdardyń basshylyǵymen, aýdandyq máslıhat depýtattarymen jáne turǵyndarmen kezdesýi barysynda sóz boldy.
Atyraý bıznes jáne quqyq kolledjinde stýdenttermen kezdesken Senat depýtattary joǵary bilim berý júıesinde mamandardy daıarlaý men oqý oryndaryndaǵy bilim sapasyna qoıylatyn talaptardyń kúsheıtiletinin atap ótti.
Jumys sapary kezinde senatorlar aýdandardy aralap, aýyl turǵyndarymen kezdesýler ótkizip, Joldaýda basymdyq berilgen salalardy damytý, elimizdiń áleýmettik-ekonomıkalyq ahýalyn jaqsartýdy kózdeıtin sharalardy jedel iske asyrý týraly baıandady.
Qazaqstandyqtardyń ál-aýqatynyń ósýi basty basymdyqqa aınalýǵa tıis.
Men laýazymdy tulǵanyń jeke tıimdiligin jáne qyzmetke laıyqtylyǵyn dál osy ólshemge sáıkes baǵalaıtyn bolamyn.
Qazaqstandyqtardyń ál-aýqaty, eń aldymen, tabystarynyń turaqty ósimi men turmys sapasyna baılanysty.
(Joldaýdan)
Baqytgúl BABASh,
«Egemen Qazaqstan»
ATYRAÝ
***
Agroónerkásip keshenin damytý jaıy sóz boldy
Senat depýtaty Serik Jaqsybekov Aqmola oblysyndaǵy Shortandy aýdanynyń bıznes ókilderimen jáne aýyl sharýashylyǵy taýarlaryn óndirýshilerimen kezdesti.
Aýdan ákimi, aýyl okrýgteri men aýyl ákimderi qatysqan kezdesýde Elbasynyń «Qazaqstandyqtardyń ál-aýqatynyń ósýi: tabys men ómir sapasyn arttyrý» atty Joldaýy jan-jaqty talqylandy.
Júzdesýge qatysýshylar Joldaýdaǵy elimizdiń ekonomıkasyn damytý jónindegi erejeler týraly óz oılaryn aıta kelip, agroónerkásip keshenin damytý máseleleri týraly usynys, pikirlerin ortaǵa saldy.
Baıqal BAIÁDIL,
«Egemen Qazaqstan»
Aqmola oblysy
***
Basymdyqtar talqylandy
Elbasy Joldaýyn turǵyndarǵa jetkizý maqsatynda Shyǵys Qazaqstan oblysynda bolǵan Senat depýtaty Dúısenǵazy Mýsın Jarma aýdanynyń birqatar mekemesinde kezdesý ótkizdi.
Sýyqbulaq aýylyndaǵy kezdesýde senator bıylǵy Joldaýda negizinen áleýmettik máseleler qamtylǵanyn atap ótti. Al Shar qalasyndaǵy tehnologııalyq kolledj stýdentterimen, ustazdar jáne dárigerlermen kezdesýinde Elbasynyń kelesi jyldy «Jastar jyly» dep jarııalaýyna oraı jastardy belsendi bolýǵa, tyń ıdeıalar men bastamalardy kóterýge úndedi.
Sapar barysynda senator Abaı aýdanynyń Qasqabulaq, Keńgirbaı bı aýyldarynda jáne aýdan ortalyǵy Qaraýyldyń turǵyndarymen de júzdesip, halyqtyń ál-aýqatyn arttyrý men aýyl sharýashylyǵyn damytý máselelerin talqylady.
Azamat QASYM,
«Egemen Qazaqstan»
Shyǵys Qazaqstan oblysy
***
Jastar jetekshilerimen jarasymdy áńgime
Parlament Senatynyń depýtat Serik Bekturǵanov Qostanaı qalasynda jastar jetekshilerimen, úkimettik emes uıymdardyń tóraǵalarymen, stýdenttermen kezdesti.
Qostanaı memlekettik pedagogıkalyq ýnıversıtetindegi «Rýhanı jańǵyrý» jobalyq keńsesinde ótken sharaǵa osy oqý ornynyń basshylary men jergilikti ákimdik ókilderi qatysty.
Memleket basshysy N.Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» Joldaýy talqylaýdyń basty taqyryby boldy. Senator S.Bekturǵanov aldaǵy jyly ustazdar mártebesi týraly jańa zań qabyldanatynyn atap ótti. Kezdesýge qatysýshylar jastar saıasaty salasynda óz ıdeıalary men usynystaryn aıtty. «Rýhanı jańǵyrý» jobalyq keńsesiniń sarapshylary ózderiniń qazirgi jumystaryn tanystyrdy.
Názıra JÁRIMBET,
«Egemen Qazaqstan»
QOSTANAI
***
Saýaldarǵa jaýap berildi
Joldaýdyń mán-mańyzyn túsindirý maqsatymen Qyzyljar óńirine kelgen Parlament Májilisiniń depýtattary aýdandardy aralap, jurtshylyqpen iskerlik kezdesýler ótkizdi.
Tarıhı qujat jaıly pikirlesip, saýaldarǵa jaýap bergen Snejanna Imasheva Mamlıýt, Jambyl aýdandaryn aralap, eńbek ujymdarymen kezdesken bolatyn. Depýtat «Pedagog mártebesi týraly» zańdy ázirleý, qabyldaý qajettigine aıryqsha nazar aýdaryp, muǵalimder men mektepke deıingi mekemeler qyzmetkerleri jónsiz tekserister men mindetten tys fýnksııalardan arylatynyn, munyń ózi oqý sapasy men tárbıege aıtarlyqtaı yqpal etetinin jetkizdi.
Parlament Májilisiniń depýtattary Petr Sharapaev, Albert Raý Petropavl aýyr mashına jasaý zaýytynda, «Radýga» JShS-inde, Petropavl tehnıkalyq-gýmanıtarlyq kolledjinde bolǵan kezdesýlerde eksportqa baǵdarlanǵan ındýstrııalandyrý, onyń ishinde shıkizattyq emes ónimder men taýarlarǵa basymdyq berý, agroónerkásiptik keshenniń áleýetin tolyq qoldaný, qarjy sektorynyń rólin kúsheıtý máseleleri boıynsha oı-pikirler alysyp, tehnıkalyq kadrlar daıyndaýdyń ózekti problemalaryn ortaǵa saldy. Kelesi jyl «Jastar jyly» dep jarııalanǵanyn alǵa tarta otyryp, óskeleń urpaqtyń elimizdegi ózgerister úderisinde alatyn orny aıryqsha ekenine toqtaldy. Olardy «Aýyl – El besigi», «О́z jerińdi tanyp-bil» jobalaryna belsene qatysýǵa shaqyrdy.
Kım Roman men Aıqyn Qońyrov M.Jumabaev aýdanyna barǵan saparynda Sokolov orman sharýashylyǵy mekemesinde, pıtomnıkte boldy. Halyq qalaýlylary jurtshylyqqa bıznesti órkendetýdiń turaqty kózin qalyptastyrý, jeke ınvestısııany yntalandyrý, kásipkerlikti zańsyz ákimshilik qysymnan qorǵaý joldaryn áńgimeledi.
О́mir ESQALI,
«Egemen Qazaqstan»
Soltústik Qazaqstan oblysy
