Manap Kókenov 1928 jyly 20 mamyrda Qyzylorda oblysy, Jańaqorǵan aýdanynda dúnıege kelgen. 15 jasynda dúbirli dodalarǵa qatysqan bolashaq halyq aqyny, 16 jasynan Qyzyl otaý meńgerýshisi bolyp qyzmet atqardy. Kózi tirisinde-aq aıtys mektebi ashylǵan aqynnyń shákirtteri Zamadın Ibadýllaev, Nııatolla Ramanqulov, Elena Ábdiqalyqova, Ábilhaıyr Syzdyqov aıtystyń eren júırikterine aınaldy. M.Kókenov aıtys aqyny ǵana emes, mádenı jáne tarıhı eskertkishterdi zertteýshi, halyq murasyn qasterlep jınaýshy jáne nasıhatshy bola bildi. «Áziret Sultan» qoryq-murajaıynyń kitaphanasyn 3-4 ǵasyrlyq tarıhy bar 14 kitap pen derekti qujattarmen tolyqtyrdy. Sol sekildi Súgirdiń ustazy kompozıtor Álshekeı Bektibaevtiń 14 kúıin zerttep, onyń 9 kúıin qazaq teleradıosy arqyly efırge shyǵardy.
Aqynnyń 90 jyldyǵyna arnalǵan mereıli merekede Manap aýyly turǵyndaryna tamasha tartý jasaldy. 100 oryndyq Alla úıiniń ashylý saltanatynda «Aqmeshit-Syrdarııa» meshitiniń bas ımamy Bolatbek Ábýov izgi tilegin bildirip, Quran kitabyn tartý etti. Oblystyq máslıhattyń hatshysy Naýryzbaı Baıqadamov, aýdan ákimi Ǵalym Ámireev pen birqatar ardager jyly lebizin bildirip, aq batasyn berdi.
Mereıtoıǵa jınalǵandar «Manap salǵan izbenen» atty etno-kórme qalashyǵyn aralasa, «Aqyn álemi» teatrlandyrylǵan qoıylym kópshilik kóńilinen shyqty. Bul keshte «Súleılerdiń sońǵy tuıaǵy» atty aqynnyń tańdamaly jınaq kitaby men «Manap.kz» saıtynyń tusaýy kesildi.
Al M.Kókenov atyndaǵy aýdandyq mádenıet úıinde halyq aqynynyń bıýsti ashyldy. Sondaı-aq aıtystyń aqtańgerine arnalǵan respýblıkalyq retro aıtys ótti, oǵan Abash Kákenov, Aıtaqyn Bulǵaqov, Dáýletkereı Kápuly, Bekarys Shoıbekov, Ábilhaıyr Syzdyqov syndy aıtys sańlaqtary qatysty. Aqynnyń mereıtoıyna oraı uıymdastyrylǵan sharalar sport saıystarymen jalǵasyn tapty. 2006-2013 jyly týǵan jasóspirimder arasynda taekvondodan oblystyq ashyq týrnır ótti. Sporttyq sharaǵa Qyzylorda qalasy, Shıeli jáne Jańaqorǵan aýdanynan kelgen segiz komandanyń 163 sportshysy qatysty.
Baqtııar TAIJAN,
«Egemen Qazaqstan»
