Jastardyń Maǵjan Jumabaev shyǵarmashylyǵyn túsinip, oqýǵa degen qyzyǵýshylyǵyn oıatý jáne aqyn shyǵarmalaryna búgingi kózqaras turǵysynan qarap baǵa berý, stýdentter men ǵalymdardyń arasynda jandy dıalog ornatýdy maqsat tutqan is-sharaǵa Nazarbaev Ýnıversıtettiń vıse-prezıdenti Hadısha Daıyrova, oblystyq «Soltústik Qazaqstan» qoǵamdyq-saıası gazetiniń dırektory Jarasbaı Súleımenov, Almaty qalasyndaǵy Qazaqstan-Brıtan tehnıkalyq ýnıversıtetiniń professory, ǵalym Janar Qorabekqyzy, L.N.Gýmılev atyndaǵy Eýrazııa ulttyq ýnıversıtetiniń professory Ǵalııabaný Kertaeva jáne bas qalanyń ózge de joǵary oqý oryndarynan oqytýshylar men stýdentter qatysty.
Nazarbaev Ýnıversıtet – álemdik standartqa saı jaratylystaný men medısına baǵytynda bilim alatyn stýdentterdi tek salalyq damytýmen shektelmeı, jastardy rýhanı kemeldendirý, ultymyzdyń tarıhy men dástúrin tel emip ósken patrıot azamat etip tárbıeleýge ólsheýsiz úles qosyp kele jatqan elimizdegi mańdaıaldy joǵary oqý oryndarynyń biri. 2010 jyly irgesi qalanǵannan beri úzdiksiz uıymdastyrylyp kele jatqan mádenı, rýhanı keshter sonyń aıǵaǵy. Atap aıtar bolsaq, ótken jyly «Jyr – semser, kúı – qudiret, óleń – órnek» atty qazaqtyń birtýar qaıratker tulǵalary: Mahambet О́temisuly, Qurmanǵazy Saǵyrbaıuly jáne Farıza Ońǵarsynovany eske alýǵa arnalǵan ádebı-sazdy keshke kýá bolsaq, bıyl Sh.Aıtmatovtyń 90 jyldyǵyna oraı «Alashtyń Aıtmatovy» taqyrybynda jáne bir mazmundy shara uıymdastyryldy. «Maǵjan rýhy jáne HHI ǵasyr jastary» – osy bir taǵylymdy da úlgili úrdistiń zańdy jalǵasy.
– Abaı dese, oıymyzǵa tutas qazaq oralady. Iаǵnı, Abaı – qazaqtyń ózi bolsa, Maǵjan – sol uly dalanyń rýh týy. Sondyqtan da bul keshtiń ultymyz úshin orny da, taǵylymy da zor. Maǵjan mereıtoıyn ulyqtaý sharasy jyl basynda Túrkııanyń Ankara qalasynan bastaý alyp, Ázerbaıjan men Makedonııa elderinde jalǵasty. Ankarada aqynǵa eskertkish ashyldy. Munyń barlyǵy dúldúl darynnyń ulylyǵyn, kúlli túrki álemine ortaq qaıratker tulǵa ekenin áıgileıdi. Biz de osy bir tamasha úrdisti úzbeı, elimizdiń bolashaq kóshbasshylary tárbıelenip jatqan joǵary oqý orny – Nazarbaev Ýnıversıtette jalǵastyrǵymyz keldi. Elimizdiń kemel keleshegi – órimtal jastar kimderdi ardaqtap, qurmet tutý kerek degen máselege qazirden bastap kóńil bólsek deımiz. Bizdiń maqsatymyz – balalarymyzdy ózimizdiń tarıhymyz ben salt-dástúrimizden, ultymyzdyń uly tulǵalaryn tanýdan alystatpaý. Adam qansha bilimdi bolsa da óz ultynyń bolmysy men tól tarıhyn bilmese, ol adamnyń eli úshin emirenip, Otanyna jan júregimen qyzmet etýi múmkin emes. Osy sebepti de jastarymyzdy tek jaratylystaný salasymen ǵana shektemeı, rýhanı kemeldendirýge, jan-jaqty, ıntellektýal adam bolyp er jetýine barynsha basymdyq berip, sol úshin aıanbaı jumys istep jatyrmyz, – deıdi keshti uıymdastyrýshy, Nazarbaev Ýnıversıtet janyndaǵy «Rýhanı jańǵyrý» mádenı ortalyǵynyń dırektory Gúltas Qurmanbaı.
Taǵylymdy kesh aıasynda belgili jýrnalıst Jarasbaı Súleımenovtiń jetekshiligimen «Asyl kitap» baspasynda jaryq kórgen «Maǵjan Jumabaev» ensıklopedııasynyń tusaýy kesildi. Parasat-paıymy, oı-sanasy búkil túrki álemine nuryn shashqan ultymyzdyń uly tulǵasy, iri qoǵam qaıratkeri Maǵjan Jumabaevtyń ómiri men shyǵarmashylyq qyzmetine arnalǵan aıtýly eńbekte aqynnyń ósken ortasyna, sońyna qalyrǵan ádebı-mádenı murasyna, qoǵamdyq qyzmetine qatysty mol ári tyń derekter keńinen qamtylypty.
Ádebı-sazdy tanymdyq sharanyń taǵy bir eleýli sáti – kesh aıasynda Nazarbaev Ýnıversıtette bir aıdan beri ótip jatqan «Maǵjan oqýlary» konkýrsy men «Maǵjantaný» ǵylymı jobalar baıqaýynyń jeńimpazdarynyń esimi jarııalanyp, arnaıy dıplomdarmen marapattaldy. «Maǵjan oqýlary» boıynsha 1-oryn Nazerke Leske buıyrsa, 2-jáne 3-oryndy Mádına О́tkelova men Saıan Qatrenov bólisti. Al «Maǵjantaný» jobasynyń jeńimpazdary sarapshylar alqasynyń sheshimimen, tómendegi rettilik boıynsha qorytyndylandy: 1-oryndy Beksultan Qazybaı, 2-oryndy Shyńǵys Aıdynov, 3-oryndy Dına Túlekova enshiledi. Al qazylar alqasynyń arnaıy syılyǵy ýnıversıtet stýdenti Dáýren Bınazarovqa tabystaldy. Taǵylym men tanymdyq máni egiz órilgen ádebı keshti Nazarbaev Ýnıversıtettiń stýdentteri qazaq jáne aǵylshyn tilinde qoıylǵan «Men jastarǵa senemin» atty ádebı-kompozısııalyq sahnalyq kórinispen túıindedi.
Biz kezinde uly aqynnyń ózi jyrlap ótken, jastardyń boıynan otansúıgishtik sezimdi anyq sezindik.
Nazerke JUMABAI,
«Egemen Qazaqstan»
