Qos ózen arasyndaǵy arǵy-bergi tarıhty Ánes Saraıdaı jetesine jetkizip jazǵan qalamger az. Atyraý oblystyq ákimdigi, oblystyq mádenıet, arhıvter jáne qujattama basqarmasy jazýshynyń qurmetine shyǵarmashylyq kesh uıymdastyrdy. «Edil-Jaıyq» trılogııasynyń tusaýkeser rásimin Memlekettik syılyqtyń laýreaty, jazýshy Qajyǵalı Muhanbetqalıev pen Qazaqstan Jazýshylar odaǵynyń basqarma tóraǵasy, Memlekettik syılyqtyń laýreaty Ulyqbek Esdáýlet jasady.
– Ánes Saraıdyń qazaq tarıhy týraly, kók túrkilerden qozǵap, Noǵaıly jurtynyń shejiresin baıandaǵan eńbekteriniń qundylyǵy kúnnen-kúnge arta bermek. Bul kisiniń eńbekqorlyǵyna bárimiz tántimiz. Qalam qýatynyń arqasynda talaı romandar men hıkaıattardy, áńgimelerdi berdi. Olardyń bárinen de ulttyq rýhtyń samaly esip turady, – dedi Qazaqstan Jazýshylar odaǵynyń basqarma tóraǵasy Ulyqbek Esdáýlet.
Ádebı-sazdy keshte Mahambet atyndaǵy akademııalyq qazaq drama teatrynyń ártisteri jazýshynyń ómiri men shyǵarmashylyǵy arqaý bolǵan qoıylymdy usyndy. Jergilikti ánshi-kúıshilerdiń ónerimen órilip otyrǵan sharada oblys ákiminiń orynbasary Nursáýle Saılaýova sóılep, «Halqymyzda «Jaqsy – ortaq, aı menen kúndeı, ámbege birdeı» degen sóz bar. Ánes aǵanyń eńbekterin oqyǵan jannyń kókirek kózi ashylady, óz tarıhyna sergek kózqaraspen qaraı bastaıdy. Osynyń ózi qalamger muratynyń aqtalǵany», dep atap ótti.
– Búgingi tańda qazaq ádebıetinde Ánes Saraıdan bıik, Ánes Saraıdan tereń, Ánes Saraıdan keń eshkim joq. Muhtar Áýezov pen Ábish Kekilbaevtan keıingi ǵulama jazýshy. Bul kisi shyǵarmalary arqyly ózińniń qazaq ekenińdi uqtyrady, oqyǵanda qazaq bolǵanyńa arqalanyp, jaldanyp ketesiń, – deıdi Qazaqstan Jazýshylar odaǵy basqarma tóraǵasynyń orynbasary, Prezıdent syılyǵynyń laýreaty Mereke Qulkenov.
Jas qalamgerlerdiń jazýshy, Memlekettik syılyqtyń laýreaty, Qazaqstannyń eńbek sińirgen qaıratkeri, «Barys», «Parasat» ordenderiniń ıegeri Ánes Tólendiulynan úlgi eter taǵy bir qasıeti – eńbekqorlyǵy. Jazý ústeline otyrmaıtyn kúni bolmaıtyn qalamger búginge deıin 25 tom kitap jazǵan. «Sonyń 17 tomy jaryqqa shyqty. Alda áli de ıdeıalar bar. Taǵdyryma qansha jyl jazylǵanyn bilmeımin, biraq meniń bar ómirim eńbektenýden turady», dedi kesh sońynda sóz alǵan jazýshynyń ózi.
Sharaǵa qalamgerdiń jary, belgili jýrnalıst, jazýshy, qoǵam qaıratkeri Altynshash Jaǵanova, Qazaqstannyń eńbek sińirgen qaıratkeri, aqyn Aqushtap Baqtygereeva, Parlament Senatynyń depýtaty Sársenbaı Eńsegenov, akademık Ǵarıfolla Esim qatysyp, lebizderin bildirdi.
Baqytgúl BABASh,
«Egemen Qazaqstan»
Atyraý
