Memleket basshysy «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýynda kommýnaldyq qyzmet pen tabıǵı monopolııalardy retteý salalarynda tarıftiń jasalýy jáne tutynýshylardan jınalǵan qarjynyń jumsalýy áli kúnge deıin ashyq emestigi týraly aıtyp, atalǵan salada naqty sheshimder qabyldaý týraly tapsyrma berdi.
Málimetke súıensek, Mańǵystaý oblysynyń turǵyn úı qory 1 654 kóp- qabatty turǵyn úıdi quraıdy. Onyń ishinde 981 úı Aqtaý qalasyna, 262 úı Jańaózen qalasyna jáne 411 úı aýdandarǵa tıesili. Úılerdiń sapasy da áralýan. Sol sebepti aımaq boıynsha 290 úı kúrdeli jóndeý júrgizýdi qajet etse, Aqtaý qalasynda 6, Jańaózen qalasynda 2 úı apattyq jaǵdaıdaǵy úıler sanatynda. Mańǵystaý oblystyq Energetıka jáne turǵyn úı-kommýnaldyq sharýashylyq basqarmasy basshysynyń mindetin atqarýshy J.Salımovtyń aıtýynsha, óńirde kondomınıým nysandaryn basqarý boıynsha birqatar másele bar. Máselen tirkelgen kondomınıýmdar sany tómen deńgeıdi kórsetedi. Turǵyn úılerdiń tehnıkalyq pasporttary men jer ýchaskelerine arnalǵan aktilerdiń bolmaýy saldarynan oblys boıynsha 1654 kópqabatty turǵyn úıdiń tek 529-y tehnıkalyq pasporttaryn tirkegen.
Aqtaý qalasy boıynsha 34 jaýapkershiligi shekteýli seriktestik, 17 jeke kásipker, 19 páter ıeleri kooperatıvi, 8 páter ıeleriniń tutyný kooperatıvi, 1 qoǵamdyq birlestik, 1 páter ıeleriniń qoǵamdyq birlestigi, 1 turǵyn úı qurylys kooperatıvi syndy kondomınıým nysandaryn basqarý organdary bar, alaıda olardyń sanynyń kóptigi kórsetiletin qyzmettiń sapasyna jaýap bere almaı keledi.
Quzyrly oryndarǵa ujymdyǵy bar, jekesi bar aıyna eki-úsh aryz-shaǵym tússe, bir aı ishinde turǵyn úı ınspeksııasy bólimine shamamen 400 shaǵym kelip túsken. Otyz kúnde 400 aryzdyń túsýi – saladaǵy máseleniń qanshalyqty mańyzdylyǵyn, kúrdeliligin ańǵartady.
– Jeke páter ıeleri kooperatıvteriniń qyzmetinde másele barshylyq. Tutynýshylardan jınalǵan qarajatty paıdalanýda ashyqtyq joq. Búginde PIK-ter óz qyzmetkerlerine joǵary jalaqy belgileıdi, shtatty negizsiz ósirý faktileri bar. Bul – olardyń tarıfterden jınalǵan qarajatty paıdalanýda ashyq saıasat júrgizbeıtindigin kórsetedi. Halyqtan tarıfterdiń kúrt ósýi boıynsha kóptegen shaǵym kelip túsýde, dedi turǵyn-úı kommýnaldyq sharýashylyq salasynyń ózekti máselelerine arnalǵan jıynda óńir basshysy.
Memlekettik sáýlet-qurylysty qadaǵalaý basqarmasy jańadan salynǵan úılerdiń tehnıkalyq pasporttaryn qurylys salýshy esebinen jasaqtap, 2018 jyldyń 1 jeltoqsanyna deıin qala jáne aýdan ákimderi tirkelmeı qalǵan kópqabatty úılerdi bıýdjet qarajaty esebinen memlekettik tirkeýden ótkizýi tıis. Sondaı-aq qala jáne aýdan ákimderi kópqabatty úılerdiń aýlasyn abattandyryp, qoldanystaǵy balalarǵa arnalǵan sporttyq jáne oıyn alańshalaryn qalpyna keltirýi jáne jańadan salýy, olardyń jaýapkershiligin kondomınıým nysandaryn basqarý organdaryna berip, odan ári kútip ustaýdy qamtamasyz etýi qajet dep sheshildi.
Turǵyndar tólegen aqshasyna saı sapaly qyzmet kórse, aryz-shaǵymnyń bolmaıtyny belgili.
Gúlaıym ShYNTEMIRQYZY,
«Egemen Qazaqstan»
Mańǵystaý oblysy
