Senat Qazaqstan men Reseı arasyndaǵy «Týımazy – Omby – Novosıbırsk-2» jáne «Omby – Pavlodar» magıstraldyq munaı qubyrlaryndaǵy tehnologııalyq munaıdyń mártebesin aıqyndaý týraly kelisimdi ratıfıkasııalady.
Qujattyń maqsaty qazaqstandyq taraptyń («QazTransOıl» AQ) 141728 tonna mólsherindegi jáne reseılik taraptyń («Transneft – Ýral» AQ – «Transneft» JAQ-nyń enshiles qoǵamy) 62048 tonna mólsherindegi tehnologııalyq munaıǵa menshik ıesi quqyqtaryn rastaý bolyp tabylady. Kelisim búgingi kúnde is júzinde bar munaıdyń atalǵan uıymdarǵa tıesiligin zańdy túrde bekitedi, al qujatta kórsetilgen keste munaıdy menshik ıelerine berý úshin qajetti azamattyq-quqyqtyq jáne uıymdyq rásimderdi jeńildetý men barynsha tómendetýge múmkindik beredi.
Palata Qylmystyq ister boıynsha zattaı dáleldemeler bolyp tabylatyn esirtki quraldaryn, psıhotroptyq zattar men olardyń prekýrsorlaryn, atys qarýyn, onyń negizgi bólikterin, oq-dárilerdi, jarylǵysh zattar men jarǵysh qurylǵylardy berý tártibi týraly hattamany ratıfıkasııalady.
Hattama quzyretti organdardyń ózara is-qımyl jasaýyn, qylmystyq ister boıynsha zattaı dáleldemeler bolyp tabylatyn zattardy qylmystyq proseste paıdalaný úshin olardy berý týraly suraý salýlardy resimdeý jáne oryndaý tártibin, sondaı-aq suraý salýdy oryndaýdan bas tartý negizderin aıqyndaıdy.
Sonymen qatar ol joǵaryda tizbelengen zattaı dáleldemelerdi Hattamaǵa qatysýshylardyń memlekettik shekaralary arqyly alyp ótý týraly erejeni, olardyń saqtalýyn jáne qaıtaryp berilýin qamtamasyz etý tártibin bekitedi.
Hattama esitkilerdiń zańsyz aınalymyna baılanysty qylmystardyń aldyn alýdaǵy, olardy ashý men tergep-tekserýdegi yntymaqtastyqty jandandyra túsýge yqpal etetin bolady.
Otyrysta Qazaqstan Úkimeti men Halyqaralyq Qyzyl Krest Komıtetiniń arasyndaǵy Qazaqstan Respýblıkasyndaǵy Halyqaralyq Qyzyl Krest Komıteti О́kildiginiń mártebesi, artyqshylyqtary jáne ımmýnıtetteri týraly kelisim de ratıfıkasııalandy.
Qazirgi ýaqytta HQKK-niń álemniń 90-nan astam elderinde óz ókildikteri bar, ol olarmen ekijaqty kelisimderdiń deńgeıinde qarym-qatynas jasaıdy, bul elderde de HQKK-niń halyqaralyq quqyq sýbektiligi moıyndalady.
Qujattyń qabyldanýy HQKK turaqty keńsesiniń ashylýy úshin qajetti jaǵdaılardy jasaýǵa, onyń ishinde quqyq sýbektiligin moıyndaýǵa, artyqshylyqtar men ımmýnıtetter berýge, salyqtardan bosatýǵa, úı-jaılaryna basa kóktemeýdi qamtamasyz etýge jáne HQKK mandatyna sáıkes Qazaqstanda onyń qyzmetin júzege asyrýǵa járdemdesetin bolady.
HQKK ókildigin ashý Memleket basshysynyń kópjaqty dıplomatııa habyn qurý týraly bastamasyn iske asyrýǵa yqpal etedi.
Otyrys barysynda senatorlardyń depýtattyq saýaldary jarııa etildi. Darıǵı Nazarbaeva esirtki áseri bar «Tramadol» dárisin dárigerdiń ruqsatynsyz satýǵa tyıym salý týraly; Birǵanym Áıtimova men Darıǵa Nazarbaeva muǵalimder men dárigerlerge turǵyn úıdi jeńildikpen bólý qajettigi jáne arnaıy ekonomıkalyq aımaqtardaǵy otandyq kitap shyǵarý, kıno óndirisi men baspahana qyzmetteriniń jumysy; Ábdáli Nuralıev Jambyl oblysynyń Jýaly aýdanyndaǵy aýyldardy gazdandyrý; Erbolat Muqaev Jalpaqtal (Batys Qazaqstan oblysy) sý qoımasynyń qurylysyn respýblıkalyq bıýdjet esebinen qarjylandyrý; Muratbaı Joldasbaev aýyl turǵyndaryn taza aýyz sýmen qamtamasyz etý jobalaryn qarjylandyrý týraly saýaldar joldady.
