Stýdentter arasynda kásipkerlikti damytýdy maqsat etip otyrǵan shara aıasynda Halyqaralyq bıznes akademııasy kolledjiniń dırektory Alfııa Hısmatýllına Kásipkerlik jáne bıznes boıynsha Úılestirý ortalyǵynyń jumysymen tanystyryp ótti. Alfııa Ánýarqyzynyń aıtýynsha, bıznes-klýbtardy qurýdyń maqsaty stýdenttik ortada kásipkerlikti damytýǵa qolaıly jaǵdaı jasaý, bıznes josparlaý salasynyń álippesi men tájirıbesin qatar meńgerý, tulǵa bolyp qalyptasý, bıznes klýbtar músheleriniń josparlaryn qurýǵa jáne damytýǵa kómektesý, jastar arasynda belsendi ómirlik ustanymyn, áleýmettik-jaýapty minez-qulyq daǵdylaryn qalyptastyrý, salaýatty ómir qundylyqtaryn nasıhattaý bolyp tabylady.
Almaty qalasy Bilim basqarmasy Tehnıkalyq jáne kásiptik bilim berý bóliminiń jetekshisi Áset Muhanbetov stýdentterdiń kásipkerlikke ıkemdelýi oqý orny qabyrǵasynan bastalatyndyǵyn jetkizdi. Qazirden baǵyt-baǵdaryn aıqyndap úırengen jastar erteńgi kúni úlken bıznestiń deńgeıine shyǵady.
Al Almaty qalasy boıynsha «Atameken» UKP bólim basshysy Vera Szın «Kásipkerlerdiń jańa býynyn búgingi Qazaqstan naryǵyna laıyqty mamandar etip tárbıeleýmiz qajet. Sondyqtan da stýdentterdiń kásipkerlik bilimin jyldan-jylǵa arttyra berýge tıispiz» dep atap ótti.
Almaty qalasy «Rýhanı jańǵarý» Jobalyq ofısiniń jumystary barysymen tanystyrǵan A.Sahova, L.Januzaqova oqý oryndarymen birlesken jumys josparlarynan habardar etti.
Arnaıy pán boıynsha, ıaǵnı kásipkerlikke baýlıtyn ustaz Natalıa Vostrıkova óz tájirıbesimen bólisip, kásipkerlikti oqytýdaǵy birqatar mańyzdy ádisterdi ortaǵa saldy. Oqý-tájirıbe barysynda stýdentterdi salaǵa beıimdeýdiń ózindik erekshelikteri bar ekendigin jetkizdi.
Halyqaralyq bıznes akademııasy kolledji Kásipkerlik jáne bıznes mektebiniń jetekshisi Sábıt Tasjarǵanov jeke kásip qurýdaǵy maqsat-mindetterdi júzege asyrý, kásipkerlikti durys josparlaý, ony júzege asyrýdaǵy mańyzdy sharttarǵa baılanysty sheberlik saǵatyn ótkizip, mekteptiń aldaǵy josparlarymen bólisti.
Aǵymdaǵy jyldyń 21-23 qarasha kúnderi atalǵan kolledjde «Men -kásipkermin» VIII qalalyq ekonomıka oıyndary ótedi. Oǵan Almaty qalasyndaǵy kásiptik bilim berý salasyndaǵy barlyq oqý oryndarynyń stýdentteri qatysa alady.
Elvıra SERIKQYZY,
«Egemen Qazaqstan»
ALMATY
